Ireland's Andy Balbirnie (L) reacts after reaching his century during the third One Day International cricket match between England and Ireland at the Ageas Bowl in Southampton, southwest England on
ସାଉଥାମ୍ପଟନ, ୬।୮- ଆୟର୍ଲାଣ୍ଡ ଏହାର ଏକଦିବସୀୟ କ୍ରିକେଟ ଇତିହାସରେ ଦ୍ୱିତୀୟଥର ପାଇଁ ଇଂଲଣ୍ଡକୁ ପରାସ୍ତ କରିଛି। ସ୍ଥାନୀୟ ରୋଜ ବାଓଲ ଷ୍ଟାଡିୟମରେ ଅନୁଷ୍ଠିତ ଏକ ହାଇସ୍କୋରିଂ ମ୍ୟାଚରେ ଆୟର୍ଲାଣ୍ଡ ୭ ଉଇକେଟରେ ଇଂଲଣ୍ଡକୁ ପରାସ୍ତ କରିଛି। ଇଂଲଣ୍ଡ ପକ୍ଷରୁ ଧାର୍ଯ୍ୟ ୩୨୯ ରନର ବିଜୟ ଲକ୍ଷ୍ୟକୁ ଆୟର୍ଲାଣ୍ଡ ୪୯.୫ ଓଭରରେ ମାତ୍ର ୩ ଉଇକେଟ ହରାଇ ହାସଲ କରି ନେଇଛି। ଓପନର ପଲ୍ ଷ୍ଟିର୍ଲିଂ ଓ ଅଧିନାୟକ ଆଣ୍ଡ୍ର୍ୟୁ ବାଲବିର୍ନି ଶତକ ହାସଲ କରି ଆୟର୍ଲାଣ୍ଡକୁ ଏହି ସ୍ମରଣୀୟ ବିଜୟ ଦେଇଛନ୍ତି। ପୂର୍ବରୁ ୨୦୧୧ ବିଶ୍ୱକପରେ ସମାନ ସ୍କୋରର ପିଛା କରି ଇଂଲଣ୍ଡକୁ ହରାଇଥିଲା ଆୟର୍ଲାଣ୍ଡ। ତୃତୀୟ ତଥା ଅନ୍ତିମ ଦିନିକିଆ କ୍ରିକେଟ ମ୍ୟାଚରେ ପରାଜିତ ହୋଇଥିବା ଇଂଲଣ୍ଡ ୩ ମ୍ୟାଚ ବିଶିଷ୍ଟ ସିରିଜକୁ ୨-୧ରେ ଜିତିଛି।
ବଡ଼ ସ୍କୋରର ପିଛା କରି ଆୟର୍ଲାଣ୍ଡ ୫୦ ରନରେ ପ୍ରଥମ ଉଇକେଟ ଭାବେ ଓପନର ଗେରାଥ ଡେଲାନି(୧୨)ଙ୍କ ଉଇକେଟ ହରାଇଥିଲା। ତେବେ ଷ୍ଟିର୍ଲିଂ ଓ ବାଲବିର୍ନି ଦ୍ୱିତୀୟ ଉଇକେଟ ଭାଗୀଦାରିରେ ୨୧୪ ରନ ଯୋଗ କରି ଦଳପାଇଁ ବିଜୟ ପଥ ପରିଷ୍କାର କରିଦେଇଥିଲେ। ଏହି ଯୋଡ଼ିଙ୍କ ଆଗରେ ଇଂଲଣ୍ଡ ବୋଲିଂ ଆକ୍ରମଣ ଅସହାୟ ମନେ ହୋଇଥିଲା। ୪୨ତମ ଓଭରରେ ଷ୍ଟିର୍ଲିଂ ରନଆଉଟ ହେବା ସହ ଏହି ଯୋଡ଼ି ଭାଙ୍ଗିଥିଲା। ୧୨୮ଟି ବଲ୍ର ସମ୍ମୁଖୀନ ହୋଇଥିବା ଏହି ଓପନର ୯ ଚୌକା ଓ ୬ ଛକା ସହ ୧୪୨ ରନ ସ୍କୋର କରିଥିଲେ। ବାଲବିର୍ନି ୧୧୨ ବଲ୍ରୁ ୧୨ ଚୌକା ସହାୟତାରେ ୧୧୩ ରନ କରିଥିଲେ। ହ୍ୟାରି ଟେକ୍ଟର ୨୯ ଓ କେଭିନ ଓ’ବ୍ରାଏନ ୨୧ ରନରେ ଅପରାଜିତ ରହି ଦଳକୁ ବିଜୟୀ କରାଇଥିଲେ। ଇଂଲଣ୍ଡ ପକ୍ଷରୁ ଡେଭିଡ ଓ୍ବିଲି ଓ ଆଡିଲ ରଶିଦ ଗୋଟିଏ ଲେଖାଏ ଉଇକେଟ ନେଇଥିଲେ। ପୂର୍ବରୁ ଇଂଲଣ୍ଡ ଅଧିନାୟକ ଇଅନ ମୋର୍ଗାନ(୧୦୬)ଙ୍କ ଶତକ ସହାୟତାରେ ୪୯.୫ ଓଭରରେ ୩୨୮ ରନ କରି ଅଲଆଉଟ ହୋଇଥିଲା। ଏହି ମ୍ୟାଚରେ ମୋର୍ଗାନ ଅଧିନାୟକଭାବେ ସର୍ବାଧିକ ଛକା ମାରିବାରେ ଭାରତର ମହେନ୍ଦ୍ର ସିଂ ଧୋନୀଙ୍କ ରେକର୍ଡ ଭାଙ୍ଗିଥିଲେ। ଧୋନୀ ୩୩୨ ମ୍ୟାଚରୁ ୨୧୧ ଛକା ମାରିଥିବାବେଳେ ମୋର୍ଗାନ ୧୬୩ ମ୍ୟାଚରୁ ୨୧୨ ଛକା ମାରି ରେକର୍ଡର ଅଧିକାରୀ ହୋଇଥିଲେ। ଷ୍ଟିର୍ଲିଂ ପ୍ଲେୟର ଅଫ୍ ଦି ମ୍ୟାଚ ଓ ଓ୍ବିଲି ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଥିଲେ।
ସଂକ୍ଷିପ୍ତ ସ୍କୋର
ଇଂଲଣ୍ଡ ୪୯.୫ ଓଭରରେ ୩୨୮/ଅଲଆଉଟ(ମୋର୍ଗାନ-୧୦୬, ଟମ୍ ବାଣ୍ଟନ-୫୮, କ୍ରେଗ୍ ୟଙ୍ଗ୍-୩/୫୩, ଜୋଶୁଆ ଲିଟଲ-୨/୬୨, କର୍ଟିସ କ୍ୟାମ୍ଫର-୨/୬୮, ମାର୍କ ଆଡେର-୧/୪୫, ଗେରାଥ ଡେଲାନି-୧/୨୯)। ଆୟର୍ଲାଣ୍ଡ ୪୯.୫ ଓଭରରେ ୩୨୯/୩(ଷ୍ଟିର୍ଲିଂ-୧୪୨, ବାଲବିର୍ନି-୧୧୩, ଓ୍ବିଲି-୧/୭୦, ରଶିଦ-୧/୬୧)।