ଦୁବାଇ,୧୫।୯: ମହେନ୍ଦ୍ର ସିଂ ଧୋନୀଙ୍କ ମ୍ୟାଚ ଜିତିବାର କୌଶଳ ଶିଖିବାକୁ ଚାହୁଁଛନ୍ତି ଦକ୍ଷିଣ ଆଫ୍ରିକାର ଡେଭିଡ ମିଲର। ଚାପର ସମ୍ମୁଖୀନ ହୋଇଥିଲେ ମଧ୍ୟ ଧୋନୀ ଶାନ୍ତ ରହିବାର ଗୁଣକୁ ସେ ପ୍ରତ୍ୟେକ ମ୍ୟାଚ୍ରେ ବ୍ୟବହାର କରିବାକୁ ଚାହୁଁଛନ୍ତି। ମିଲର କହିଛନ୍ତି, ଧୋନୀ ଯେପରି ଖେଳନ୍ତି, ମୁଁ ତାଙ୍କ ଉପରେ ନଜର ରଖିଥାଏ। ଚାପ ମୁହୂର୍ତ୍ତରେ ମଧ୍ୟ ସେ ଶାନ୍ତ ରୁହନ୍ତି। ମୁଁ ମଧ୍ୟ ସେହିଭଳି ପଡ଼ିଆରେ ରହିବାକୁ ଚାହୁଁଛି। ଟାର୍ଗେଟ ପିଛା ବେଳେ ମୁଁ ତାଙ୍କ ଭଳି ଫିନିସର୍ ହେବାକୁ ଚେଷ୍ଟା କରିବି। ଧୋନୀ ବିଶ୍ୱର ସର୍ବଶ୍ରେଷ୍ଠ ଫିନିସର। ତାଙ୍କ ବ୍ୟାଟିଂ ଦେଖିବାକୁ ବହୁତ ପସନ୍ଦ କରେ ବୋଲି ସେ କହିଛନ୍ତି। ସେପ୍ଟେମ୍ବର ୧୯ରୁ ଭାରତୀୟ ପ୍ରିମିୟର ଲିଗରେ ମିଲର ରାଜସ୍ଥାନ ରୟାଲ୍ସ ପାଇଁ ଖେଳିବେ। ସେ ପୂର୍ବରୁ କିଙ୍ଗସ ଏକାଦଶ ପଞ୍ଜାବ ଦଳରେ ୮ ବର୍ଷ ଖେଳିଥିଲେ।