ମୁମ୍ବାଇ,୨୮।୩: ଆଇପିଏଲ୍ ୨୦୨୨ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଦଳର ପୁରୁଣା ଅଭ୍ୟାସ ବଦଳି ନାହିଁ। ରବିବାର ପଞ୍ଜାବ କିଙ୍ଗସ ବିପକ୍ଷରେ ୨୦୫ ରନ ସ୍କୋର କରିବା ସତ୍ତ୍ୱେ ଦଳ ମ୍ୟାଚ ହାରିଛି। ଓଡିନ ସ୍ମିଥ ମାତ୍ର ୮ଟି ବଲରେ ଅପରାଜିତ ୨୫ ରନ କରି ପଞ୍ଜାବ କିଙ୍ଗସକୁ ପାଞ୍ଚ ଉଇକେଟ ବିଜୟ ଆଣିଦେଇଥିଲେ। କିନ୍ତୁ ଏହି ମ୍ୟାଚରେ ଆରସିବିର ଜଣେ ଖେଳାଳି ହିରୋରୁ ଜିରୋ ପାଲଟିଯାଇଛନ୍ତି, ଯାହାଙ୍କୁ ନେଇ ସୋସିଆଲ ମିଡିଆରେ ଚର୍ଚ୍ଚା ହେଉଛି।
ଏହି ମ୍ୟାଚ୍ ଆରସିବିର ଯୁବ ଖେଳାଳି ଅନୁଜ ରାୱତ ହିରୋରୁ ଜିରୋ ସାଜିଥିଲେ। ଆଇପିଏଲରେ ଏହା ତାଙ୍କର ପ୍ରଥମ ମ୍ୟାଚ ଥିଲା। ପଞ୍ଜାବ କିଙ୍ଗ୍ସର ଇନିଂସର ୧୫ତମ ଓଭରରେ ଆକାଶ ଦୀପ ବୋଲିଂ କରିଥିଲେ। ଓଭରର ପ୍ରଥମ ୪ ବଲରୁ ୧୧ରନ ସ୍କୋର ହୋଇଥିଲା। ଲିଆମ ଲିଭିଙ୍ଗଷ୍ଟୋନ ପଞ୍ଚମ ବଲରେ କଭରରେ ଏକ ସଟ ଖେଳିଥିଲେ। ଅନୁଜ ଏକ ଚମତ୍କାର କ୍ୟାଚ ନେଇଥିଲେ। ତାଙ୍କ କ୍ୟାଚ୍ ଦେଖି ସମସ୍ତେ ତାଙ୍କୁ ପ୍ରଶଂସା କରିଥିଲେ। କିନ୍ତୁ ମାତ୍ର ୧୨ ବଲ୍ ପରେ ସେ ହିରୋରୁ ଜିରୋ ପାଲଟିଥିଲେ।
ଏହି ମ୍ୟାଚର ଟର୍ନିଂ ପଏଣ୍ଟ ପଞ୍ଜାବ ଇନିଂସର ୧୭ତମ ଓଭର ଥିଲା। ୧୭ତମ ଓଭରର ଚତୁର୍ଥ ବଲରେ ଅନୁଜ ରାୱତ କଭରରେ ଓଡିନ ସ୍ମିଥଙ୍କ ଏକ ସରଳ କ୍ୟାଚ ଛାଡିଥିଲେ। ଓଡିନ ସ୍ମିଥ ସେହି ସମୟରେ ଏକ ରନ୍ରେ ବ୍ୟାଟିଂ କରୁଥିଲେ। କ୍ୟାଚ ଡ୍ରପ ହେବା ମାତ୍ରେ, ସ୍ମିଥ ୧୮ତମ ଓଭରରେ ୩ଟି ଛକା ଏବଂ ଗୋଟିଏ ଚୌକା ସହ ୨୫ ରନ କରିଥିଲେ। ଏହି ଓଭରରେ ଆରସିବି ହାତରୁ ମ୍ୟାଚ୍ ଛଡାଇ ନେଇଥିଲା ପଞ୍ଜାବ।