ଲାହୋର,୨୮।୯: ପାକିସ୍ତାନର ପୂର୍ବତନ ଅଧିନାୟକ ଇଞ୍ଜାମାମ୍-ଉଲ-ହକ୍ ହୃଦଘାତର ଶିକାର ହୋଇ ଚିକିତ୍ସିତ ହେଉଛନ୍ତି। ସର୍ଜରୀ ପରେ ତାଙ୍କର ସ୍ବାସ୍ଥ୍ୟାବସ୍ଥା ସ୍ଥିର ରହିଥିଲେ ହେଁ ସେ ଡାକ୍ତରଙ୍କ ତତ୍ତ୍ୱାବଧାନରେ ଅଛନ୍ତି। ଏନେଇ ଜଣାପଡ଼ିବା ପରେ ଭାରତର ମହାନ କ୍ରିକେଟର ସଚିନ ତେନ୍ଦୁଲକର ତାଙ୍କର ଆରୋଗ୍ୟ ନେଇ କାମନା କରିଛନ୍ତି।
ଟୁଇଟ୍ କରି ସଚିନ କହିଛନ୍ତି, ଇଞ୍ଜାମାମଙ୍କ ଶୀଘ୍ର ସୁସ୍ଥ ହେବାର କାମନା କରୁଛି। ସବୁବେଳେ ପ୍ରତିଯୋଗିତାମୂଳକ ଏବଂ ପଡ଼ିଆରେ ଯୁକ୍ତିତର୍କ କରୁଥିଲେ ହେଁ ପଛରେ ଶାନ୍ତ ମନ ରହିଥିଲା। ଆଶା କରେ ଆପଣ ଏହି ପରିସ୍ଥିତି ସହ ଦୃଢ଼ ଭାବେ ମୁକାବିଲା କରି ବାହାରିବେ। ଶୀଘ୍ର ଆରୋଗ୍ୟ ଲାଭ କରନ୍ତୁ।
ପ୍ରକାଶ ଯେ, ଗତ ୩ ଦିନ ଧରି ଛାତିରେ ଯନ୍ତ୍ରଣା ଅନୁଭବ କରୁଥିଲେ ଇଞ୍ଜାମାମ। କିନ୍ତୁ ସୋମବାର ତାଙ୍କର ଯାଞ୍ଚ କରାଯାଇଥିଲା। ଏଥିରେ ତାଙ୍କୁ ହୃଦ୍ଘାତ ହୋଇଥିବା ଜଣାପଡ଼ିଥିଲା। ପରେ ତାଙ୍କୁ ଅସ୍ତ୍ରୋପଚାର ପାଇଁ ଲାହୋରର ଏକ ଡାକ୍ତରଖାନାକୁ ନିଆଯାଇଥିଲା। ସେଠାରେ ତାଙ୍କର ଆଞ୍ଜିଓପ୍ଲାଷ୍ଟି ସର୍ଜରୀ ହୋଇଥିଲା। ଏବେ ସେ ବିପଦମୁକ୍ତ ଥିବା କୁହାଯାଉଛି।