ମୁମ୍ବାଇ: ଶୁକ୍ରବାର ଭାରତୀୟ ଶେୟାର ବଜାରରେ ଏକ ବଡ଼ ଧରଣର ହ୍ରାସ ପରିଲକ୍ଷିତ ହୋଇଛି। ଉଭୟ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ଏବଂ ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ( ଏନ୍ଏସ୍ଇ)ରେ କାରବାର ପ୍ରଭାବିତ ହୋଇଛି। ଗତ ୪ ସପ୍ତାହ ମଧ୍ୟରେ ପ୍ରଥମ ଥର ଲାଗି ସେନ୍ସେକ୍ସ ଏବଂ ନିଫ୍ଟି କାରବାରରେ ବଡ଼ ହ୍ରାସ ହୋଇଛି। ଫଳରେ ନିବେଶକ ୨.୩୩ ଲକ୍ଷ କୋଟି ଟଙ୍କା କ୍ଷତି ସହିଛନ୍ତି। ବଜାର ପୁଞ୍ଜିକରଣ ୧୯୫.୪୩ ଲକ୍ଷ କୋଟି ଟଙ୍କାକୁ ହ୍ରାସ ପାଇଛି। ଏହା ପୂର୍ବ ସେସନରେ ୧୯୭.୬୬ ଲକ୍ଷ କୋଟି ଟଙ୍କା ରହିଥିଲା। ଚଳିତ ସପ୍ତାହର ପ୍ରଥମ ୪ ଟ୍ରେଡିଂ ଦିନରେ ସେନ୍ସେକ୍ସ ରେକର୍ଡ ଉଚ୍ଚ ସ୍ତରରେ ରହିଥିଲା। ମାତ୍ର ପ୍ରଫିଟ ବୁକିଂ ଏବଂ ବିଶ୍ୱ ବଜାରର ଧୀମା ରେସ୍ପନ୍ସ ଯୋଗୁ ଭାରତୀୟ ଶେୟାର ବଜାର ପ୍ରଭାବିତ ହୋଇଛି।
ଶୁକ୍ରବାର ସେନ୍ସେକ୍ସ ୫୪୯ ପଏଣ୍ଟ(୧.୧୧%) ଖସି ୪୯,୦୩୪ ସ୍ତରରେ ରହିଛି। ସେହିଭଳି ନିଫ୍ଟିରେ ୧୬୧ ପଏଣ୍ଟ (୧.୧୧%) ହ୍ରାସ ପାଇବା ଯୋଗୁ ଏହା ୧୪,୪୩୩ ପଏଣ୍ଟ ସ୍ତରରେ ବନ୍ଦ ହୋଇଛି। ଏହା ପୂର୍ବରୁ ନିଫ୍ଟି ତୃତୀୟ ସପ୍ତାହ ଲାଗି ଏବଂ ସେନ୍ସେକ୍ସ ୧୧ ସପ୍ତାହ ଲାଗି ଊର୍ଦ୍ଧ୍ୱରେ ରହିଥିଲା। ସପ୍ତାହ ମଧ୍ୟରେ ସେନ୍ସେକ୍ସ ୨୫୨ ପଏଣ୍ଟ (୦.୫୧%) ନିଫ୍ଟି ୮୬ ପଏଣ୍ଟ (୦.୬୦%) ବଢ଼ିଥିବା ନଜରକୁ ଆସିଛି। ବିଏସ୍ଇରେ ଟେକ୍ ମହିନ୍ଦ୍ରା, ଏଚ୍ସିଏଲ୍ ଟେକ୍, ଓଏନ୍ଜିସି, ଏସିଆନ ପେଣ୍ଟସ, ଅଲ୍ଟ୍ରାଟେକ୍ ସିମେଣ୍ଟ ଏବଂ ଇନ୍ଫୋସିସ୍ ଭଳି କମ୍ପାନୀର ଶେୟାର ଶୁକ୍ରବାର ପ୍ରାୟ ୩.୯୨% ନିମ୍ନରେ ରହିଛି। ସେହିଭଳି ଏନ୍ଏସ୍ଇ ପ୍ଲାଟ୍ଫର୍ମରେ ନିଫ୍ଟି ଆଇଟି ଏବଂ ରାଷ୍ଟ୍ରାୟତ୍ତ ବ୍ୟାଙ୍କ ଶେୟାର କାରବାର ୨.୨୪% ଖସିଛି।
ବ୍ୟାଙ୍କିଙ୍ଗ୍,ଆଇଟି ଏବଂ ଅଟୋମୋବାଇଲ ଷ୍ଟକ୍ କାରବାର ଚାପରେ ରହିଛି। ଆଗାମୀ ଦିନରେ ବଜାରରେ ସୁଧାର ଧାରା ଆସିପାରେ ବୋଲି ନିବେଶକ ଆଶା ରଖିଛନ୍ତି। ଭାରତୀୟ ଶେୟାର ବଜାରରେ ବିଦେଶୀ ନିବେଶକମାନେ ନେଟ୍ କ୍ରେତା ରହିଛନ୍ତି। ଗୁରୁବାର ଏହି ନିବେଶକମାନେ ୧୦୭୬ କୋଟି ଟଙ୍କା ଶେୟାର କ୍ରୟ କରିଛନ୍ତି।