ରାୟପୁର,୯।୩: ଚଳିତ ରୋଡ୍ ସେଫ୍ଟି ଓ୍ବାଲର୍ଡ ସିରିଜ୍ରେ ମଙ୍ଗଳବାର ଖେଳାଯାଇଥିବା ଇଂଲଣ୍ଡ ଲିଜେଣ୍ଡ୍ସ ବିପକ୍ଷ ମ୍ୟାଚ୍ରେ ଇଣ୍ଡିଆ ଲିଜେଣ୍ଡ୍ସକୁ ପରାଜୟର ମୁହଁ ଦେଖିବାକୁ ପଡ଼ିଛି। କିନ୍ତୁ ଦଳର ଖେଳାଳିମାନେ ମ୍ୟାଚ୍ ଜିତିବା ପାଇଁ ଭରପୂର ପ୍ରୟାସ କରିଥିଲେ। ମ୍ୟାଚ୍ ହାରିଲେ ମାତ୍ର ଜିତିଲେ ଲକ୍ଷ ଲକ୍ଷ ପ୍ରଶଂସକଙ୍କ ହୃଦୟ।
୧୮୮ ରନ୍ର ବିଶାଳ ବିଜୟ ଲକ୍ଷ୍ୟ ନେଇ ଓହ୍ଲାଇଥିବା ଇଣ୍ଡିଆ ଲିଜେଣ୍ଡ୍ସ ୧୫.୪ ଓଭରରେ ୧୧୯ ରନ୍ରେ ୭ ଉଇକେଟ ହରାଇ ନିଶ୍ଚିତ ପରାଜୟ ଆଡ଼େ ମୁହଁାଉ ଥିଲା। ଦଳକୁ ଜିତିବା ପାଇଁ ୨୬ ବଲରେ ଦରକାର ଥାଏ ୭୦ ରନ୍। ଏଭଳି ସଙ୍କଟ ଜନକ ସ୍ଥିତିରେ ଦଳ ପାଖରେ ନା ଥିଲେ ସଚିନ କି ସେହ୍ବାଗ। କିନ୍ତୁ ହାର ମାରି ନ ଥିଲେ ଇର୍ଫାନ ପଠାନ ଓ ମନପ୍ରିତ ଗୋନି। ଦୁହେଁ ପଡ଼ିଆ ଚତୁଃ ପାର୍ଶ୍ୱରେ ଛକା, ଚୌକାର ବର୍ଷା କରି ଦେଇଥିଲେ। ହେଲେ ସାଥ୍ ଦେଲାନି ଭାଗ୍ୟ। ମାତ୍ର ୬ ରନ୍ରେ ହାରିଲା ଇଣ୍ଡିଆ ଲିଜେଣ୍ଡ୍ସ।
ପଠାନ ୬୧ (୫ ଛକା ଓ ୪ ଚୌକା) ଓ ଗୋନି ୩୫ (୪ ଛକା ଓ ୧ ଚୌକା) ରନ୍ ଅପରାଜିତ ଥିଲେ। ସଚିନ ତେନ୍ଦୁଲକରଙ୍କ ନେତୃତ୍ୱାଧୀନ ଦଳ ପାଇଁ କାଳ ସାଜିଥିବା ମଣ୍ଟି ପାନେସର ନେଇଥିଲେ ସର୍ବାଧିକ ୩ ଉଇକେଟ। ଏଥିପୂର୍ବରୁ ଅଧିନାୟକ କେଭିନ ପିଟରସନ (୭୫ ରନ୍, ୬ ଚୌକା ଓ ୫ ଛକା)ଙ୍କ ଅର୍ଦ୍ଧଶତକ ବଳରେ ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ଲିଜେଣ୍ଡ୍ସ ଧାର୍ଯ୍ୟ ୨୦ ଓଭରରେ ୭ ଉଇକେଟ ହରାଇ ୧୮୮ ରନ୍ କରିଥିଲା। ୟୁସୁଫ ପଠାନ ୩ ଓ ଇର୍ଫାନ ୨ଟି ଉଇକେଟ ନେଇଥିଲେ।