ମୁମ୍ବାଇ,୧୮ା୩: ଗତ ୪ ଦିନ ହେବ ଭାରତୀୟ ପୁଞ୍ଜିବଜାର ପ୍ରଭାବିତ ସ୍ଥିତିରେ ରହିଛି। ଫଳରେ ନିବେଶକଙ୍କ ସମ୍ପତ୍ତି ୫.୫୫ ଲକ୍ଷ କୋଟି ଟଙ୍କା ହ୍ରାସ ହୋଇଛି। କୋଭିଡ୍-୧୯ ମାମଲା ବଢିବାରୁ ଏହାର ପ୍ରଭାବ ଷ୍ଟକ୍ ବଜାର ଉପରେ ପଡିଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସେନ୍ସେକ୍ସରେ ରିଲାଏନ୍ସ ଏବଂ ବ୍ୟାଙ୍କିଙ୍ଗ୍ ଷ୍ଟକ୍ କାରବାର ବିଶେଷ କ୍ଷତିଗ୍ରସ୍ତ ହୋଇଛି। ସେନ୍ସେକ୍ସ ବୁଧବାର ୫୬୨.୩୪ ପଏଣ୍ଟ ବା ୧.୧୨% ନିମ୍ନରେ ରହିବା ଯୋଗୁ ୪୯,୮୦୧.୬୨ ପଏଣ୍ଟ ସ୍ତରରେ ରହିଛି। ଗତ ୪ ଦିନରେ ସୂଚକାଙ୍କ ୧୪୭୭.୮୯ ପଏଣ୍ଟ ବା ୨.୮୮% ଖସି ଯାଇଛି। ବିଏସ୍ଇ ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜୀକରଣ ୫.୫୫ ଲକ୍ଷ କୋଟି ଟଙ୍କା କମିବା ଫଳରେ ଏହା ୨୦୩ ଲକ୍ଷ କୋଟି ସ୍ତରକୁ ଖସିଛି। ବିଏସ୍ଇରେ ତୈଳ ଏବଂ ବାଷ୍ପ, ଶକ୍ତି, ରିୟଲ ଇଷ୍ଟେଟ ଏବଂ ୟୁଟିଲିଟି ଶେୟାର ୩.୨୨% ହ୍ରାସ ପାଇଛି। କୋଭିଡ୍ ବାଦ୍ ଦରଦାମ ବୃଦ୍ଧି ନିବେଶକଙ୍କ ମନୋଭାବ ଉପରେ ପ୍ରଭାବ ପକାଇଛି। ସେହିଭଳି ବିଶ୍ୱ ବଜାରରେ କିଛି ଘଟଣା ଛାପ ନିବେଶକଙ୍କ ମନରେ ରହିଛି। ଓଏନ୍ଜିସି ଶେୟାର ୪.୯୫% ହ୍ରାସ ହୋଇଛି। ସେହିଭଳି ଏନ୍ଟିପିସି, ସନ୍ଫାର୍ମା, ଏସ୍ବିଆଇ, ଇଣ୍ଡସ୍ଇଣ୍ଡ ବ୍ୟାଙ୍କ, ରିଲାଏନ୍ସ ଇଣ୍ଡଷ୍ଟ୍ରିଜ କାରବାର ମଧ୍ୟ କ୍ଷତି ସହିଛି। ରିଲାଏନ୍ସ ଇଣ୍ଡଷ୍ଟ୍ରିଜର ଶେୟାର କାରବାର ୨.୧୬% ନିମ୍ନରେ ରହିଛି। ବିଏସ୍ଇର ମିଡ୍କ୍ୟାପ୍ ଏବଂ ସ୍ମଲକ୍ୟାପ ସୂଚକାଙ୍କ ୨.୨୮% ନିମ୍ନରେ ରହିଥିବା ଶେୟାର ବଜାର ଡାଟାରୁ ସାମ୍ନାକୁ ଆସିଛି।