ନୂଆଦିଲ୍ଲୀ: ରେଳଯାତ୍ରୀଙ୍କୁ ଆଶ୍ୱସ୍ତି। ଆସନ୍ତା ମାସରୁ ଇଣ୍ଡିଆନ ରେଲଓ୍ବେ କ୍ୟାଟରିଂ ଆଣ୍ଡ ଟୁରିଜମ କର୍ପୋରେଶନ(ଆଇଆର୍ସିଟିସି)ର ଇ-କ୍ୟାଟରିଂ ସେବା ପୁଣି ଥରେ କାର୍ଯ୍ୟକ୍ଷମ ହେବ। ଏ ନେଇ ସଂସ୍ଥା ପକ୍ଷରୁ ଶୁକ୍ରବାର ସ୍ପଷ୍ଟ କରାଯାଇଛି। କରୋନା ଜନିତ ଲକ୍ଡାଉନ ପାଇଁ ଏହି ସେବାକୁ ଗତ ବର୍ଷ ମାର୍ଚ୍ଚ ୨୨ରୁ ବନ୍ଦ କରାଯାଇଥିଲା। ଭାରତୀୟ ରେଳପଥର ଆଇଆର୍ସିଟିସି ଏକ ସଂସ୍ଥା। ବର୍ତ୍ତମାନ ଚାଲୁଥିବା ସ୍ବତନ୍ତ୍ର ଟ୍ରେନ୍ଗୁଡିକରେ ଏଭଳି ସୁବିଧା ଉପଲବ୍ଧ ହେବ। ଏହି ସେବାକୁ ରେଲଓ୍ବେ ୨୦୧୪ରେ ଆରମ୍ଭ କରିଥିଲା। ଏହାଦ୍ୱାରା ଲୋକମାନେ ଟ୍ରେନ୍ ଯାତ୍ରା ସମୟରେ ଫୋନ କିମ୍ବା ଅନ୍ଲାଇନରେ ଖାଦ୍ୟ ଅର୍ଡର କରିବାକୁ ସକ୍ଷମ ହେଉଥିଲେ। ରେଳ ଷ୍ଟେଶନଗୁଡିକରେ ଲୋକଙ୍କୁ ଖାଦ୍ୟ ଡେଲିଭରି ମିଳିଯାଉଥିଲା। କୋଭିଡ୍ ପୂର୍ବରୁ ଆଇଆର୍ସିଟିସି ଦୈନିକ ୨୦ ହଜାର ଇ-କ୍ୟାଟରିଂ ଅର୍ଡର ଲାଭ କରୁଥିଲା। ବର୍ତ୍ତମାନ ପୁଣି ଥରେ ରେଳ ସେବା ସ୍ବାଭାବିକ ହେଉଥିବାରୁ ଇ-କ୍ୟାଟରିଂ ସେବାକୁ ପର୍ଯ୍ୟାୟ ଭିତ୍ତିରେ କାର୍ଯ୍ୟକାରୀ କରିବା ଲାଗି ନିଷ୍ପତ୍ତି ହୋଇଛି।