ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ତୃତୀୟ ମ୍ୟାଚ୍ରେ ଇଅନ ମୋର୍ଗାନଙ୍କ ନେତୃତ୍ୱାଧୀନ କୋଲକାତା ନାଇଟ ରାଇଡର୍ସ ୧୦ ରନରେ ଡେଭିଡ ଓ୍ବାର୍ନରଙ୍କ ସନରାଇଜର୍ସ ହାଇଦ୍ରାବାଦକୁ ପରାସ୍ତ କରି ବିଜୟରୁ ଅଭିଯାନ ଆରମ୍ଭ କରିଛି। ସ୍ଥାନୀୟ ଓ୍ବାଙ୍ଖଡେ ଷ୍ଟାଡିୟମରେ ରବିବାର ଅନୁଷ୍ଠିତ ଏହି ମୁକାବିଲା ଅନୁଷ୍ଠିତ ହୋଇଥିଲା। ପ୍ରଥମ ବ୍ୟାଟିଂକରି କୋଲକାତା ୨୦ ଓଭରରେ ୬ ଉଇକେଟ ହରାଇ ୧୮୭ ରନ୍ କରିଥିଲା। ଜବାବରେ ହାଇଦ୍ରାବାଦ ୫ ଉଇକେଟ ହରାଇ ୧୭୭ ରନରେ ସୀମିତ ରହିବା ସହ ବିଜୟଠାରୁ ୧୧ ରନ୍ ଦୂରରେ ରହିଯାଇଥିଲା। ତେବେ କୋଲକାତାର ନୀତିଶ ରାଣା ୫୬ ବଲରେ ୮୦ ରନ୍ କରିଥିଲେ। ହେଲେ ସେ ମାତ୍ର ୩୭ ବଲରେ ଅର୍ଦ୍ଧଶତକ ହାସଲ କରିପାରିଥିଲେ। ଏହି ବିଜୟ ପରେ ସେ ନିଜର ହାତର ମୁଦିକୁ ଦେଖାଇଥିଲେ। ଏହି ମୁଦିକୁ ସ୍ତ୍ରୀ ସାଞ୍ଚି ମାରଓ୍ବା ତାଙ୍କୁ ଉପହାର ରୂପେ ଦେଇଥିଲେ। ତାଙ୍କର ଏହି ଷ୍ଟାଇଲକୁ ଦେଖିଲେ ମନେ ହେଉଥିଲା ଯେପରି ରାଣା ତାଙ୍କର ଏହି ଖେଳକୁ ସ୍ତ୍ରୀ ସାଞ୍ଚିଙ୍କୁ ଡେଡିକେଟ କରିଥିଲେ।
ରାଣା ଏବଂ ସାଞ୍ଚି ୨୦୧୯ରେ ବିବାହ କରିଥିଲେ। ବିବାହ ପୂର୍ବରୁ ପ୍ରାୟ ସାଢ଼େ ୩ ବର୍ଷ ସେମାନେ ପରସ୍ପରକୁ ଡେଟ୍ କରିଥିଲେ। ଏକ ଫୁଟବଲ ପଡ଼ିଆରେ ଉଭୟଙ୍କର ପ୍ରଥମ ସାକ୍ଷାତ ହୋଇଥିଲା। କାରଣ ଉଭୟଙ୍କ ଭାଇ ଏକତ୍ର କ୍ରିକେଟ ଖେଳୁଥିଲେ ବୋଲି ଏକ ଶୋ’ରେ ରାଣା କହିଥିଲେ। ରାଣା କ୍ରିକେଟ ସାଙ୍ଗକୁ ଫୁଟବଳ ଶୌଖୀନ ମଧ୍ୟ। ତେବେ ଏହାରି ମଧ୍ୟରେ ଉଭୟଙ୍କ ମଧ୍ୟରେ ସମ୍ପର୍କ ବଢ଼ିଲା ଏବଂ ଶେଷରେ ବିବାହ ପାଇଁ ନିଷ୍ପତ୍ତି ନେଲେ। ସାଞ୍ଚି ହେଉଛନ୍ତି କମେଡି କଳାକାର କୃ୍ଷ୍ଣା ଅଭିଷେକଙ୍କ ସମ୍ପର୍କୀୟ।