ନୂଆଦିଲ୍ଲୀ, ୨ା୮ (ପି.ଟି.)-ଅଗଷ୍ଟ ୨୮ରୁ ଆରମ୍ଭ ହେବାକୁ ଥିବା ଲଙ୍କା ପ୍ରିମିୟର ଲିଗ୍ (ଏଲ୍ପିଏଲ୍) ଅଂଶଗ୍ରହଣ କରିବା ଲାଗି ୭୦ ବିଦେଶୀ ଖେଳାଳି ଆଗ୍ରହୀ ଅଛନ୍ତି। ସେମାନଙ୍କ ମଧ୍ୟରେ ଭାରତର ପୂର୍ବତନ ଅଲରାଉଣ୍ଡର ଇର୍ଫାନ ପଠାନ ଅନ୍ୟତମ ଆକର୍ଷଣ। ଲିଗ୍ରେ ୫ଟି ଫ୍ରାଞ୍ଚାଇଜ୍ ଭାଗ ନେବେ। ସେଗୁଡ଼ିକ କଲମ୍ବୋ, କାଣ୍ଡି, ଗାଲେ, ଦାମ୍ବୁଲା ଓ ଜାଫନା ସହର ନାମରେ ରହିବ।କେତେକ କ୍ଷେତ୍ରରେ ସରକାରୀ କ୍ଲିଅରାନ୍ସ ମିଳି ନ ଥିବାରୁ ଲିଗ୍ ପାଇଁ ଚିଠା ପ୍ରସ୍ତୁତ କରାଯାଇ ପାରୁ ନାହିଁ କିମ୍ବା ଫ୍ରାଞ୍ଚାଇଜ୍ ମାଲିକମାନଙ୍କ ନାମ ଘୋଷଣା କରାଯାଇ ପାରୁ ନାହିଁ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କୌଣସି ସକ୍ରିୟ ଭାରତୀୟ ଖେଳାଳିଙ୍କୁ ବିଦେଶୀ ଲିଗ୍ରେ ଅଂଶଗ୍ରହଣ ପାଇଁ ଅନୁମତି ଦେବ ନାହିଁ। ଇରଫାନ ଅବସର ନେଇସାରି ଥିବାରୁ ଏଲ୍ପିଏଲ୍ରେ ଅଂଶଗ୍ରହଣ କରିବା କ୍ଷେତ୍ରରେ ତାଙ୍କ ପାଇଁ କୌଣସି ଅସୁବିଧା ହେବ ନାହିଁ। ଶ୍ରୀଲଙ୍କାର ପୂର୍ବତନ ଅଲରାଉଣ୍ଡର ଫରଭିଜ୍ ମାହାରୁଫ୍ ଚିଠାରେ ଇରଫାନ୍ଙ୍କ ନାମ ରଖିବାକୁ ପ୍ରସ୍ତାବ ଦେଇଛନ୍ତି। ପୂର୍ବତନ ଭାରତୀୟ ଅଲରାଉଣ୍ଡରଙ୍କୁ କୌଣସି ଦଳ ମାର୍କି ଖେଳାଳି ଭାବେ ଗ୍ରହଣ କରିବା ଯଥେଷ୍ଟ ସମ୍ଭାବନା ରହିଛି। ଗତ ସୋମବାର ଶ୍ରୀଲଙ୍କା କ୍ରିକେଟ ବୋର୍ଡର କାର୍ଯ୍ୟନିର୍ବାହୀ କମିଟି ବୈଠକ ବସିଥିଲା। ଏଥିରେ ଟୁନର୍ର୍ାମେଣ୍ଟ ଅନୁମୋଦନ ଲାଭ କରିଛି। ଲିଗ୍ରେ ମୋଟ ୨୩ଟି ମ୍ୟାଚ ଚାରୋଟି ଅନ୍ତର୍ଜାତୀୟ ଭେନ୍ୟୁ ଯଥା ଆର. ପ୍ରେମାଦାସା ଇଣ୍ଟରନ୍ୟାଶନାଲ କ୍ରିକେଟ ଷ୍ଟାଡିୟମ, ରଣଗିରି ଦାମ୍ବୁଲା ଇଣ୍ଟରନ୍ୟାଶନାଲ କ୍ରିକେଟ ଷ୍ଟାଡିୟମ, ପାଲିକେଲ ଇଣ୍ଟରନ୍ୟାଶନାଲ କ୍ରିକେଟ ଷ୍ଟାଡିୟମ ଓ ସୁରିୟାଓ୍ବିଓ୍ବା ମହିନ୍ଦା ରାଜପାକ୍ସେ ଇଣ୍ଟରନ୍ୟାଶନାଲ କ୍ରିକେଟ ଷ୍ଟାଡିୟମରେ ଖେଳାଯିବ। ସୂଚନାଯୋଗ୍ୟ, ପୂର୍ବରୁ ଭାରତର ପୂର୍ବତନ ଅଲରାଉଣ୍ଡର ତଥା ବିଶ୍ୱକପ୍ ବିଜେତା ଯୁବରାଜ ସିଂ ଗତ ବର୍ଷ ଆବୁଧାବିରେ ଖେଳାଯାଇଥିବା ଟି୧୦ ଲିଗ୍ରେ ମରାଠା ଆରବିଆନ୍ସ ଟିମ୍ ତରଫରୁ ଖେଳିଥିଲେ।
