ଦୁବାଇ, ୨୨ା୮ (ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ପାଇଁ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ପହଞ୍ଚତ୍ବା ପରେ ଖେଳାଳିମାନଙ୍କୁ ୬ଦିନ ପର୍ଯ୍ୟନ୍ତ ହୋଟେଲ ରୁମ୍ରେ ସୀମିତ ରହିବାକୁ ପଡ଼ିବ। ପ୍ରଥମ ଦିବସରେ ଖେଳାଳିମାନେ ଟ୍ରେନରଙ୍କ ଫିଟ୍ନେସ୍ ପ୍ଲାନ୍ କାର୍ଯ୍ୟକାରୀ କରିବା ପରେ ବାଲ୍କୋନୀରେ ପରସ୍ପର ସହିତ କଥାବାର୍ତ୍ତା ହୋଇଥିଲେ। ରାଜସ୍ଥାନ ରୟାଲ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ଖେଳାଳିମାନେ ଗୁରୁବାର ଦୁବାଇରେ ପହଞ୍ଚତ୍ଥିବାବେଳେ କୋଲକାତା ନାଇଟ୍ ରାଇଡର୍ସ ରାତିରେ ଆବୁଧାବିରେ ଓହ୍ଲାଇଥିଲା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସଓପି) ଅନୁସାରେ ରୟାଲ୍ସ ଦଳ ପ୍ରଥମ ଦିବସରେ ବିମାନ ବନ୍ଦରଠାରେ କୋଭିଡ୍-୧୯ ଟେଷ୍ଟ କରିଛି। କିଙ୍ଗ୍ସ ଇଲେଭେନ ପଞ୍ଜାବ ଖେଳାଳିମାନଙ୍କର ଶୁକ୍ରବାର ଆଉ ଥରେ ଟେଷ୍ଟ ହୋଇଛି। ବିସିସିଆଇର ଏସ୍ଓପି ୧ମ, ୩ୟ ଓ ୬ଷ୍ଠ ଦିବସରେ ଟେଷ୍ଟିଂ ପରେ ଯାଇ ଟିମ୍ଗୁଡ଼ିକ ସେମାନଙ୍କ ଟ୍ରେନିଂ ଆରମ୍ଭ କରିପାରିବେ। ଆଇପିଏଲ୍ ସେପ୍ଟେମ୍ବର ୧୯ରୁ ଆରମ୍ଭ ହେବ। ୬ଦିନ ଆଇସୋଲେଶନ ପରିୟଡ୍ରେ ରୁମ୍ ବାହାରକୁ ଆସିବା ବାରଣଥିବାରୁ ଖେଳାଳିମାନେ ପରସ୍ପର ସହିତ କଥା ହେବା ଲାଗି ସେମାନଙ୍କ ପାଇଁ ଉଦ୍ଦିଷ୍ଟ ବାଲ୍କୋନୀର ପୂରା ଉପଯୋଗ କରିବେ। କିନ୍ତୁ ସେମାନଙ୍କୁ ସମସ୍ତ ସୋସିଆଲ ଡିଷ୍ଟାନ୍ସ ଗାଇଡ୍ଲାଇନ୍ ମାନି ଚଳିବାକୁ ହେବ। ରୟାଲ୍ସ ଦଳ ଏହାର ଆଉଟ୍ଡୋର୍ ଏରିଆ ଚିହ୍ନଟ କରିଛି। ତେବେ ପାଖ ରୁମ୍ରେ ରହିଥିବା ସାଥୀ ଖେଳାଳି ଯଦି ବାହାରକୁ ବାହାରିଥିବେ ଜଣେ ଖେଳାଳି ଏହାକୁ ବ୍ୟବହାର କରିପାରିବ ନାହିଁ। ଆଉଟ୍ଡୋର ଏରିଆକୁ ଖେଳାଳିମାନେ ପାଳି କରି ବ୍ୟବହାର କରିପାରିବେ। କିଙ୍ଗ୍ସ ଇଲେଭେନ ଖେଳାଳିମାନେ ବାଲ୍କୋନୀର ସହାୟତା ନେଇ ସେମାନଙ୍କ ନିକଟ ପଡୋଶୀଙ୍କ ସହିତ କଥାବାର୍ତ୍ତା ହୋଇ ପାରିବେ। ଦୁବାଇରେ ତାଙ୍କ ପ୍ରଥମ ସକାଳ ଶୀର୍ଷକ ଏକ ଭିଡିଓ ସୋସିଆଲ ମିଡିଆରେ ପୋଷ୍ଟ କରିଛନ୍ତି ରୟାଲ୍ସ ପେସ୍ ବୋଲର ଜୟଦେବ ଉନାଡ୍କଟ୍। ଫିଟ୍ନେସ୍ ପାଇଁ ନିଜରୁମ୍ରେ ଏୟାର ସାଇକେଲ ସହିତ ଏବଂ ଆଉଟଡୋର୍ ଏରିଆରେ ତାଙ୍କ ଯୋଗ ସେସନର ଦୃଶ୍ୟ ଏଥିରେ ଦେଖିବାକୁ ମିଳିଛି।