ତେହରାନ,୨୭। ୯: ଇରାନରେ ହିଜାବ ବିରୋଧରେ ହିଂସା କ୍ରମାଗତ ଭାବେ ବୃଦ୍ଧି ପାଉଛି। ଏସବୁ ମଧ୍ୟରେ ଇରାନର ସୁରକ୍ଷା ବାହିନୀ ଅତ୍ୟାଚାରର ଆଉ ଏକ ଉଦାହରଣ ସାମ୍ନାକୁ ଆସିଛି। ଏଠାରେ ୨୦ ବଷର୍ର୍ୀୟା ଯୁବତୀ ହଦିସ ନଜାଫିଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଛି। ହଦିସ ହିଜାବ ବିରୋଧୀ ହିଂସାର ନେତୃତ୍ୱ ନେଉଥିଲେ। ଏହି ସମୟରେ ସୁରକ୍ଷାବାହିନୀ ପକ୍ଷରୁ ତାଙ୍କ ଉପରକୁ ୬ଟି ଗୁଳି ଚଳାଯାଇଥିଲା। ଏଥିରେ ତାଙ୍କ ମୃତ୍ୟୁ ଘଟିଛି। ଟିକ୍ଟକ୍ ଏବଂ ଇନଷ୍ଟାଗ୍ରାମରେ ହଦିସ ନଜାଫି ବହୁତ ଲୋକପ୍ରିୟ ଚେହେରା ଥିଲେ।
ଇରାନରେ ଗତ ୧୦ ଦିନ ମଧ୍ୟରେ ହିଜାବ ବିରୋଧୀ ପ୍ରଦର୍ଶନରେ ଅତି କମରେ ୭୬ ଜଣ ପ୍ରାଣ ହରାଇଥିବାବେଳେ ୭୦୦ରୁ ଅଧିକ ଲୋକଙ୍କୁ ଗିରଫ କରାଯାଇଛି କିନ୍ତୁ ବିରୋଧର ନିଆଁ ଦିନକୁ ଦିନ ବଢିବାରେ ଲାଗିଛି। ହିଜାବକୁ ନେଇ ମହସା ଆମିନୀଙ୍କ ମୃତ୍ୟୁ ପରେ ଇରାନରେ ସୃଷ୍ଟି ହୋଇଥିବା ଝଡ ଶାନ୍ତ ହେବାର ନାମ ନେଉନାହିଁ ଏବଂ ଏହାର ନିଆଁ ବର୍ତ୍ତମାନ ଆରବ ଦେଶରେ ବ୍ୟାପିବାରେ ଲାଗିଛି। ଅନେକ ଦେଶର ମହିଳା ହିଜାବ ବିରୋଧରେ ସ୍ବର ଉତ୍ତୋଳନ ଆରମ୍ଭ କରି ଦେଇଛନ୍ତି। ଇରାକ ସମେତ ଅନେକ ଦେଶର ମହିଳା ସୋସିଆଲ ମିଡିଆରେ ଇରାନୀୟ ମହିଳାଙ୍କୁ ସମର୍ଥନ କରି ଲେଖୁଛନ୍ତି। ଇରାନ ବାହାରେ ଲଣ୍ଡନ ଏବଂ ପ୍ୟାରିସ ପରି ୟୁରୋପୀୟ ସହରରେ ହିଜାବ ବିରୋଧୀ ଆନ୍ଦୋଳନ ମଧ୍ୟ ଚାଲିଛି। କାନାଡାର କେତେକ ସ୍ଥାନରେ ମଧ୍ୟ ଆନ୍ଦୋଳନ ଚାଲିଛି।
