ନୂଆଦିଲ୍ଲୀ,୨୩।୪: ଇଣ୍ଡିଆନ ପ୍ରିମିୟର ଲିଗ ୨୦୨୧ରେ ସମସ୍ତ ଦଳ ଏପର୍ଯ୍ୟନ୍ତ ୩ କିମ୍ବା ୪ଟି ମ୍ୟାଚ ଖେଳିଛନ୍ତି। ଏହି ସମୟରେ, ବାୟୋ ବବୁଲ ଭୟ ହେତୁ କିଛି ଖେଳାଳି ଟୁର୍ନାମେଣ୍ଟ ଛାଡୁଛନ୍ତି ଏବଂ କିଛି ଖେଳାଳି ଆହତ ହୋଇଛନ୍ତି। ଏହି ପର୍ଯ୍ୟାୟରେ, ଆଇପିଏଲର ୧୪ତମ ସିଜିନରୁ ଆହତ କାରଣରୁ ସନରାଇଜର୍ସ ହାଇଦ୍ରାବାଦର ଷ୍ଟାର ବୋଲର ଟି ନଟରାଜନଙ୍କୁ ମଧ୍ୟ ବାଦ ଦିଆଯାଇଛି। ବାମହାତୀ ଦ୍ରୁତ ବୋଲର ଅଷ୍ଟ୍ରେଲିଆ ଗସ୍ତ ସମୟରେ ଆଣ୍ଠୁରେ ଆଘାତ ପାଇଥିଲେ। କିନ୍ତୁ ସୁସ୍ଥ ହୋଇ ଆଇପିଏଲ୍ ଖେଳୁଥିଲେ। ତାଙ୍କ ଆଘାତ ପୁଣି ଥରେ ବାହାରିଛି। ତେବେ ଫ୍ରାଞ୍ଚାଇଜ ଏପର୍ଯ୍ୟନ୍ତ ତାଙ୍କ ବଦଳ ସମ୍ପର୍କରେ କୌଣସି ନିଷ୍ପତ୍ତି ନେଇ ନାହିଁ।
ନଟରାଜନ ବର୍ତ୍ତମାନ ପର୍ଯ୍ୟନ୍ତ ଆଇପିଏଲ ୨୦୨୧ରେ କେବଳ ଦୁଇଟି ମ୍ୟାଚ ଖେଳିଛନ୍ତି। ସେବେଠାରୁ ସେ ତାଙ୍କ ଆଘାତ ସହ ସଂଘର୍ଷ କରିଆସୁଥିଲେ। କୋଲକାତା ନାଇଟ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବିପକ୍ଷ ମ୍ୟାଚ୍ରେ ନଟରାଜନ ଖେଳିଥିଲେ, କିନ୍ତୁ ଏହା ପରେ ଦୁଇଟି ମ୍ୟାଚ୍ରେ ତାଙ୍କ ସ୍ଥାନରେ ଖଲିଲ ଅହମ୍ମଦ ସନରାଇଜର୍ସ ହାଇଦ୍ରାବାଦର ଏକାଦଶ ଖେଳିବାରେ ସ୍ଥାନ ପାଇଥିଲେ। ଗୁରୁବାର ସିଜିନର ପ୍ରଥମ ବିଜୟ ପରେ ସନରାଇଜର୍ସ ଅଧିନାୟକ ଡେଭିଡ ୱାର୍ନର କହିଛନ୍ତି ଯେ ନଟରାଜଙ୍କ ଆଣ୍ଠୁରେ ସମସ୍ୟା ରହିଛି, ତାଙ୍କର ସ୍କାନ କରାଯିବ। କିନ୍ତୁ ଏଥିପାଇଁ ତାଙ୍କୁ ବାୟୋ ବବୁଲ ଏବଂ ତା’ପରେ ୭ ଦିନିଆ କ୍ୱାରାଣ୍ଟାଇନ୍ରେ ରହିବାକୁ ପଡିବ।