ଯୋଡ଼ା,୨୦ା୪(ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ଖଣି ମଣ୍ଡଳରେ ଲୁହାପଥର ମାନରେ ହେର୍ଫେର ନେଇ ହେଉଥିବା ଅଭିଯୋଗକୁ ରୋକିବା ପାଇଁ ରାଜ୍ୟ ସରକାର ଏକ ଉନ୍ନତ ଜ୍ଞାନକୌଶଳ ପ୍ରୟୋଗ କରିଛନ୍ତି। ଖଣି ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ ଗତ ଫେବୃୟାରୀ ୧୩ରେ ଇଣ୍ଟର୍ନେଟ ଅଫ୍ ଥିଙ୍ଗସ(ଆଇଓଟି) ଡିଭାଇସ୍ ଯୋଡ଼ା ଖଣି ଉପନିର୍ଦ୍ଦେଶାଳୟରେ ସ୍ଥାପନ କରାଯାଇଛି। ଏହି ଯନ୍ତ୍ର ଦ୍ୱାରା ଅତ୍ୟାଧୁନିକ ପ୍ରଯୁକ୍ତି ବିଦ୍ୟାର ପ୍ରୟୋଗ କରି ଖଣିଜ ମାନରେ ଚଞ୍ଚକତାକୁ ରୋକାଯାଇପାରିବ। ଖଣିରୁ ଖଣିଜ ନମୁନା ସଂଗ୍ରହ ବେଳେ ଜିଓ ରେଫରେନ୍ସ ଜରିଆରେ ଜିପିଏସ୍ ଟେକ୍ନୋଲୋଜି ମାଧ୍ୟମରେ ଖଣିଜ ଷ୍ଟାକ୍ର ର଼୍ୟାଣ୍ଡମ ଜେନେରେଶନ ସାମ୍ପଲିଂ ଲୋକେଶନ ପ୍ରଣାଳୀରେ ନମୁନା ସଂଗ୍ରହ କରି ଆଇଓଟି ଡିଭାଇସ୍ ଜରିଆରେ ମାନ ଯାଞ୍ଚ କରାଯିବ। ପରବର୍ତ୍ତୀ ସମୟରେ ଖଣିର ନାମକୁ ଗୋପନରେ ରଖି କେବଳ କ୍ୟୁଆର୍କୋଡ୍ ଜରିଆରେ ଖଣିଜର ମାନ ଜାଣି ହେବ। ଏଥିରେ ହେର୍ଫେର ବା ମାନରେ କୌଣସି ଅସାଧୁ ଉପାୟ ଅବଲମ୍ବନ କରିହେବ ନାହିଁ। ଏହି ଡିଭାଇସ୍ ଯୋଡ଼ା ଖଣି ମଣ୍ଡଳରେ ଚାଲୁଥିବା ୩୧ ଖଣିରେ ପ୍ରାଥମିକ ପର୍ଯ୍ୟାୟରେ କାର୍ଯ୍ୟ କରୁଛି। ପୂର୍ବରୁ କିଛି ଅସାଧୁ ଲିଜ୍ଧାରୀ ଗ୍ରେଡ୍ରେ ହେରଫେର କରି ରାଜସ୍ବ ଫାଙ୍କୁଥିଲେ। ଏପରି କି ଉଚ୍ଚମାନର ଲୁହା ପଥରକୁ ନିମ୍ନମାନର ଦର୍ଶାଇ କମ୍ ମୂଲ୍ୟରେ ରୟାଲ୍ଟି ଦିଆଯାଉଥିବାରୁ ରାଜ୍ୟ ସରକାର ବିପୁଳ ପରିମାଣରେ ରାଜସ୍ବ ହରାଉଥିବା ଅଭିଯୋଗ ହୋଇଆସୁଥିଲା। ଖଣି ବିଭାଗ ଏହାକୁ ରୋକିବା ପାଇଁ ଯୋଡ଼ାରେ ପ୍ରଥମ କରି ଏହି ପ୍ରଯୁକ୍ତି ବିଦ୍ୟା ସମ୍ମିଳିତ ଆଇଓଟି ଡିଭାଇସ୍ର ପାଇଲଟ ପ୍ରୋଜେକ୍ଟ ଆରମ୍ଭ କରିଛନ୍ତି।