ଭୁବନେଶ୍ୱର,୧୧।୧୦: ଗତ ବର୍ଷକ ମଧ୍ୟରେ ଭାରତୀୟ ଡାକ ବା ଇଣ୍ଡିଆନ ପୋଷ୍ଟ (ଆଇପି)ର ଇଣ୍ଡିଆ ପୋଷ୍ଟ ପେମେଣ୍ଟ୍ସ ବ୍ୟାଙ୍କ (ଆଇପିପିବି) ଓଡ଼ିଶାର ଲୋକ ଓ ଗ୍ରାହକଙ୍କର ଆଦର ଲାଭ କରିଛି। ବିଶେଷକରି ଉଭୟ ଘରୋଇ ଓ ରାଷ୍ଟ୍ରାୟତ୍ତ ବ୍ୟାଙ୍କ ଭଳି ଆଇପିପିବି ମଧ୍ୟ ସମସ୍ତ ପ୍ରକାରର ବ୍ୟାଙ୍କିଙ୍ଗ ସେବା ସୁବିଧା ତା’ର ଗ୍ରାହକମାନଙ୍କୁ ଯୋଗାଇ ଦେଉଛି ବୋଲି ବିଶ୍ୱ ଡାକ ଦିବସ ଏବଂ ଜାତୀୟ ଡାକ ସପ୍ତାହ ପରିପ୍ରେକ୍ଷୀରେ ଆୟୋଜିତ ଏକ ଖବରଦାତା ସମ୍ମିଳନୀରେ ଡିପିଏସ୍ ସୁବାସ ଚନ୍ଦ୍ର ବାରିକ ଏଭଳି କିଛି କହିଥିଲେ। ସେହିଭଳି ଆଗାମୀ ଦିନରେ ଭାରତୀୟ ଡାକ ଓ ଡାକ କର୍ମଚାରୀ ସବୁ ପ୍ରକାରର ଡାକ ବାବଦୀୟ ସେବା ସହ ଡାକ ବ୍ୟାଙ୍କ ସେବା ଯୋଗାଇବା ପାଇଁ ସବୁ ବର୍ଗର ଗ୍ରାହକଙ୍କ ଘରକୁ ଯିବେ ବୋଲି ବାରିକ ମତବ୍ୟକ୍ତ କରିଛନ୍ତି। ଏପରିକି ଭାରତୀୟ ଡାକର ଓଡ଼ିଶା ସର୍କଲରେ କାର୍ଯ୍ୟ କରୁଥିବା ମୋଟ ୮୪୯୦ ପୋଷ୍ଟ ଅଫିସ ସମେତ ୩୫ ପ୍ରଧାନ ଡାକଘର, ୩୫ ମୁଖ୍ୟ ଡାକଘର, ୧୧୪୨ ଉପ ଡାକଘର ଏବଂ ୭୨୭୮ ଶାଖା ଡାକଘର ଜରିଆରେ ରାଜ୍ୟବାସୀଙ୍କୁ ଡାକ ବାବଦୀୟ ସମସ୍ତ ସେବା ଯୋଗାଇ ଦେଉଛି। ସେହିପରି ୧୫ ଏଲଡବ୍ଲ୍ୟୁଇ ଜିଲାରେ ୧୨ ପ୍ରଧାନ ଡାକଘର,୩୭୩ ମୁଖ୍ୟ ଡାକଘର ଏବଂ ୨୮୧୫ ଶାଖା ଡାକଘର ରହିଛି। ବିଶେଷକରି ଆଇପିର ଫ୍ଲାଗସିପ କାର୍ଯ୍ୟକ୍ରମ ଅଧୀନ ଏଲଡବ୍ଲ୍ୟୁଇ ଜିଲାରେ ୩୧୨ ଶାଖା ଡାକଘର ଖୋଲାଯାଇଛି। ସେହିପରି କେନ୍ଦ୍ର ସରକାରଙ୍କ ୨୦୪୭ ଭିଜନ ଅନୁଯାୟୀ ଆଗାମୀ ଦିନରେ ଅନେକ ପଦକ୍ଷେପ ସାଙ୍ଗକୁ ସେବା ଓ ସାମାଜିକ କାର୍ଯ୍ୟ ମଧ୍ୟ ରାଜ୍ୟର ବିଭିନ୍ନ କ୍ଷେତ୍ରରେ ଆୟୋଜିତ ହେବ।
