ଗୁଆହାଟୀ,୨୫।୪: ନିର୍ବାଚନୀ ରଣନୀତିକାର ପ୍ରଶାନ୍ତ କିଶୋର କଂଗ୍ରେସରେ ଯୋଗଦେବା ଲାଗି କଥାବାର୍ତ୍ତା ଚାଲିଥିବାବେଳେ ସେପଟେ ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର୍)ଙ୍କ ଦଳ ତେଲଙ୍ଗାନା ରାଷ୍ଟ୍ର ସମିତି (ଟିଆର୍ଏସ୍) ସହ ତାଙ୍କ ରାଜନୈତିକ ପରାମର୍ଶଦାତା ଟିମ୍ ଆଇପିଏସି (ଇଣ୍ଡିଆନ ପଲିଟିକାଲ ଆକ୍ସନ କମିଟି) ଚୁକ୍ତି ସ୍ବାକ୍ଷର କରିଛି। ୨୦୨୩ ତେଲଙ୍ଗାନା ବିଧାନସଭା ନିର୍ବାଚନରେ ଟିଆର୍ଏସ୍କୁ ଜିତାଇବା ଲାଗି ଆଇପିଏସି କାର୍ଯ୍ୟ କରିବ। ତେବେ ପ୍ରଶାନ୍ତ କିଶୋର ରଣନୀତି ପ୍ରସ୍ତୁତିରେ ସାମିଲ ହୋଇ ନ ପାରନ୍ତି। ସେ ନିର୍ବାଚନୀ ରଣନୀତିକାର ଭାବେ ଆଉ କାର୍ଯ୍ୟ କରିବେ ନାହିଁ ବୋଲି କିଛିଦିନ ପୂର୍ବରୁ ଘୋଷଣା କରିଥିଲେ।
ଦେଶର ସର୍ବପୁରାତନ ଦଳ କଂଗ୍ରେସକୁ ସୁଦୃଢ଼ କରାଇବା ଲାଗି ପ୍ରଶାନ୍ତ କିଶୋର କାର୍ଯ୍ୟଯୋଜନା ପ୍ରଦାନ କରିଛନ୍ତି। ସେ ଖୁବ୍ଶୀଘ୍ର ଦଳରେ ସାମିଲ ହେବା ନେଇ ସୂଚନା ମିଳିଛି। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଏନେଇ ଦଳର ବରିଷ୍ଠ ନେତାମାନଙ୍କ ସହ ଆଲୋଚନା ଚଳାଇଛନ୍ତି। ମେ’ ୨ ସୁଦ୍ଧା ନିଷ୍ପତ୍ତି ଜଣାଇବା ଲାଗି ପ୍ରଶାନ୍ତ କିଶୋର କଂଗ୍ରେସକୁ ସମୟ ଦେଇଥିବା ଜଣାପଡ଼ିଛି। ବିଭିନ୍ନ ରାଜ୍ୟରେ କଂଗ୍ରେସ ସହ ସିଧାସଳଖ ପ୍ରତିଦ୍ୱନ୍ଦ୍ୱିତା କରୁଥିତ୍ବା ଦଳଗୁଡ଼ିକୁ ପ୍ରଶାନ୍ତ କିଶୋର ରାଜନୈତିକ ପରାମର୍ଶ ଦେଉଥିଲେ। ସେଥିପାଇଁ କଂଗ୍ରେସରେ ତାଙ୍କର ଯୋଗଦାନକୁ କେତେଜଣ ବରିଷ୍ଠ ନେତା ବିରୋଧ କରୁଥିତ୍ବା ଜଣାପଡ଼ିଛି।