ଚଳିତବର୍ଷ ମିଷ୍ଟର ଆଇପିଏଲଙ୍କୁ ମିସ୍ କରୁଛନ୍ତି ଦର୍ଶକ। ଆଇପିଏଲର କିଙ୍ଗ କୁହାଯାଉଥିବା ସୁରେଶ ରାଇନା ବ୍ୟକ୍ତିଗତ କାରଣ ଦର୍ଶାଇ ଆଇପିଏଲ ଆରମ୍ଭ ପୂର୍ବରୁ ଭାରତ ଫେରିଥିଲେ। ରାଇନା ଫେରିବା ଦିନଠାରୁ ପୁଣି ସେ ଦଳକୁ ଫେରିବା ନେଇ ଏକ ଆଲୋଚନା ଚାଲିଥିଲା। ସେ ଯେକୌଣସି ସମୟରେ ଫେରି ପାରିବେ ବୋଲି ନିଜେ ସୁରେଶ ରାଇନା କହିଥିଲେ। ତେବେ ବର୍ତ୍ତମାନ ସେ ଦଳକୁ ଫେରିବା ଆଶା ମଉଳୁଛି। ଚେନ୍ନାଇ ସୁପର କିଙ୍ଗ୍ସ(ସିଏସ୍କେ)ର ୱେବସାଇଟରୁ ସୁରେଶ ରାଇନାଙ୍କ ନାମ ହଟାଇ ଦିଆଯାଇଛି। ୱେବସାଇଟରେ ସମସ୍ତ ଖେଳାଳିଙ୍କ ନାମ ଅଛି, କିନ୍ତୁ ରାଇନାଙ୍କ ନାମ ସେଠାରେ ନାହିଁ। ଏଥିରୁ ସ୍ପଷ୍ଟ ହୋଇଛି ଯେ ରାଇନା ଆଉ ଦଳକୁ ଫେରିବାର ସମ୍ଭାବନା ନାହିଁ। ଚେନ୍ନାଇର କ୍ରମାଗତ ଦ୍ୱିତୀୟ ପରାଜୟ ପରେ ସୋସିଆଲ ମିଡିଆରେ ପ୍ରଶଂସକମାନେ ରାଇନାଙ୍କ ପ୍ରତ୍ୟାବର୍ତ୍ତନ ଦାବି କରିଥିଲେ। ଏହାପୂର୍ବରୁ, ରାଇନା ଟୁଇଟରରେ ସିଏସ୍କକୁ ଅନଫଲୋ କରିଦେଇଥିଲେ। ରାଇନା ଏକ ଟୁଇଟ କରିଛନ୍ତି ଯେଉଁଠାରେ ତାଙ୍କୁ ବୈଷ୍ଣୋ ଦେବୀଙ୍କଠାରେ ଦେଖିବାକୁ ମିଳିଛି। ଗତ କିଛି ଦିନ ହେବ ରାଇନା କଶ୍ମୀରରେ କ୍ରିକେଟ୍ ତାଲିମ ଦେଉଥିବାର ନଜର ଆସିଛନ୍ତି।