ନିମାପଡ଼ା,୧୬।୪(ଡି.ଏନ୍.ଏ.): ନିମାପଡ଼ା ବ୍ଲକ ଅନ୍ତର୍ଗତ କଳାପାଞ୍ଚଣ ପଞ୍ଚାୟତର ମାଧିବରହମପୁର ଗ୍ରାମଠାରୁ ଉମାମହେଶ୍ୱରପୁର ଗ୍ରାମ ପର୍ଯ୍ୟନ୍ତ ପାନୀୟ ଜଳ ଯୋଗାଣ ନିମନ୍ତେ ପାଇପଲାଇନ ସଂଯୋଗ କାର୍ଯ୍ୟ ଚାଲିଛି। ପଞ୍ଚାୟତ ପକ୍ଷରୁ ୬ଲକ୍ଷ ଟଙ୍କା ଆର୍ଥିକ ଅନୁଦାନରେ ୪ଶହରୁ ଊର୍ଦ୍ଧ୍ୱ ମିଟରର ପାଇପଲାଇନ ବିଛା କାର୍ଯ୍ୟ କରାଯାଉଛି। ହେଲେ ଏହି କାର୍ଯ୍ୟରେ ବ୍ୟାପକ ଜାଲିଆତି, ଅନିୟମିତତା ହୋଇଥିବା ଅଭିଯୋଗ ହୋଇଛି। ସରକାରୀ ନୀତିନିୟମକୁ ଉଲ୍ଲଂଘନ କରି ମନମୁଖି ଭାବେ ନିମ୍ନମାନର କାର୍ଯ୍ୟ କରାଯାଇ ବିଲ୍ ନେବାକୁ ମସୁଧା ଚାଲିଛି। ଏହି କାର୍ଯ୍ୟରେ ଟେଷ୍ଟିଂ ପାଇପ ବ୍ୟବହାର କରା ନ ଯାଇ ନିମ୍ନମାନର ପାଇପ ବିଛାଯାଇଛି। ଫଳରେ ପାଇପ ମାଟି ତଳେ ଖୁବ କମ୍ ଦିନ ମଧ୍ୟରେ ଫାଟି ନଷ୍ଟ ହେବାର ଆଶଙ୍କା ରହିଛି। ଅନୂ୍ୟନ ୩ଫୁଟ ଗାତ ଖୋଳାଯାଇ ପାଇପଲାଇନ ପକାଯିବାର ବିଭାଗୀୟ ନିୟମ ରହିଥିବାବେଳେ ମାତ୍ର ୫/୬ଇଞ୍ଚ ଖୋଳାଯାଇ ପାଇପଲାଇନ ସଂଯୋଗ କରି ମାଟି ପୋତି ଦିଆଯାଉଛି। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା, ଏହି କାର୍ଯ୍ୟ ବିନା ଟେଣ୍ଡରରେ କରାଯାଉଥିବା ବିଭିନ୍ନ ମହଲରୁ ଅଭିଯୋଗ ହୋଇଛି। ଏ ସମ୍ପର୍କରେ ପଞ୍ଚାୟତବାସୀ ସୁବାସ ଚନ୍ଦ୍ର ଲେଙ୍କା, ସୁଶାନ୍ତ କୁମାର ପାତ୍ର, ସାବିତ ଖାନ, ଶରତ କୁମାର ଗିଲି ପ୍ରମୁଖ ପୁରୀ ଜିଲାପାଳ, ପଞ୍ଚାୟତିରାଜ ସଚିବ, ୫-ଟି ସଚିବ, ବିଡିଓଙ୍କ ନିକଟରେ ଅଭିଯୋଗ କରିବା ସହ ଏହି ଜାଲିଆତି କାର୍ଯ୍ୟର ଭିଜିଲାନ୍ସ ତଦନ୍ତ କରାଯିବାକୁ ଦାବି କରିଛନ୍ତି। ଯଥାଶୀଘ୍ର ଏହାର ତଦନ୍ତ କରାଯାଇ ପଦକ୍ଷେପ ନିଆ ନ ଗଲେ ଗଣ ଆନ୍ଦୋଳନ ହେବ ବୋଲି ଯୁବନେତା ସୁବାସ ଚନ୍ଦ୍ର ଲେଙ୍କା, ସୁଶାନ୍ତ ପାତ୍ର ପ୍ରମୁଖ ଚେତାବନୀ ଦେଇଛନ୍ତି। ଏ ନେଇ ବିଡିଓ ମନୋଜ କୁମାର ବେହେରା କହିଛନ୍ତି, ଉକ୍ତ ଘଟଣାର ତୁରନ୍ତ ତଦନ୍ତ କରି ପଦକ୍ଷେପ ନେବାକୁ କନିଷ୍ଠ ଯନ୍ତ୍ରୀ ପିଙ୍କି ମହାନ୍ତିଙ୍କୁ ନିର୍ଦ୍ଦେଶ ଦିଆଯାଇଛି। ଅନ୍ୟପଟେ ବିଭାଗୀୟ କନିଷ୍ଠ ଯନ୍ତ୍ରୀ ପିଙ୍କି ମହାନ୍ତି ଓ ପିଇଓ କହ୍ନେଇଚରଣ ପ୍ରଧାନଙ୍କୁ ପଚାରିବାରେ ପାଇପଲାଇନ କାର୍ଯ୍ୟ ସରକାରୀ ନୀତି ନିୟମ ଅନୁଯାୟୀ କରାଯାଇଛି। ଏଥିରେ କୌଣସି ଅନିୟମିତତା ରହି ନ ଥିବା ଉଭୟେ କହିଛନ୍ତି।
