ମୁମ୍ବାଇ: ଗତ ୪ ସେସନ ହେବ ଭାରତୀୟ ପୁଞ୍ଜିବଜାରରେ କାରବାର ପ୍ରଭାବିତ ହୋଇ ରହିଛି। ଫଳରେ ନିବେଶକଙ୍କ କ୍ଷତି ୮ ଲକ୍ଷ କୋଟି ଟଙ୍କାରେ ପହଞ୍ଚିଛି। ବୁଧବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନସେକ୍ସ ୯୩୭.୬୬ ପଏଣ୍ଟ (୧.୯୪%) ହ୍ରାସ ହୋଇ ୪୭,୪୦୯.୯୩ ପଏଣ୍ଟକୁ ଖସିଛି। ଗତ ୪ ସେସନରେ ସେନ୍ସେକ୍ସ ୨୩୮୨.୧୯ ପଏଣ୍ଟ (୪.୭୮%) ହ୍ରାସ ହୋଇଛି। ଫଳରେ ବିଏସ୍ଇ ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜୀକରଣ ୮.୦୭ ଲକ୍ଷ କୋଟି ଟଙ୍କା ଖସିବା ଯୋଗୁ ୧୮୯ ଲକ୍ଷ କୋଟି ଟଙ୍କାକୁ ହ୍ରାସ ହୋଇଛି।
ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୨୭୧.୪୦ ପଏଣ୍ଟ(୧.୯୧%) ହ୍ରାସ ହୋଇ ୧୩,୯୬୭.୫୦ ପଏଣ୍ଟରେ ବନ୍ଦ ହୋଇଛି। ଗତ ୪ ସେସନରେ ନିଫ୍ଟି ୬୭୭.୨୦ ପଏଣ୍ଟ ହ୍ରାସ ହୋଇଛି। ବଜେଟ ଆସିବା ଆଗରୁ ଗତ ୨ ସେସନରେ ଭାରତୀୟ ପୁଞ୍ଜିବଜାରରେ ଏଭଳି ଅସ୍ଥିରତା ଦେଖାଯାଇଛି। ବଜାର ଉପରେ ନିବେଶକମାନେ ଏବେ ତୀକ୍ଷ୍ଣ ନଜର ରଖିଛନ୍ତି। ବୁଧବାର କାରବାରରେ ସେନ୍ସେକ୍ସରେ ଆକ୍ସିସ ବ୍ୟାଙ୍କ, ଟାଇଟାନ, ଇଣ୍ଡସ୍ ଇଣ୍ଡ ବ୍ୟାଙ୍କ, ଡ.ରେଡିସ୍, ଏଚ୍ଡିଏଫ୍ସି ଏବଂ ଏସିଆନ ପେଣ୍ଟସର କାରବାର ବେଶି କ୍ଷତି ହୋଇଛି। ଏହି କମ୍ପାନୀଗୁଡିକର ଶେୟାର କାରବାର ୪% ହ୍ରାସ ପରିଲକ୍ଷିତ ହୋଇଛି। ସ୍ମଲ କ୍ୟାପ୍ ଏବଂ ମିଡ୍ କ୍ୟାପ୍ ସୂଚୀ ୧.୩୮% ନିମ୍ନରେ ରହିଛି। ସେହିଭଳି ବିଭିନ୍ନ ସେକ୍ଟର ସୂଚୀ କଥା ବିଚାରକୁ ନେଲେ ବ୍ୟାଙ୍କିଙ୍ଗ୍ ଷ୍ଟକ୍ ୨.୯୩% ହ୍ରାସ ହୋଇଛି। ଏହାବାଦ ଫାଇନାନ୍ସ ୨.୭୨%, ମେଟାଲ ୨.୫୪%, ରିୟଲ ଇଷ୍ଟେଟ ୨.୨୮% ଏବଂ ଅଟୋ ସେକ୍ଟର ୨.୧୧% ଖସିଛି। ସେନ୍ସେକ୍ସର ୨୪ଟି ଶେୟାର କାରବାର ନକାରାତ୍ମକ ରହିଛି। କେବଳ ୬ଟି ଶେୟାର ଭଲ କାରବାର ହାସଲ କରିଛି।
ସାଧାରଣ ବଜେଟ ଆସିବା ପୂର୍ବରୁ ନିବେଶକ ପ୍ରଫିଟ ବୁକିଂ କରୁଥିବା ଶେୟାର ବଜାର ବିଶେଷଜ୍ଞ କହିଛନ୍ତି। ସେହିଭଳି ବିଦେଶୀ ନିବେଶକମାନେ ୭୫୬.୩୦ କୋଟି ଟଙ୍କାର ଶେୟାର ସୋମବାର ବିକି ଦେଇଛନ୍ତି। ଏସିଆର ଅନ୍ୟ ଶେୟାର ବଜାରଗୁଡିକରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। ଓ୍ବାଲ୍ଷ୍ଟ୍ରିଟ୍ରେ ରେକର୍ଡ ନିମ୍ନ ସ୍ତରକୁ ଖସିବା ପରେ ନିବେଶକ ବର୍ତ୍ତମାନ ସତର୍କତା ଅବଲମ୍ବନ କରୁଛନ୍ତି।