ନୂଆଦିଲ୍ଲୀ: ବିଶ୍ୱ ବଜାରରେ ପ୍ରଭାବ ଯୋଗୁ ଭାରତୀୟ ପୁଞ୍ଜିବଜାରରେ ନିବେଶକଙ୍କୁ ବୁଧବାର ବୃହତ୍ କ୍ଷତି ସହିବାକୁ ପଡିଛି। ନିବେଶକ ୧.୫୬ ଲକ୍ଷ କୋଟି ଟଙ୍କା କ୍ଷତି ସହିଥିବା ଜଣାପଡିଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ ୫୯୯.୬୪ ପଏଣ୍ଟ (୧.୪୯%) ନିମ୍ନରେ ରହି ୩୯,୯୨୨.୪୬ ପଏଣ୍ଟରେ ବନ୍ଦ ହୋଇଛି। ଦିନ ମଧ୍ୟରେ ସେନ୍ସେକ୍ସ ୭୪୭.୫ ପଏଣ୍ଟ ଖସି ୩୯,୭୭୪ ସ୍ତରକୁ ଖସି ଆସିଥିଲା। ଆମେରିକା ଏବଂ ୟୁରୋପରେ କରୋନା ମାମଲା ବଢୁଥିବାରୁ ନିବେଶକମାନେ ଏହାକୁ ନେଇ ଆଶଙ୍କାରେ ରହିବାକୁ ଏଭଳି ସ୍ଥିତି ଉପୁଜିଛି। ବୁଧବାର ଶେୟାର କାରବାରରେ ଇଣ୍ଡସଇଣ୍ଡ ଶେୟାର ୩.୪୫% ଖସିଛି। ସେହିଭଳି ଏଚ୍ଡିଏଫ୍ସି, ଆଇସିଆଇସିଆଇ ବ୍ୟାଙ୍କ, ଟେକ୍ ମହିନ୍ଦ୍ରା, ବଜାଜ ଫାଇନାନ୍ସ, ଏଚ୍ଡିଏଫ୍ସି ବ୍ୟାଙ୍କର ଶେୟାର କାରବାର ପ୍ରଭାବିତ ହୋଇଥିବା ଜଣାପଡିଛି।