ପୁରୀ ଅଫିସ,୨୪।୧୨: ଓଡ଼ିଆ ପାରମ୍ପରିକ ଖାଦ୍ୟର ପ୍ରଚାର ଓ ପ୍ରସାର ପାଇଁ ପୁରୀରେ ଖୋଲିଛି ‘ନିମନ୍ତ୍ରଣ’ ରେସ୍ତୋରାଁ। ସୁସ୍ବାଦୁ, ସ୍ବାସ୍ଥ୍ୟ ଅନୁକୂଳ ପରିବେଶରେ ଓଡ଼ିଆ ଖାଦ୍ୟ ସହ ଚାଇନିଜ ଖାଦ୍ୟ ମଧ୍ୟ ମେନ୍ୟୁରେ ସ୍ଥାନ ପାଇବ ବୋଲି ସୂଚନା ମିଳିଛି। ପରିବାର ଓ ଯୁବବର୍ଗଙ୍କ ସମେତ ବିଭିନ୍ନ ବର୍ଗର ଲୋକଙ୍କ ସହ ସୁସ୍ବାଦୁ ଖାଦ୍ୟ ଉପଲବ୍ଧ ହେବ। ସ୍ବତନ୍ତ୍ର ଆଧୁନିକ ଝଲକରେ ନିର୍ମିତ ନିମନ୍ତ୍ରଣର ଖାଇବା କୋଠରୀରେ ପର୍ଯ୍ୟଟକମାନେ ସମୁଦ୍ରକୂଳିଆ ପବନ ସହ ଉପର ମହଲାରେ ସମୁଦ୍ରକୁ ଦେଖିବାର ମଜା ନେଇପାରିବେ। ଆଗନ୍ତୁକମାନଙ୍କୁ ଆତିଥି୍ୟ ପ୍ରଦାନ ନିମନ୍ତେ ୩୨ଜଣ ପେଶାଦାରଙ୍କୁ ନିଯୁକ୍ତ କରାଯାଇଛି। ବ୍ଲୁଫ୍ଲାଗ୍ ବିଚ୍ ସନ୍ନିକଟ ଏହି ରେସ୍ତୋରାଁ ବ୍ଲୁଫ୍ଲାଗ୍ ବୁଲି ଆସୁଥିବା ପର୍ଯ୍ୟଟକଙ୍କ ପାଇଁ ମଧ୍ୟ ଉପଲବ୍ଧ ହେବ। ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର ଏହାକୁ ଉଦ୍ଘାଟନ କରିଛନ୍ତି। ସେ କହିଛନ୍ତି, ଓଡ଼ିଆ ରୁଚିପୂର୍ଣ୍ଣ ଖାଦ୍ୟର ପ୍ରଚାର ପ୍ରସାର ନିମନ୍ତେ ଓଡ଼ିଶା ଟୁରିଜମ୍ ଏବଂ ଓଟିଡିସିର ଏକ ମିଳିତ ପଦକ୍ଷେପ ହେଉଛି ନିମନ୍ତ୍ରଣ। ଏହା ପୁରୀ ବେଳାଭୂମିରେ ଏବେ ଲୋକାର୍ପିତ ହୋଇଛି। ଭୁବନେଶ୍ୱରରେ ଏହା ପ୍ରଥମେ ଲୋକାର୍ପିତ ହୋଇଥିବାବେଳେ ଉଭୟ ଗ୍ରାହକ ଓ ପର୍ଯ୍ୟଟକଙ୍କୁ ଆକର୍ଷଣ କରିବାରେ ସଫଳ ହୋଇପାରିଛି। ସେହିଭଳି ଜିଲାପାଳ ସମର୍ଥ ବର୍ମା କହିଛନ୍ତି, ପେଶାଦାର କର୍ମଚାରୀଙ୍କୁ ନେଇ ଓଡ଼ିଆ ଖାଦ୍ୟ ପରଷିବା ପାଇଁ ନିମନ୍ତ୍ରଣକୁ କାର୍ଯ୍ୟକ୍ଷମ କରାଯାଉଛି। ବେଳାଭୂମି ନିକଟରେ ହୋଇଥିବାରୁ ଏହା ଲୋକଙ୍କୁ ଆକର୍ଷଣ କରିବାରେ ସହାୟକ ହେବା ସହ ଆଦୃତ ହୋଇପାରିବ ବୋଲି ଆଶା ରହିଛି। ବାତ୍ୟା ସମୟରେ ଏହି ରେସ୍ତୋରାକୁ ରକ୍ଷା କରିବା ପାଇଁ ଅନେକ ପଦକ୍ଷେପ ନିଆଯାଇଥିଲା। ଲୋକାର୍ପଣ କାର୍ଯ୍ୟକ୍ରମରେ ପର୍ଯ୍ୟଟନ ନିର୍ଦ୍ଦେଶକ ସଚିନ ଆର୍. ଯାଦବ, ଜିଲା ପର୍ଯ୍ୟଟନ ଅଧିକାରୀ ସରୋଜ କୁମାର ପ୍ରଧାନ, ପାନ୍ଥନିବାସ ପରିଚାଳକ ଚନ୍ଦ୍ରକାନ୍ତ ନାୟକ ପ୍ରମୁଖ ଉପସ୍ଥିତ ଥିଲେ। ଅନ୍ୟପକ୍ଷରେ ପୁରୀ ସହରବାସୀ ନିମନ୍ତ୍ରଣକୁ ନେଇ ଉତ୍ସାହିତ ଅଛନ୍ତି। ସିଦ୍ଧାର୍ଥ କୁମାର ଜେନା କହିଛନ୍ତି, ଭୁବନେଶ୍ୱରରେ ନିମନ୍ତ୍ରଣରେ ଥରେ ଖାଇଛି। ଖାଦ୍ୟରମାନ ଭଲ ଥିଲା। ପୁରୀରେ ମଧ୍ୟ ସେହି ମାନର ଖାଦ୍ୟ ମିଳିବା ଆବଶ୍ୟକ।