ମୁମ୍ବାଇ,୨୩।୫:ଆଇପିଏଲ ପ୍ଲେ ଅଫ ମ୍ୟାଚ ପାଇଁ ପରିଚାଳନା ପରିଷଦ ପକ୍ଷରୁ ନୂତନ ନିୟମ ବିଷୟରେ ପ୍ରକାଶ କରାଯାଇଛି। କ୍ୱାଲିଫାୟର୍-୧, ଏଲିମିନେଟର ଏବଂ କ୍ୱାଲିଫାୟର୍-୨ରେ ଯଦି ବର୍ଷା ଯୋଗୁ ମ୍ୟାଚ ବାଧାପ୍ରାପ୍ତ ହୁଏ ଏବଂ ମ୍ୟାଚ ନିୟମିତ ସମୟରେ ସମାପ୍ତ ନ ହୁଏ, ତେବେ ଏକ ସୁପର ଓଭର ହେବ। ଏଥି ସହିତ ଫାଇନାଲ୍ ମ୍ୟାଚ ପାଇଁ ଏକ ରିଜର୍ଭ ଦିନ ରଖାଯାଇଛି। ଯଦି ବର୍ଷା କିମ୍ବା ଅନ୍ୟ କୌଣସି କାରଣରୁ ଫାଇନାଲ ମ୍ୟାଚ ସମାପ୍ତ ନ ହୁଏ, ତେବେ ପରଦିନ ମ୍ୟାଚ ଖେଳାଯିବ।
ଯଦି କ୍ୱାଲିଫାୟର-୧, ଏଲିମିନେଟର ଏବଂ କ୍ୱାଲିଫାୟର-୨ରେ ଗୋଟିଏ ଓଭର ଖେଳା ନ ଯାଏ, ତେବେ ପଏଣ୍ଟ ଟେବୁଲ ଆଧାରରେ ବିଜେତା ସ୍ଥିର ହେବ। ପଏଣ୍ଟ ଟେବୁଲରେ ଅଗ୍ରଣୀ ଦଳ ବିଜେତା ଘୋଷିତ ହେବ। ଏହି ତିନୋଟି ମ୍ୟାଚ ପାଇଁ କୌଣସି ରିଜର୍ଭ ଦିନ ନାହିଁ। ଫାଇନାଲ ମ୍ୟାଚ ମେ ୨୯ର ଅନୁଷ୍ଠିତ ହେବ। ତେଣୁ, ମେ ୩୦କୁ ରିଜର୍ଭ ଦିନ ଭାବରେ ରଖାଯାଇଛି। ଟାଇଟଲ ମ୍ୟାଚ ରାତି ୮ଟାରୁ ଖେଳାଯିବ।
କୋଲକାତା ଏବଂ ଅହମ୍ମଦାବାଦରେ ଆଇପିଏଲ ପ୍ଲେ ଅଫ ମ୍ୟାଚ ଖେଳାଯିବ। ମେ ୨୪ରେ କୋଲକାତାରେ କ୍ୱାଲିଫାୟର୍-୧ ଏବଂ ମେ ୨୫ରେ ଏଲିମିନେଟର ମ୍ୟାଚ ଖେଳାଯିବ। କୋଲକତାରେ ବର୍ଷା ହେବାର ସମ୍ଭାବନା ଅଛି।
ଆଇପିଏଲ ନିୟମ ଅନୁଯାୟୀ, ପ୍ଲେ ଅଫ ମ୍ୟାଚ୍ରେ ଆବଶ୍ୟକ ହେଲେ ଗୋଟିଏ ମ୍ୟାଚରେ ଓଭର ସଂଖ୍ୟା ସର୍ବନିମ୍ନ ପାଞ୍ଚ ଓଭରକୁ ହ୍ରାସ କରାଯାଇପାରେ। ଯଦି ଏହି ପାଞ୍ଚ ଓଭରରେ ଖେଳ ସମାପ୍ତ ନ ହୁଏ, ତେବେ ଏକ ସୁପର ଓଭର ହେବ। ଏପରିକି ସେଠାରେ ବି ଯଦି ଫଳାଫଳ ନ ମିଳେ, ତେବେ ପଏଣ୍ଟ ଟେବୁଲରେ ଭଲ ସ୍ଥାନ ପାଇଥିବା ଦଳକୁ ବିଜେତା ଘୋଷିତ କରାଯିବ।