ଦୁବାଇ,୨୪।୧୧:ଆଇପିଏଲ୍ର ସବୁଠାରୁ ସଫଳ ବୋଲର୍ ଯୁଜବେନ୍ଦ୍ର ଚହଲଙ୍କୁ ମେଗା ଅକ୍ସନରେ ରାଜସ୍ଥାନ ରୟାଲ୍ସ ରିଟେନ୍ କରି ନ ଥିଲା। ଏମିତିରେ ସେ ମେଗା ଅକ୍ସନକୁ ଫେରିଥିଲେ। ରବିବାର କରାଯାଉଥିବା ଅକ୍ସନରେ ତାଙ୍କ ପାଇଁ ଏକାଧିକ ଟିମ୍ ନିଲାମ ଡାକିଥିଲେ। ସେ ବେସ୍ ପ୍ରାଇସ୍ ୨ କୋଟି ଟଙ୍କା ରଖିଥିଲେ। ହେଲେ ତାଙ୍କୁ ୯ ଗୁଣ ଅଧିକ ଟଙ୍କା ଦେଇ ପଞ୍ଜାବ କିଙ୍ଗ୍ସ ନିଜ ଟିମ୍ରେ ସାମିଲ କରିଛି।
ମୁମ୍ବାଇ ଇଣ୍ଡିଆନ୍ସରୁ ନିଜ ଖେଳ ଆରମ୍ଭ କରିଥିଲେ ଚହଲ। ଏହାପରେ ସେ ୨୦୧୪ରେ ଆର୍ସିବିରେ ସାମିଲ ହୋଇଥିଲେ। ୨୦୨୨ ମେଗା ଅକ୍ସନରେ ତାଙ୍କୁ ରାଜସ୍ଥାନ ଟିମ୍ କିଣିଥିଲା। ୩୪ ବର୍ଷୀୟ ଚହଲ ଆଇପିଏଲ୍ ଇତିହାସରେ ସବୁଠାରୁ ଅଧିକ ୨୦୫ ଉଇକେଟ ନେଇଥିବା ବୋଲର୍। ସେ ୨୦୧୪ ପରଠାରୁ ପ୍ରତି ସିଜନରେ ଅତି କମ୍ରେ ୧୨ ଉଇକେଟ ହାସଲ କରିଛନ୍ତି। ୫ ସିଜନରେ ସେ ୨୦ରୁ ଅଧିକ ଉଇକେଟ ନେଇଛନ୍ତି। ୨୦୨୨ରେ ସେ ୨୭ ଉଇକେଟ ସହ ପର୍ପଲ କ୍ୟାପ୍ ଜିତିଥିଲେ।