ହାଟଡିହୀ,୮।୧(ଡିି.ଏନ.ଏ.) କେନ୍ଦୁଝର ଜିଲା ହାଟଡିହୀ ବ୍ଲକ ବିଦ୍ୟାଧରପୁର କେନାଲ ଡିଭିଜନ ଅଧୀନ ବିଭିନ୍ନ କାର୍ଯ୍ୟରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ଏଷ୍ଟିମେଟ ଅନୁସାରେ କାର୍ଯ୍ୟ ନ ହୋଇ କୋଟିଏରୁ ଊର୍ଦ୍ଧ୍ୱ ଟଙ୍କା ମିଥ୍ୟା ବିଲ୍ କରାଯାଇଥିବା ଆନନ୍ଦପୁର ସିଭିଲ ସୋସାଇଟି ପକ୍ଷରୁୁ ଭିଜିଲାନ୍ସ ଏବଂ ଜିଲାପାଳଙ୍କ ନିକଟରେ ଅଭିଯୋଗ କରାଯାଇଛି। ଏହାର ନିରପେକ୍ଷ ତଦନ୍ତ ନ ହେଲେ ଅନ୍ଦୋଳନ ହେବ ବୋଲି ସିଭିଲ୍ ସୋସାଇଟି ସମ୍ପାଦକ ଭଗବାନ ମଲିକ ଚେତାବନୀ ଦେଇଛନ୍ତି l
ଅଭିଯୋଗ ଅନୁସାରେ ବିଦ୍ୟାଧରପୁର କେନାଲ ଡିଭିଜନ ଅଧୀନରେ ୨୦୧୯-୨୦୨୦ ଆର୍ଥିକ ବର୍ଷରେ ୨ କୋଟି ୫୨ ଲକ୍ଷ ବ୍ୟୟ ଅଟକଳରେ ଏକ ଟେଣ୍ଡର ହୋଇଥିଲା। ଏହି ଅନୁଦାନ ସଇ, ନହଙ୍ଗ, ଧୋବାଗ କେନାଲ କାର୍ଯ୍ୟ ପାଇଁ ବ୍ୟୟ ବରାଦ ହୋଇଥିଲା। ଠିକାଦାର ଗଗନ ବିହାରୀ ବେହେରା ଉକ୍ତ କାର୍ଯ୍ୟ କରୁଥିଲେ। ପୂର୍ବରୁ ଥିବା ଯନ୍ତ୍ରୀ ପ୍ରଦୀପ୍ତ ମହାପାତ୍ରଙ୍କ ସମୟରେ ପ୍ରାୟ ୨ କୋଟି ଟଙ୍କା ବିଲ୍ ହୋଇଥିଲା। ଏବେ ଯନ୍ତ୍ରୀ ମହାପାତ୍ର ଏହି କେନାଲ ଡିଭିଜନ ଅଧୀନ ଅନ୍ୟ ଶାଖାରେ କାର୍ଯ୍ୟ କରୁଛନ୍ତି। ଠିକ୍ ଭାବେ କାମ ହୋଇ ନ ଥିବା ବେଳେ ବିଲ୍ ପାସ୍ ହୋଇଛି। ଏଷ୍ଟିମେଟ ଅନୁସାରେ କାମ ହୋଇ ନ ଥିବା ବେଳେ କାର୍ଯ୍ୟରେ ଲୁହା ରଡ୍ ବ୍ୟବହାର ହୋଇନି। କେବଳ ବାଲି,ଚିପ୍ସ,ସିମେଣ୍ଟରେ କାମ କରି ମିଥ୍ୟା ବିଲ କରାଯାଇ ସରକାରୀ ଅନୁଦାନକୁ ସିଧା ସଳଖ ହଡ଼ପ କରାଯାଇଛି। ଏହି ଘଟଣାରେ ନିରପେକ୍ଷ ତଦନ୍ତ କରା ନ ଗଲେ ଆନନ୍ଦପୁର ଉପଜିଲାପାଳଙ୍କ ଅଫିସ ସମ୍ମୁଖରେ ଅନଶନ ହେବ ବୋଲି ସିଭିଲ ସୋସାଇଟି ସମ୍ପାଦକ ମଲିକ କହିଛନ୍ତି। ଏ ସଂକ୍ରାନ୍ତରେ ପୂର୍ବତନ ଯନ୍ତ୍ରୀଙ୍କ ଫୋନ (ନଂ. ୭୦୦୮୫୯୮୨୭୩)କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ଫଳରେ ତାଙ୍କ ପ୍ରତିକ୍ରିୟା ମିଳିପାରିନି। ଠିକାଦାର ଗଗନ ବିହାରୀ ବେହେରା କାର୍ଯ୍ୟ ଠିକ୍ ଭାବେ ହୋଇଛି ବୋଲି କହିଛନ୍ତି। ଅଧୀକ୍ଷଣ ଯନ୍ତ୍ରୀ ରସାଲ ଜଜ୍ ଘଟଣାର ଅନୁଧ୍ୟାନ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରକାଶ କରିଛନ୍ତି।