ଡେରାବିଶ, ୨୯ା୧୧(ସ୍ବ.ପ୍ର.): ଡେରାବିଶ ବ୍ଲକ ଯଅଁରାବାରିମୂଳ ପଞ୍ଚାୟତ ଭିତରବମ୍ପୁଠାରେ ଥିବା କୃଷ୍ଣଚନ୍ଦ୍ର ସଂସ୍କୃତ ମହିଳା ମହାବିଦ୍ୟାଳୟରେ ବ୍ୟାପକ ଅନିୟମିତତା ନେଇ ଶୁକ୍ରବାର ଉପଜିଲାପାଳଙ୍କ ନିକଟରେ ଅଧ୍ୟୟନରତ ଛାତ୍ରୀଙ୍କ ଅଭିଭାବକ, ଅଞ୍ଚଳବାସୀ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ସ୍ଥାନୀୟ ଅଞ୍ଚଳର ଜନସାଧାରଣଙ୍କ ଚେଷ୍ଟାରେ ଅଞ୍ଚଳର ଗରିବ ମେଧାବୀ ଛାତ୍ରୀମାନେ ସଂସ୍କୃତ ମାଧ୍ୟମରେ ଉଚ୍ଚଶିକ୍ଷା ଲାଭ ନିମନ୍ତେ ମହାବିଦ୍ୟାଳୟ ପ୍ରତିଷ୍ଠା ହୋଇଥିଲା। ବର୍ତ୍ତମାନ ଅଧ୍ୟକ୍ଷ ମହାବିଦ୍ୟାଳୟକୁ ସପ୍ତାହରେ ୨ ଦିନ ଆସି ପ୍ରତ୍ୟେକ ଦିନ ଉପସ୍ଥିତ ରହୁଥିବା ତାଙ୍କ ଉପସ୍ଥାନରେ ଦସ୍ତଖତ କରୁଥିବା ଅଭିଯୋଗ ହେଉଛି। ମହାବିଦ୍ୟାଳୟର ଛାତ୍ରୀମାନେ ଭଙ୍ଗା ଶୌଚାଳୟ ବ୍ୟବହାର କରୁଥିବା ବେଳେ ପାନୀୟ ଜଳର ବ୍ୟବସ୍ଥା ନାହିଁ। ଭଙ୍ଗା ଶ୍ରେଣୀ ଗୃହରେ ବିପଦସଙ୍କୁଳ ଅବସ୍ଥାରେ ପିଲା ପାଠ ପଢୁଛନ୍ତି। ଛାତ୍ରୀମାନଙ୍କଠାରୁ ନାମଲେଖା ସମୟରେ ଆଦାୟ କରାଯାଉଥିବା ଫିକୁ କଲେଜ ଜମାଖାତାରେ ରଖା ନ ଯାଉନାହିଁ। ଯାହାର ହିସାବ ମିଳୁ ନାହିଁ। ମହାବିଦ୍ୟାଳୟରୁ ପାସ୍ କରୁଥିବା ଛାତ୍ରୀଙ୍କଠାରୁ ଉତ୍ତୀର୍ଣ୍ଣ ପ୍ରମାଣପତ୍ର ପାଇଁ ଟଙ୍କା ଆଦାୟ କରାଯାଇଥାଏ। ଟଙ୍କା ଦେଇ ପାରୁ ନ ଥିବା ଛାତ୍ରୀ ବହୁବର୍ଷ ଧରି ସେମାନଙ୍କର ପ୍ରମାଣପତ୍ର ପାଉ ନ ଥିବା ଅଭିଯୋଗରେ ଦର୍ଶାଯାଇଛି। ମହାବିଦ୍ୟାଳୟର ଜାତୀୟ ସେବା ସଂସ୍ଥା ଯୋଜନାରେ ବିଭିନ୍ନ କାର୍ଯ୍ୟକ୍ରମ କରା ନ ଯାଇ ସେଥି ନିମନ୍ତେ ଆସୁଥିବା ଅନୁଦାନ ଆମତ୍ସାତ୍ କରାଯାଉଛି। ଏହି କାରଣରୁ ମହାବିଦ୍ୟାଳୟରୁ ଜାତୀୟ ସେବା ସଂସ୍ଥା ଯୋଜନାକୁ ପ୍ରତ୍ୟାହାର କରି ନିଆଯାଇଛି। ମହାବିଦ୍ୟାଳୟରେ ଶିକ୍ଷାଦାନ, ପ୍ରଶାସନିକ କାର୍ଯ୍ୟ ଓ ଉନ୍ନୟନ ପାଇଁ ଆସୁଥିବା ଅନୁଦାନ ଠିକ୍ ଭାବରେ କାର୍ଯ୍ୟକାରୀ କରାଯାଉ ନ ଥିବା ସମ୍ପର୍କରେ ତଦନ୍ତ କରି ଅଧ୍ୟକ୍ଷାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିମନ୍ତେ ଅଞ୍ଚଳର ବୁଦ୍ଧିଜୀବୀ ପୂର୍ବତନ ସରପଞ୍ଚ ରଘୁନାଥ ଶତପଥୀ, ଅଜୟ କୁମାର ବଳ, ରମେଶ ଚନ୍ଦ୍ର ବାରିକ, ସୁବାସ ଚନ୍ଦ୍ର ସାହୁ ପ୍ରମୁଖ ଉପଜିଲାପାଳଙ୍କ ନିକଟରେ ଦାବି କରିଛନ୍ତି। ଏ ସମ୍ପର୍କରେ ଉପଜିଲାପାଳ ନିରଞ୍ଜନ ବେହେରାଙ୍କୁ ପଚାରିବାରୁ ମହାବିଦ୍ୟାଳୟ ସମ୍ବନ୍ଧରେ ଆସିଥିବା ଅଭିଯୋଗ ତାଙ୍କର ହସ୍ତଗତ ହୋଇଛି। ଏହାର ବିଧିବଦ୍ଧ ତଦନ୍ତ କରି ତୁରନ୍ତ ରିପୋର୍ଟ ଦେବା ପାଇଁ ଡେରାବିଶ ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ପାଇବା ପରେ ଏହା ଉପରେ ଯାହା କିଛି ପଦକ୍ଷେପ ନିଆଯିବ ବୋଲି ସେ କହିଛନ୍ତି।