ନୂଆଦିଲ୍ଲୀ, ୪ା୧୦ (ପି.ଟି.)-ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଚାଲିଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଖେଳୁଥିବା ଜଣେ କ୍ରିକେଟରଙ୍କୁ ଦୁର୍ନୀତି କାର୍ଯ୍ୟରେ ଲିପ୍ତ ହେବା ଲାଗି ପ୍ରଲୋଭିତ କରାଯାଇଥିବା ଅଭିଯୋଗ ହୋଇଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଦୁର୍ନୀତି ନିବାରଣ ୟୁନିଟ୍ (ଏସିୟୁ) ଏହା ଉପରେ ନଜର ରଖିଥିବାବେଳେ ତଦନ୍ତ କାର୍ଯ୍ୟ ଆରମ୍ଭ କରିଛି। ଆଇପିଏଲ୍ର ୧୩ତମ ସଂସ୍କରଣ ୟୁଏଇରେ ଜୈବ-ସୁରକ୍ଷିତ ପରିବେଶ ମଧ୍ୟରେ ଅନୁଷ୍ଠିତ ହେଉଛି। ଏପରିସ୍ଥଳରେ ଜଣେ ଖେଳାଳିଙ୍କୁ ସିଧାସଳଖ ଆପ୍ରୋଚ୍ କରିବା ସହଜ ନୁହେଁ। କେବଳ ଅନ୍ଲାଇନ୍ ନେଟଓ୍ବର୍କ ଦ୍ୱାରା ସମ୍ଭବ ହୋଇପାରେ। ବିସିସିଆଇ ଏସିୟୁ ମୁଖ୍ୟ ଅଜିତ୍ ସିଂ ଅଭିଯୋଗ ସମ୍ପର୍କରେ ସ୍ପଷ୍ଟ କରିଛନ୍ତି। ଦୁର୍ନୀତିରେ ଲିପ୍ତ ହେବା ଲାଗି ଆପ୍ରୋଚ କରିଥିବା ବ୍ୟକ୍ତିଙ୍କୁ ଟ୍ରାକିଂ କରାଯାଉଛି। ତାଙ୍କର କି ସ୍ବାର୍ଥ ରହିଛି ତାହା ଯାଞ୍ଚ କରାଯାଉଛି। ଦୁର୍ନୀତି ନିବାରଣ ପ୍ରୋଟୋକଲ ଅନୁସାରେ ଗୋପନୀୟତା ଦୃଷ୍ଟିରୁ ବର୍ତ୍ତମାନ ଖେଳାଳି (ଭାରତୀୟ ଅବା ବିଦେଶୀ) ଅବା ଫ୍ରାଞ୍ଚାଇଜ୍ ନାମ ପ୍ରକାଶ କରାଯାଇ ନାହିଁ। ଖେଳାଳି ଓ ସପୋର୍ଟ ଷ୍ଟାଫ୍ମାନେ ବାୟୋ-ବବଲ ପରିବେଶରେ ଅବସ୍ଥାନ କରୁଛନ୍ତି। ତେଣୁ ଯଥା ସମ୍ଭବ ଅନ୍ଲାଇନରେ ଦୁର୍ନୀତି ଆପ୍ରୋଚ୍ ସମ୍ଭାବନା ଥିବାରୁ ଏସିୟୁ ତାହା ଉପରେ ନଜର ରଖିଛି। ଅଧିକାଂଶ ବିଶେଷ କରି ଯୁବ ଖେଳାଳିମାନେ ଇନ୍ଷ୍ଟାଗ୍ରାମ୍ ଓ ଟ୍ବିଟର ଭଳି ସୋସିଆଲ ମିଡିଆ ପ୍ଲାଟଫର୍ମ ବ୍ୟହାର କରୁଛନ୍ତି। ଅଜ୍ଞାତ ବ୍ୟକ୍ତିଙ୍କ ପ୍ରଲୋଭନର ହେବାର ଆଶଙ୍କା ରହିଛି। ଯେଉଁ ଖେଳାଳିଙ୍କୁ ଆପ୍ରୋଚ୍ କରାଯାଇଥିଲା ସେ ତୁରନ୍ତ ଏ ବିଷୟରେ ଏସିୟୁକୁ ଅବଗତ କରିଛନ୍ତି। ବିସିସିଆଇର ଜଣେ ବରିଷ୍ଠ କର୍ମକର୍ତ୍ତା ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଟୁର୍ନାମେଣ୍ଟ ପୂର୍ବରୁ ପ୍ରତ୍ୟେକ ଖେଳାଳି ଏପରିକି ୧୯ବର୍ଷରୁ କମ୍ ଖେଳାଳିଙ୍କୁ ଦୁର୍ନୀନି ନିବାରଣ ପ୍ରୋଟୋକଲ୍ ସମ୍ପର୍କରେ ସଚେତନ କରାଯାଇଛି। ସିଂଙ୍କ ନେତୃତ୍ୱରେ ଏକ ୮ ଜଣିଆ ଦଳ ୟୁଏଇରେ ଡେରା ପକାଇଛନ୍ତି। ବିସିସିଆଇ ୟୁକେର ସ୍ପୋର୍ଟରାଡାର ନାମକ ଏକ କମ୍ପାନୀ ସହ ଚୁକ୍ତି କରିଛି। ଏହା ଫ୍ରଡ୍ ଡିଟେକ୍ସନ ସର୍ଭିସ ଯୋଗାଇଦେବ। ଆଇପିଏଲ୍ ବେଳେ ବେଟିଂ ଓ ଅନ୍ୟାନ୍ୟ ଦୁର୍ନୀତି କାର୍ଯ୍ୟ ରୋକିବା କ୍ଷେତ୍ରରେ ଏହା ସହାୟତା କରିବ।