ଦବଲିନ,୧୩।୭: ବିଶ୍ୱ କ୍ରିକେଟରେ ଫିଲ୍ଡିଂ ପାଇଁ ଜଣାଯାଉଥିବା ଦକ୍ଷିଣ ଆଫ୍ରିକା ମିସ୍ ଫିଲ୍ଡିଂ କାରଣରୁ ଦୁର୍ବଳ ଆୟର୍ଲାଣ୍ଡଠାରୁ ପରାଜିତ ହୋଇଛି। ଏଠାରେ ଖେଳାଯାଇଥିବା ଦ୍ୱିତୀୟ ଦିନିକିଆରେ ଘରୋଇ ଦଳକୁ ୪୩ ରନ୍ରେ ହରାଇ ଇତିହାସ ରଚିଛି ଆୟର୍ଲାଣ୍ଡ। ଦକ୍ଷିଣ ଆଫ୍ରିକା ବିରୋଧରେ ଏହା ଆଲର଼୍ୟାଣ୍ଡର ପ୍ରଥମ ବିଜୟ। ପରାଜୟ ପରେ ଦକ୍ଷିଣ ଆଫ୍ରିକା ଅଧିନାୟକ ତେମ୍ବା ବାଭୁମା ସ୍ବୀକାର କରିଛନ୍ତି, ଆମ ଫିଲ୍ଡିଂ ପାଇଁ ଗର୍ବ କରୁ। କିନ୍ତୁ ଚାପରେ ଆମେ ୪ଟି କ୍ୟାଚ୍ ହାତଛଡ଼ା କରିଥିଲୁ। କେବଳ ଫିଲ୍ଡିଂ ନୁହେଁ, କୌଣସି ବିଭାଗରେ ଭଲ ପ୍ରଦର୍ଶନ କରିପାରିଲୁ ନାହିଁ।
ଆମନ୍ତ୍ରଣ ପ୍ରଥମେ ବ୍ୟାଟିଂ କରିଥିବା ଆୟର୍ଲାଣ୍ଡ ୫୦ ଓଭରରେ ୫ ଉଇକେଟ ହରାଇ ୨୯୦ ରନ୍ କରିଥିଲା। ଦଳ ପାଇଁ ଶତକୀୟ ପାଳି ଖେଳିଥିଲେ ଅଧିନାୟକ ଆଣ୍ଡି ବଲବିର୍ନି (୧୦୨ ରନ୍, ୧୦ ଚୌକା ଓ ୨ ଛକା)। ତାଙ୍କୁ ଭରପୂର ସହଯୋଗ ଦେଇଥିଲେ ହାରି ଟେକ୍ଟର (୭୯ ରନ୍, ୬ ଚୌକା ଓ ୪ ଛକା), ଜର୍ଜ ଡକରେଲ (୪୫) ଓ ଆଣ୍ଡି ମ୍ୟାକବ୍ରାଏନ (୩୦)। ବ୍ୟାଟିଂ ଭଳି ବୋଲିଂ ଓ ଫିଲ୍ଡିଂରେ ମଧ୍ୟ ଭଲ ପ୍ରଦର୍ଶନ କରିଥିଲା ଆୟର୍ଲାଣ୍ଡ। ଦଳୀୟ ବୋଲରମାନେ କ୍ରମାଗତ ଉଇକେଟ ନେବାରୁ ଦକ୍ଷିଣ ଆଫ୍ରିକା ୪୮.୩ ଓଭରରେ ୨୪୭ ରନ୍ କରି ଅଲଆଉଟ୍ ହୋଇଯାଇଥିଲା। ଜାନେମନ ମଲାନ ୮୪ (୭ ଚୌକା ଓ ୪ ଛକା) ଓ ରାସି ଭାନ ଡର ଡୁସେନ ୪୯ (୨ ଚୌକା)ଙ୍କୁ ଛାଡ଼ି ଅନ୍ୟ କୌଣସି ବ୍ୟାଟ୍ସମ୍ୟାନ ସେଭଳି ପ୍ରଦର୍ଶନ କରିପାରି ନ ଥିଲେ। ବିଜୟୀ ଦଳ ଲାଗି ଜୋଶୁଆ ଲିଟ୍ଲ, ମ୍ୟାକବ୍ରାଏନ ଓ ମାର୍କ ଆଦେର ହାତେଇଥିଲେ ୨ ଲେଖାଏ ଉଇକେଟ।
