ପଟ୍ଟାମୁଣ୍ଡାଇ, ୨୦ା୭(ସ୍ବ.ପ୍ର.): ସରକାର କୃଷି ଓ କୃଷକର ଉନ୍ନତି ନିମନ୍ତେ ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ଏଥିନିମନ୍ତେ ସରକାର ଲକ୍ଷାଧିକ ଟଙ୍କାର ଅନୁଦାନ ଯୋଗାଇ ଦେଉଛନ୍ତି। ମାତ୍ର ପଟ୍ଟାମୁଣ୍ଡାଇ ବ୍ଲକ ଅଞ୍ଚଳରେ ସରକାରଙ୍କ ଯୋଜନାଗୁଡିକ ସଫଳ ରୂପାୟନ ହୋଇପାରୁ ନ ଥିବା ଅଭିଯୋଗ ହୋଇଛି। ପଟ୍ଟାମୁଣ୍ଡାଇ ଜଳ ସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀଙ୍କ ଅଧୀନରେ ଦେଢ ନମ୍ବର (କ) କେନାଲ ଓ ତାର ଶାଖା କେନାଲଗୁଡିକ ରହିଛି। ଏହି ଦେଢ ନମ୍ବର କେନାଲ ଉପରେ ଅରଡପଲ୍ଲି, ବଡମହନପୁର, ବଡପଡା, ସାନଜରିଆ, ଗଙ୍ଗାରାମପୁର ସମେତ ମହାକାଳପଡ଼ା ବ୍ଲକର ବିଜୟନଗର, ବଳିପାଳ, ବଅଢିଅ ପ୍ରଭୃତି ବହୁ ପଞ୍ଚାୟତର ଶତାଧିକ ଏକର ଚାଷଜମି ଜଳସେଚନ ନିମନ୍ତେ ନିର୍ଭର କରିଥାଏ। ମାତ୍ର ଜଳ ସମ୍ପଦ ବିଭାଗ ପକ୍ଷରୁ ଜୁଲାଇରେ ଏହି କେନାଲର କେତେକ ସ୍ଥାନରେ ନାମକୁ ମାତ୍ର ସଫେଇ କରାଯାଇଛି। ଯାହାକି ଧର୍ମକୁ ଆଖିଠାର ସଦୃଶ। ଠିକ୍ ଭାବେ କେନାଲ ସଫେଇ କରାଯାଇନାହିଁ ବୋଲି ଅଭିଯୋଗ ହେଉଛି। ବିଭାଗୀୟ ଅଧିକାରୀ ଏହାର ତଦାରଖ କରୁ ନ ଥିବାରୁ ଚାଷୀ ମହଲରେ ଅସ୍ରନ୍ତୋଷ ପ୍ରକାଶ ପାଇଛି। ଫଳରେ କେନାଲ ପାଣି ବିଲରେ ପହଞ୍ଚତ୍ ପାରୁନାହିଁ। ଯାହାଦ୍ୱାରା ଜୁଲାଇ ମାସର ଶେଷ ହେବାକୁ ବସିଥିବା ବେଳେ ଠିକ୍ ଭାବେ କେନାଲ ସଫେଇ ହୋଇନଥିବାରୁ ପାଣି ଚାଷ ଜମିକୁ ମାଡି ପାରିନାହିଁ। ଫଳରେ ଚାଷ କାର୍ଯ୍ୟ ଗୁରୁତର ଭାବେ ବାଧାପ୍ରାପ୍ତ ହୋଇଛି। ପଟ୍ଟାମୁଣ୍ଡାଇ ଜଳ ସମ୍ପଦ ବିଭାଗ କାର୍ଯ୍ୟାଳୟକୁ ଚାଷୀମାନେ ଅଭିଯୋଗ କରିବାକୁ ଯାଇ କୌଣସି ବିଭାଗୀୟ ଅଧିକାରୀ ନ ପାଇ ନିରାଶରେ ଫେରିବାକୁ ବାଧ୍ୟ ହେଉଛନ୍ତି ବୋଲି ବିଜୟ ଦାସ, ସୁରେନ୍ଦ୍ର ପରିଡା, ହରହର ବାରିକ, ଅକ୍ଷୟ ସାହୁ, ବାବୁ ବେହେରା, ସଂଜୟ ମଲିକ, ସୁନାକର ବାରିକ, ଖତୁ ମଲିକ, ହଳଧର ତରାଇ ପ୍ରମୁଖ ଅଭିଯୋଗ କରିଛନ୍ତି। ନାମକୁମାତ୍ର କେନାଲ ସଫେଇ କରାଯାଇ ସରକାରୀ ରାଜକୋଷରୁ ଲକ୍ଷାଧିକ ଟଙ୍କା ଉଠାଇ ନେବାକୁ ମସୁଧା କରାଯାଇଥିବା ଅଭିଯୋଗ ହୋଇଛି। ଏ ସମ୍ପର୍କରେ ଜଳସମ୍ପଦ ବିଭାଗ ଏସ୍ଡିଓ ପ୍ରଭାତ ସାହୁଙ୍କୁ ପଚାରିବାରେ ଦେଢ ନମ୍ବର (କ) କେନାଲ ସଫା ହୋଇ ନ ଥିବା ନେଇ ଅଭିଯୋଗ ଆସିଛି। ଏହାର ସମାଧାନ ହେବ ବୋଲି ସେ କହିଛନ୍ତି।