ନୂଆଦିଲ୍ଲୀ,୧୦।୧: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସୋମବାର ଅହମ୍ମଦାବାଦର ନୂଆ ଆଇପିଏଲ ଫ୍ରାଞ୍ଚାଇଜକୁ ଲେଟର ଅଫ୍ ଇଣ୍ଟେଣ୍ଟ (ଉଦ୍ଦେଶ୍ୟ ପତ୍ର) ହସ୍ତାନ୍ତର କରିଛି। ବୋର୍ଡ ସହ ଆଇନଗତ ଲଢ଼େଇ ଚାଲିଥିବା ବେଳେ ଅହମ୍ମଦାବାଦ ଫ୍ରାଞ୍ଚାଇଜ ତା’ର ଟିମ୍ ମ୍ୟାନେଜମେଣ୍ଟ ଗଠନ ପ୍ରକ୍ରିୟା ଆରମ୍ଭ କରିଛି। ଏହି ଫ୍ରାଞ୍ଚାଇଜ ପୂର୍ବତନ ଭାରତୀୟ ପେସର ଆଶିଷ ନେହେରାଙ୍କୁ ମୁଖ୍ୟ କୋଚ୍ ନିଯୁକ୍ତ କରିବାକୁ ପ୍ରସ୍ତୁତି ଚଳାଇଛି। ମିଳିଥିବା ସୂଚନା ମୁତାବକ, ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳର ଅଧିନାୟକ ଭାର ଦେଇପାରେ।
ହାର୍ଦ୍ଦିକଙ୍କ ବ୍ୟତୀତ ଆଫଗାନିସ୍ତାନ ଅଲରାଉଣ୍ଡର ରଶିଦ ଖାନଙ୍କ ସହ ଚୁକ୍ତି କରିବାକୁ ଉଦ୍ୟମ କରୁଛି ଅହମ୍ମଦାବାଦ ଫ୍ରାଞ୍ଚାଇଜ୍। ରଶିଦଙ୍କୁ ଦଳରେ ନେବା ପାଇଁ ଅହମ୍ମଦାବାଦ ଭଳି ଲକ୍ଷ୍ନୌ ଫ୍ରାଞ୍ଚାଇଜ ମଧ୍ୟ ଇଚ୍ଛୁକ। ଏହାବାଦ୍ ଇଶାନ କିଷନଙ୍କୁ ଦଳର ଉଇକେଟକିପର ଭାବେ ପ୍ରାଥମିକତା ଦିଆଯାଉଥିବା ସୂତ୍ରରୁ କୁହାଯାଇଛି।
ଆଗାମୀ ଆଇପିଏଲରେ ସାମିଲ ହେବାକୁ ଥିବା ଦୁଇ ଫ୍ରାଞ୍ଚାଇଜକୁ ମେଗା ଅକ୍ଶନ ପୂର୍ବରୁ ୩ ଖେଳାଳି(ଦୁଇ ଭାରତୀୟ ଓ ଜଣେ ବିଦେଶୀ)ଙ୍କ ନାମ ବାଛିବାକୁ କୁହାଯାଇଛି। ମେଗା ଅକ୍ଶନ ଫେବୃୟାରୀ ୧୧ ଓ ୧୨ ତାରିଖରେ ବେଙ୍ଗାଲୁରୁଠାରେ ହେବାର ଅଛି। ଦେଶରେ କୋଭିଡ୍ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାରୁ କାର୍ଯ୍ୟସୂଚୀରେ ପରିବର୍ତ୍ତନ ହୋଇପାରେ।
ଲୋକେଶ ରାହୁଲ ଲକ୍ଷ୍ନୌ ଦଳର ଅଧିନାୟକ ହେବା ପ୍ରାୟତଃ ନିଶ୍ଚିତ। ସଞ୍ଜୀବ ଗୋଏଙ୍କାଙ୍କ ମାଲିକାନାରେ ଥିବା ଫ୍ରାଞ୍ଚାଇଜ ବିଦେଶୀ ଖେଳାଳି ଭାବେ ରଶିଦଙ୍କୁ ଦଳରେ ରଖିବାକୁ ଚାହୁଁଛି। ଯଦି ସେମାନେ ଏଥିରେ ବିଫଳ ହୁଅନ୍ତି, ତେବେ ଅଷ୍ଟ୍ରେଲିଆନ ଅଲରାଉଣ୍ଡର ମାର୍କସ ଷ୍ଟୋଇନିସ ଓ ଦକ୍ଷିଣ ଆଫ୍ରିକାର କାଗିସୋ ରବାଡାଙ୍କୁ ବ୍ୟାକଅପ୍ ବିଦେଶୀ ଖେଳାଳି ଭାବେ ରଖାଯାଇଛି।