ମୁମ୍ବାଇ, ୨୦।୪: ଆଇପିଏଲରେ ୨୦୨୧ରେ ପ୍ରଥମ ମ୍ୟାଚ୍ ହାରିବା ପରେ ଚେନ୍ନାଇ ସୁପର କିଙ୍ଗସ (ସିଏସ୍କେ) ପୁଣି ଟ୍ରାକ୍କୁ ଫେରିଛି। ଦିଲ୍ଲୀ କ୍ୟାପିଟାଲ୍ସ ବିପକ୍ଷ ପ୍ରଥମ ମ୍ୟାଚରେ ଦଳ ହାରିବା ପରେ ଦଳ କ୍ରମାଗତ ଦୁଇଟି ମ୍ୟାଚ ଜିତି ନିଜର ଶକ୍ତି ପ୍ରଦର୍ଶନ କରିଛି। ଚେନ୍ନାଇ ରାଜସ୍ଥାନ ରୟାଲ୍ସକୁ ତୃତୀୟ ମ୍ୟାଚରେ ୪୫ ରନରେ ପରାସ୍ତ କରିଥିବାବେଳେ ଦଳ ପଏଣ୍ଟ ଟେବୁଲରେ ଦୁଇ ନମ୍ବର ସ୍ଥାନରେ ପହଞ୍ଚିଛି।
ଚେନ୍ନାଇ ସୁପରକିଙ୍ଗସ ପ୍ରଥମ ଖେଳି ୯ ଉଇକେଟ ହରାଇ ୧୮୮ ସ୍କୋର କରିଥିଲା। ତେବେ କୌଣସି ବ୍ୟାଟ୍ସମ୍ୟାନ ଅର୍ଦ୍ଧଶତକୀୟ ଇନିଂସ ଖେଳି ପାରି ନ ଥିଲେ। ଏହାର ଜବାବରେ ରାଜସ୍ଥାନ ରୟାଲ୍ସ ସ୍କୋର ୧୧ ଓଭରରେ ୨ ଉଇକେଟ ୮୭ ରନ କରିଥିଲା। କିନ୍ତୁ ପରବର୍ତ୍ତୀ ୨୧ ବଲରେ ଦଳ ମାତ୍ର ୮ ରନ ସଂଗ୍ରହ କରି ୫ଟି ଉଇକେଟ ହରାଇଥିଲା। ଏହିପରି ୧୪.୩ ଓଭରରେ ୭ ଉଇକେଟରେ ସ୍କୋର ୯୫ ହୋଇଯାଇଥିଲା। ଏଠାରୁ ହିଁ ରାଜସ୍ଥାନ ଦଳ ମ୍ୟାଚ ହାରିଥିଲା। ବାମହାତୀ ସ୍ପିନର ରବିନ୍ଦ୍ର ଜାଡେଜା ଦ୍ୱାଦଶ ଓଭରରେ ଜସ ବଟଲର ଏବଂ ଶିବମ ଦୁବେଙ୍କ ଗୁରୁତ୍ୱପୂର୍ଣ୍ଣ ଉଇକେଟ ନେଇଥିଲେ। ବଟଲର ୪୯ ରନ ସଂଗ୍ରହ କରିଥିଲେ। ଏହା ପରେ ମୋଇନ ଅଲ୍ଲୀ ୧୩ତମ ଓଭରରେ ଗୋଟିଏ ଉଇକେଟ ଏବଂ ୧୫ ଓଭରରେ ଦୁଇଟ ଉଇକେଟ ନେଇ ରାଜସ୍ଥାନକୁ ବ୍ୟାକଫୁଟରେ ଠେଲି ଦେଇଥିଲେ। ରାଜସ୍ଥାନର ୬ ବ୍ୟାଟ୍ସମ୍ୟାନ ଦୁଇ ଅଙ୍କରେ ପହଞ୍ଚି ପାରି ନ ଥିଲେ।