ୟୁଏଇରେ ଚାଲିଥିବା ଆଇପିଏଲର ୧୩ତମ ସିଜନରେ ଗୁରୁବାର ପର୍ଯ୍ୟନ୍ତ ୨୨ଟି ମ୍ୟାଚ ଖେଳାଯାଇଛି। ସମସ୍ତ ଦଳ ଅତି କମରେ ୫ଟି ମ୍ୟାଚ ଖେଳିଛନ୍ତି। ଏଥିରେ ମୁମ୍ବାଇ ଇଣ୍ଡିଆନ୍ସ ପଏଣ୍ଟ ଟେବୁଲର ଶୀର୍ଷରେ ଥିବାବେଳେ କିଙ୍ଗସ ଏକାଦଶ ପଞ୍ଜାବ ଦଳ ୬ଟି ମ୍ୟାଚ ମଧ୍ୟରୁ ୫ଟିରେ ପରାଜୟ ପରେ ଶେଷ ସ୍ଥାନରେ ରହିଛି। ପଞ୍ଜାବ ଲଗାତାର ୪ଟି ମ୍ୟାଚ ହାରିଛି ଏବଂ ବର୍ତ୍ତମାନ ପ୍ଲେ ଅଫରେ ପହଞ୍ଚିବା ଦଳ ପାଇଁ କଷ୍ଟକର ହୋଇପଡିଛି। ପଞ୍ଜାବର ଏହି ପରାଜୟ ପଛରେ ସବୁଠାରୁ ବଡ କାରଣ ହେଉଛି ତାରକା ଖେଳାଳିଙ୍କ ବିଫଳତା। ଅଷ୍ଟ୍ରେଲୀୟ ଅଲରାଉଣ୍ଡର ଗ୍ଲେନ ମ୍ୟାକ୍ସୱେଲ ଏଥିରେ ସାମିଲ ଅଛନ୍ତି। ସେ ଚଳିତ ବର୍ଷର ଆଇପିଏଲରେ ଦ୍ୱିତୀୟ ମହଙ୍ଗା ଖେଳାଳି। ତାଙ୍କୁ ଦଳ ୧୦.୭୫ କୋଟି ଟଙ୍କାରେ କିଣିଥିଲା। କିନ୍ତୁ ସେ ଉଭୟ ବ୍ୟାଟ ଏବଂ ବଲ ସହିତ ଫ୍ଲପ କରିଛନ୍ତି। ପରିସଂଖ୍ୟାନ ଦୃଷ୍ଟିରୁ ମ୍ୟାକ୍ସୱେଲ ଏପର୍ଯ୍ୟନ୍ତ ୬ଟି ମ୍ୟାଚ ଖେଳି ମାତ୍ର ୪୮ ରନ ସଂଗ୍ରହ କରିଛନ୍ତି। ୧୩ରନ ହେଉଛି ତାଙ୍କର ସର୍ବାଧିକ ସ୍କୋର। ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା ମ୍ୟାକ୍ସୱେଲ ଆଭରେଜ୍ ୧୨ ଥିବାବେଳେ ତାଙ୍କର ଷ୍ଟ୍ରାଇକ ରେଟ୍ ୮୬ ରହିଛି। ସେ ଏପର୍ଯ୍ୟନ୍ତ ଟୁର୍ନାମେଣ୍ଟରେ ମାତ୍ର ୪ଟି ଚୌକା ମାରିଛନ୍ତି। ବୋଲିଂ ବିଷୟରେ କହିବାକୁ ଗଲେ ସେ ୬ଟି ମ୍ୟାଚ୍ରେ ୪କେବଳ ଗୋଟିଏ ଉଇକେଟ ନେଇଛନ୍ତି।
