ବ୍ରହ୍ମପୁର ଅଫିସ ,୨୬।୨ : ଗଞ୍ଜାମ ଜିଲାରେ ଆଇପିଏଲ ବେଟିଂ ପାଇଁ ୟୁଜର ଆଇଡି ଓ ପାସୱାର୍ଡ ଦେଇ କେତେକ ବୁକିଂ ଜରିଆରେ କାରବାର ଚଳାଇଥିବା ମୁଖିଆଙ୍କୁ ବ୍ରହ୍ମପୁର ପୋଲିସ ଗୁରୁବାର କୋଲକାତାରୁ ଗିରଫ କରିଥିଲା। ଅଭିଯୁକ୍ତ ଜଣଙ୍କ ହେଲେ ଦିନେଶ ରାଠୀ (୪୬) । ସ୍ଥାନୀୟ ଏସିଏମ୍ଏମ୍ କୋର୍ଟରେ ହାଜର କରି ପୋଲିସ ଶୁକ୍ରବାର ବ୍ରହ୍ମପୁର ଆଣିଥିଲା ବୋଲି ଆୟୋଜିତ ଏକ ଖବରଦାତା ସମ୍ମିଳନୀରେ ବ୍ରହ୍ମପୁର ଏସ୍ପି ପିନାକ ମିଶ୍ର ସୂଚନା ଦେଇଛନ୍ତି ।
ଦିନେଶ ହେଉଛନ୍ତି ଆଇପିଏଲ ବେଟିଂର ସିଣ୍ଡିକେଟ ମୁଖିଆ। ଦିନେଶଙ୍କ ବିଭିନ୍ନ ଆକାଉଣ୍ଟରେ ଥିବା ୭୨ଲକ୍ଷ ୯୬ ହଜାର ଟଙ୍କା ସିଜ କରାଯାଇଥିବା ଏସ୍ପି କହିଛନ୍ତି । ଶୁକ୍ରବାର ଦିନେଶଙ୍କୁ ଏସ୍ଡିଜେଏମ୍ କୋର୍ଟରେ ହାଜର କରାଯିବ । ଏଥିସହ ୩ଦିନିଆ ରିମାଣ୍ଡରେ ପୋଲିସ ନେବା ପାଇଁ ଏସଡ଼ିଜେଏମ ନିକଟରେ ଆବେଦନ କରାଯିବ ବୋଲି ଜଣାପଡ଼ିଛି। ଗତ ଆଇପିଏଲ ସିଜନ ଆରମ୍ଭରୁ ପୋଲିସ ବ୍ରହ୍ମପୁରରେ ଏହି ବେଟିଂ ଚଳାଉଥିବା ରାକେଟ ଉପରେ ପୋଲିସ ନଜର ରଖିଥିଲା । ଗତ ଅକ୍ଟୋବର ୨୯ ତାରିଖରେ ବୁକି ବ୍ରହ୍ମପୁରର ଆର. ଲଲୀ ଆଚାରୀ ଓ କେ . ପ୍ରଶାନ୍ତ କୁମାର ସୁବୁଦ୍ଧିଙ୍କୁ ପୋଲିସ ଗିରଫ କରିଥିଲା। ସେମାନଙ୍କ ନିକଟରୁ ୩୩ ଲକ୍ଷ ୬୧ ହଜାର ୨୦୦ ଟଙ୍କା, ମୋବାଇଲ ଫୋନ, ସିମ୍ କାର୍ଡ ଓ ଲ୍ୟାପ୍ଟପ ଜବତ କରାଯାଇଥିଲା । ପରେ ପର୍ଯ୍ୟାୟକ୍ରମେ ଅନ୍ୟ ୪ ଜଣଙ୍କୁ ପୋଲିସ ଗିରଫ କରିଥିଲା । ହେଲେ ଏହି ଆଇପିଏଲ ବେଟିଂ ରାକେଟର ସିଣ୍ଡିକେଟ ମୁଖିଆ ଦିନେଶଙ୍କୁ ଧରିବା ପାଇଁ ପ୍ରଥମେ ଲାଲୀ ଆଚାରୀ ଠାରୁ ଜବତ ମୋବାଇଲ ଟ୍ରାକିଂରୁ ସୁରାକ ମିଳିଥିଲା । ଏହାକୁ ଆଧାର କରି ଦିନେଶଙ୍କୁ ଧରିବା ପାଇଁ ପୋଲିସକୁ ୫ମାସ ଲାଗିଯାଇଥିଲା ବୋଲି ଏସ୍ପି କହିଛନ୍ତି । ତଦନ୍ତ ଏବେ ଜାରି ରହିଛି ବୋଲି ମଧ୍ୟ ସେ କହିଛନ୍ତି।