ସମ୍ବଲପୁର,୮ା୧୨(ବ୍ୟୁରୋ): ସମ୍ବଲପୁର ଜିଲା ଯୁଯୁମୁରା ପଞ୍ଚାୟତ ସମିତି ପକ୍ଷରୁ ତହସିଲ ଅଫିସ ପଛପଟେ ମିନି ଷ୍ଟାଡିୟମ ନିର୍ମାଣ କାମ ଚାଲିଛି। ହେଲେ ଏଥିରେ ବ୍ୟାପକ ଅନମିୟତା ହୋଇଥିବା ନେଇ ଯୁଯୁମୁରା ସରପଞ୍ଚ ବାସନ୍ତି ପ୍ରଧାନ ଓ ସମିତି ସଭ୍ୟ ଜୟନ୍ତ ପ୍ରଧାନ ବିଡିଓ ନିଳାମ୍ବର ମହାନନ୍ଦଙ୍କ ପାଖରେ ଅଭିଯୋଗ କରିଛନ୍ତି। ଅଭିଯୋଗ କ୍ରମେ, ଯୁଯୁମୁରା ପଞ୍ଚାୟତର ଜନପ୍ରତିନିଧିଙ୍କ ଅଜଣାତରେ ୧୦ ଲକ୍ଷ ଟଙ୍କାର ପାଚେରି ନିର୍ମାଣ କାମ କରାଯାଉଛି। ଏହି କାମ ପାଇଁ ବ୍ଲକରେ ଫାଇଲ ଖୋଲାଯାଇ ନାହିଁ। ପଞ୍ଚାୟତ ପକ୍ଷରୁ ଏହି ପ୍ରକଳ୍ପ ପାଇଁ ପୂର୍ବରୁ ପ୍ରସ୍ତାବ ଦିଆଯାଇ ନାହିଁ। ପଞ୍ଚାୟତ ଜେଇଙ୍କୁ ମଧ୍ୟ ଏ ବିଷୟରେ ଜଣାନାହିଁ। ଆବଶ୍ୟକ ନିଅଁ ଖୋଳାଯାଇ ନ ଥିବାବେଳେ ଛଡ, ବାଲି, ସିମେଣ୍ଟ ମିଶ୍ରଣ ମଧ୍ୟ ବ୍ୟୟ ଅଟକଳ ଅନୁସାରେ ହେଉ ନାହିଁ। କାମ ପାଇଁ ପଞ୍ଚାୟତର ଅନୁମତି ନିଆଯାଇ ନାହିଁ। କାମର ମାନ ଯାଞ୍ଚ ସହ ଅଫିସ ପ୍ରକ୍ରିୟା ନ ହେବା ପର୍ଯ୍ୟନ୍ତ କାମ ବନ୍ଦ କରଯାଉ ବୋଲି ଦର୍ଶାଇଛନ୍ତି। ଏ ସମ୍ପର୍କରେ ବିଡିଓ ନିଲାମ୍ବର ମହାନନ୍ଦ କହିଛନ୍ତି, ଏହା ସରକାରୀ ଜମି। ରକ୍ଷଣାବେକ୍ଷଣ ପାଇଁ ରାଜସ୍ବ ବିଭାଗ ପକ୍ଷରୁ ଅନୁଦାନ ଆସିଥିଲା। ତେଣୁ ମିନି ଷ୍ଟାଡିୟମର ଉନ୍ନତି କରାଯାଉଛି। ଏହି ଷ୍ଟାଡିୟମରେ ଆହୁରି ଅନୁଦାନ ଦିଆଯାଇ ବିକାଶ କରାଯିବ। କାମ ପାଇଁ ଫାଇଲ ମଧ୍ୟ ଖୋଲାଯାଇଛି। କାମର ମାନକୁ ନେଇ ଆସିଥିବା ଅଭିଯୋଗ ଉପରେ ଯାଞ୍ଚ କରାଯିବ ବୋଲି ସେ କହିଥିଲେ।
