ମୁମ୍ବାଇ,୧୫।୧: ଚଳିତ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟରେ ୩୭ ବଲରେ ବିସ୍ଫୋରକ ଶତକ ହାସଲ କରିଥିବା କେରଳ ଓପନର ମହମ୍ମଦ ଆଝାରୁଦ୍ଦିନ ବେଶ୍ କିଛି ଦିନ ହେଲା ଚର୍ଚ୍ଚାରେ କେନ୍ଦ୍ର ବିନ୍ଦୁ ପାଲଟିଛନ୍ତି। ଏହି ୨୬ ବର୍ଷୀୟ ବ୍ୟାଟ୍ସମ୍ୟାନ ନିଜ କ୍ରିକେଟ କ୍ୟାରିୟରରେ କିଛି ଲକ୍ଷ୍ୟ ତାଲିକା (ବକେଟ୍ ଲିଷ୍ଟ) ରଖିଛନ୍ତି, ଯାହାକି ସୋସିଆଲ ମିଡିଆରେ ଭାଇରାଲ ହୋଇଯାଇଛି। ପୂର୍ବତନ ଭାରତୀୟ ଅଧିନାୟକ ମହମ୍ମଦ ଆଝାରୁଦ୍ଦିନଙ୍କ ନାମ ଓ ନିଜ ବିସ୍ଫୋରକ ବ୍ୟାଟିଂ ଯୋଗୁ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା କେରଳର ଏହି ବ୍ୟାଟ୍ସମ୍ୟାନ ପ୍ରଥମେ ବିଶ୍ୱର ବ୍ୟୟବହୁଳ ଆଇପିଏଲରେ ଖେଳିବାକୁ ଟାର୍ଗେଟ ରଖିଛନ୍ତି। ତାଙ୍କର ଦ୍ୱିତୀୟ ଇଚ୍ଛା ହେଉଛି ଗୋଟିଏ ରଣଜୀ ସିଜନରେ ୪ଟି ଶତକ ହାସଲ କରିବା। ଏହାପରେ ପରିବାର ପାଇଁ ଘର ଏବଂ ନିଜ ପାଇଁ ଫେଭରାଇଟ୍ କାର ମର୍ସିଡିଜ ବେଞ୍ଜ କିଣିବାକୁ ଲକ୍ଷ୍ୟ ରଖିଛନ୍ତି। ଦେଶରେ ହେବାକୁ ଖେଳାଯିବାକୁ ଥିବା ୨୦୨୩ ବିଶ୍ୱକପ୍ରେ ଭାରତ ପକ୍ଷରୁ ପ୍ରତିନିଧିତ୍ୱ କରିବାକୁ ଇଚ୍ଛା ରଖିଛନ୍ତି ଆଝାରୁଦ୍ଦିନ।
ଉଲ୍ଲେଖଥାଉ କି, ଚଳିତ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟର ଏକ ମ୍ୟାଚ୍ରେ ମୁମ୍ବାଇ ପକ୍ଷରୁ ଧାର୍ଯ୍ୟ ୧୯୭ ରନ୍ର ଟାର୍ଗେଟକୁ କେରଳ ମାତ୍ର ୧୬ ଓଭରରେ ହିଁ ହାସଲ କରି ନେଇଥିଲା। ବିଜୟୀ ଦଳ ଲାଗି ୫୪ ବଲରେ ୧୩୭ ରନ୍ର ଅପରାଜିତ ବିସ୍ଫୋରକ ଇନିଂସ ଖେଳିଥିଲେ ଆଝାରୁଦ୍ଦିନ। ତାଙ୍କ ଇନିଂସରେ ସାମିଲ ଥିଲା ୧୦ ଛକା ଓ ୯ ଚୌକା। ସେ ୩୭ତମ ବଲରେ ଶତକ ପୂରଣ କରିଥିଲେ, ଯାହାକି ଟୁର୍ନାମେଣ୍ଟର ଦ୍ୱିତୀୟ ଦ୍ରୁତତମ ଶତକ।
