ଯାଜପୁର,୧୮ା୧(ହର୍ଷବର୍ଦ୍ଧନ ବେହେରା)ସ୍ଥାନୀୟ ଇସ୍ପାତ କାରଖାନାଗୁଡ଼ିକ ଚାଲିବାପାଇଁ ଲୁହାପଥର କଞ୍ଚାମାଲ ରୂପରେ ଆବଶ୍ୟକ କରିଥାନ୍ତି। ଏହି ଆବଶ୍ୟକତାକୁ ଓଡ଼ିଶା ଖଣି ନିଗମ (ଓଏମ୍ସି) ଦୀର୍ଘ ବର୍ଷ ହେଲା ପୂରଣ କରିଆସୁଛି। ହେଲେ ବିଡ଼ମ୍ବନା ଯେ, ଗୋଟିଏ ପଟେ ସ୍ଥାନୀୟ ଇସ୍ପାତ କାରଖାନାଗୁଡିକ ଆବଶ୍ୟକ ଲୁହାପଥର ପାଇଁ ଡହଳବିକଳ ହେଉଥିବାବେଳେ ଖଣି ନିଗମ ଇ-ନିଲାମ ପ୍ରକ୍ରିୟାରେ ଲୁହାପଥର ବ୍ୟବସାୟୀଙ୍କୁ କ୍ରୟ କରିବା ପାଇଁ ଅନୁମତି ମିଳିଛି। ଏହି ଲୁହାପଥର ବ୍ୟବସାୟୀମାନେ ଓଏମ୍ସି ଇ-ନିଲାମ ପ୍ରକ୍ରିୟାରେ ପ୍ରଚୁର ପରିମାଣର ଲୁହାପଥର କିଣି ଚଢ଼ା ମୂଲ୍ୟରେ ରପ୍ତାନି କରୁଛନ୍ତି। ହେଲେ ଆବଶ୍ୟକ ଲୁହାପଥର ନ ପାଇ ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳର ଅନେକ କାରଖାନା ବନ୍ଦ ହେବା ସ୍ଥିତି ଉପୁଜିଛି ବୋଲି ମତପ୍ରକାଶ ପାଇଛି।
ସୂଚନା ଅନୁସାରେ ୨୦୧୫ ଠାରୁ ଖଣି ନିଗମ ଇ-ନିଲାମ ବ୍ୟବସ୍ଥା ଲାଗୁ ହୋଇଛି। ସେହିଦିନଠାରୁ କେବେବି ଲୁହାପଥର ବ୍ୟବସାୟୀମାନଙ୍କୁ ନିଲାମ ପ୍ରକ୍ରିୟାରେ ଭାଗ ନେବା ପାଇଁ ନିଗମ ଅନୁମତି ଦେଉ ନ ଥିଲା। କେବଳ କାରଖାନା ପ୍ରତିଷ୍ଠା କରିଥିବା ଶିଳ୍ପ ସଂସ୍ଥାଗୁଡିକୁ ନିଲାମ ପ୍ରକ୍ରିୟାରେ ଭାଗ ନେବା ପାଇଁ ଅନୁମତି ଦିଆଯାଇଥିଲା। କିନ୍ତୁ ଆଶ୍ଚର୍ଯ୍ୟଜନକ ଭାବରେ ଗତ ନଭେମ୍ବରଠାରୁ ଖଣି ନିଗମ ଲୁହାପଥର ବ୍ୟବସାୟୀମାନଙ୍କୁ ଜାତୀୟ ନିଲାମ ପ୍ରକ୍ରିୟାରେ ଭାଗ ନେବା ପାଇଁ ଅନୁମତି ଦେଇଛି। ଫଳରେ ଖଣି ନିଗମ ଅଧୀନରେ ଥିବା ସମସ୍ତ ଲୁହାପଥର ଖଣିର ନିଲାମ ପ୍ରକ୍ରିୟାରେ ଭାଗନେଇ ଲୁହାପଥର ବ୍ୟବସାୟୀମାନେ ଲୁହାପଥର କିଣି ଚାଇନାକୁ ରପ୍ତାନି କରି ବିପୁଳ ଅର୍ଥ ରୋଜଗାର କରୁଛନ୍ତି। ଯଦି ଆଗାମୀ ଇ-ନିଲାମରେ ଏଭଳି ପ୍ରକ୍ରିୟା ଜାରି ରଖାଯାଏ, ତେବେ ସ୍ଥାନୀୟ ଶିଳ୍ପଗୁଡିକ ସେମାନଙ୍କର କାର୍ଯ୍ୟ ବନ୍ଦ କରିବା ବ୍ୟତୀତ ଅନ୍ୟ କୌଣସି ବିକଳ୍ପ ପାଇବେ ନାହିଁ ଏବଂ ଶେଷରେ ଲୋକଙ୍କ ଜୀବିକା ବିପଦରେ ପଡ଼ିବ ବୋଲି ଆଶଙ୍କା ପ୍ରକାଶ ପାଇଛି। ସ୍ଥାନୀୟ ଶିଳ୍ପଗୁଡ଼ିକୁ ବନ୍ଦରୁ ରକ୍ଷା କରିବା ପାଇଁ ଓଡିଶା ସରକାର ଏବଂ ଓଏମସି ତୁରନ୍ତ ପଦକ୍ଷେପ ନେବା ସହିତ ବ୍ୟବସାୟୀମାନଙ୍କୁ ଇ-ନିଲାମରେ ଅଂଶଗ୍ରହଣ କରିବାରୁ ରୋକ ଲଗାନ୍ତୁ ବୋଲି ସ୍ଥାନୀୟ ଶିଳ୍ପ ସମୂହ ସରକାରଙ୍କ ନିକଟରେ ଦାବି କରିଛନ୍ତି।