କାଳିଆପାଣି,୧୭ା୪(ଡି.ଏନ.ଏ.): ଯାଜପୁର ଜିଲା ସୁକିନ୍ଦା ବ୍ଲକ ଅନ୍ତର୍ଗତ ଟମକା-ମଙ୍ଗଳପୁର ରାସ୍ତା ନିର୍ମାଣ କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ଫଳରେ ରାସ୍ତା ନିର୍ମାଣ ହେବାର ୬ ମାସ ନ ପୂରୁଣୁ ବିଭିନ୍ନ ସ୍ଥାନରେ ଫାଟ ସୃଷ୍ଟି ହେଲାଣି। ଏହାକୁ ନେଇ ଅଞ୍ଚଳବାସୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି। ତେଣୁ ଘଟଣାର ତଦନ୍ତ କରି ଅନୀୟମିତତାରେ ସମ୍ପୃକ୍ତ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି।
ସୂଚନା ମୁତାବକ, ରାସ୍ତାର ଟାଟା ମାଇନ୍ସ ଜଗନ୍ନାଥ ମନ୍ଦିରଠାରୁ ବେଦାନ୍ତ କମ୍ପାନୀର କଲରଙ୍ଗୀ ଖଣି ଗେଟ୍ ପର୍ଯ୍ୟନ୍ତ ଶୋଚନୀୟ ହୋଇଥିଲା। ପ୍ରତିଦିନ ୬ଟି ଖଣିରୁ ହଜାରହଜାର ଟ୍ରକ୍ କ୍ରୋମାଇଟ ବୋଝେଇ କରି ବାହାର ରାଜ୍ୟ ଓ ଜିଲାକୁ ଯାଉଛନ୍ତି। ଫଳରେ ଦୈନିକ କେଉଁଠି ନା କେଉଁଠି ଦୁର୍ଘଟଣା ଘଟୁଥିବା ନଜିର ରହିଛି। ଏହାକୁ ଦୃଷ୍ଟିରେ ରଖି ଅଞ୍ଚଳବାସୀ ସ୍ଥାନୀୟ ବିଧାୟକ ତଥା ଗ୍ରାମ୍ୟ ଉନ୍ନୟନ ଓ ଦକ୍ଷତା ବିକାଶ ମନ୍ତ୍ରୀ ପ୍ରୀତିରଞ୍ଜନ ଘଡ଼ାଇ ଓ ଯାଜପୁର ଜିଲାପାଳଙ୍କୁ ରାସ୍ତା ମରାମତି ପାଇଁ ଲିଖିତ ଦାବି ଭାବେ ଜଣାଇଥିଲେ। ପରେ ପୂର୍ତ୍ତ ବିଭାଗ ପକ୍ଷରୁ ରାସ୍ତା ମରାମତି କରାଯାଇଥିଲା। ପ୍ରଥମ ପର୍ଯ୍ୟାୟରେ ଟମକାରୁ ମଙ୍ଗଳପୁର ପର୍ଯ୍ୟନ୍ତ ରାସ୍ତା ମରାମତି ପାଇଁ ବିନା ଟେଣ୍ଡରରେ ୬୦ ଲକ୍ଷ ଖର୍ଚ୍ଚ କରାଯାଇଥିବାବେଳେ ପରବର୍ତ୍ତୀ ସମୟରେ କୁସୁମୁଡ଼ିଆଠାରୁ ଏକ ନମ୍ବର ଛକ ପର୍ଯ୍ୟନ୍ତ ପିଚୁ ରାସ୍ତା କାର୍ଯ୍ୟ କରାଯାଇଥିଲା। ତାହାର ବ୍ୟୟବରାଦ ଗୁପ୍ତ ରହିଛି। ଏହାପରେ କଲରଙ୍ଗୀ ଢାବାଛକଠାରୁ ବେଦାନ୍ତ-ଫେକର ଖଣି ଗେଟ ସମ୍ମୁଖ ପର୍ଯ୍ୟନ୍ତ କିଛିକିଛି ଖାଲଖମା ମରାମତି କରାଯାଇଛି।
ସେହିପରି ଟାଟା ଷ୍ଟିଲ ମାଇନିଂ କଲୋନୀ ପାଚେରି ଶେଷ ସ୍ଥାନରୁ ଆରମ୍ଭ କରି ଟାଟା ତାରେଣୀ ବଜାର ପର୍ଯ୍ୟନ୍ତ କଂକ୍ରିଟ ରାସ୍ତା ନିର୍ମାଣ କାର୍ଯ୍ୟ ଜଣେ ପ୍ରଭାବଶାଳୀ ନେତ୍ରୀଙ୍କ ସ୍ବାମୀ କରିଥିଲେ। ବିନା ସୂଚନା ଫଳକରେ କାର୍ଯ୍ୟ ହୋଇଥିବାବେଳେ ବିଭାଗୀୟ ଅଧିକାରୀ କିମ୍ବା ଯନ୍ତ୍ରୀ ସେଠାରେ ଉପସ୍ଥିତ ନ ଥିଲେ। କାମ ଆରମ୍ଭରୁ ସ୍ଥାନୀୟ ଅଞ୍ଚଳର କେତେଜଣ ପ୍ରଭାବଶାଳୀ କୁଜି ନେତାଙ୍କୁ ହାତବାରିଶୀ କରି ସେ ନିମ୍ନମାନର କରି ଚାଲିଥିଲେ। କେହି ବିରୋଧ କଲେ ରାଜନୀତିର ପ୍ରଭାବ ଦେଖାଇଥିଲେ। ମାତ୍ର ରାସ୍ତା ନିର୍ମାଣ କାର୍ଯ୍ୟ ଅଧା କରି ପକାଇଥିବାବେଳେ ରାସ୍ତା ଜଏଣ୍ଟ ମଝିରେ ଦେଇଥିବା ରଡ୍ରେ ପଡ଼ି କିଛିଦିନ ତଳେ ଜଣେ ମହିଳାଙ୍କ ମୃତ୍ୟୁ ହୋଇଥିଲା। ନିମ୍ନମାନର କଂକ୍ରିଟ କାର୍ଯ୍ୟ କରି ଠିକାଦାର ରାସ୍ତାର ଉଭୟ ପାଶର୍ବ ଫୁଟପାଥରେ ମାଟି ନ ପକାଇ ବିଲ୍ ଉଠାଇ ନେଇଥିଲେ।
ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସମ୍ପୃକ୍ତ ୧୨୦୦ ମିଟର ରାସ୍ତା କାର୍ଯ୍ୟ ପାଇଁ ୪୦ ଲକ୍ଷ ଟଙ୍କା ବ୍ୟୟବରାଦ ହୋଇଥିଲା। ଠିକାଦାରଙ୍କ ଏପରି ମନମୁଖି କାର୍ଯ୍ୟ ସମ୍ବନ୍ଧରେ ବିଭାଗୀୟ ମନ୍ତ୍ରୀଙ୍କ ମଧ୍ୟ ଦୃଷ୍ଟି ଆକର୍ଷଣ କରାଯାଇଥିଲା। ମାତ୍ର ମନ୍ତ୍ରୀ କିମ୍ବା ବିଭାଗୀୟ ଅଧିକାରୀ କୌଣସି ପଦକ୍ଷେପ ଗ୍ରହଣ କରି ନ ଥିଲେ। ଏବେ ରାସ୍ତା ନିର୍ମାଣ କାର୍ଯ୍ୟର ୬ ମାସ ପୂରଣ ହୋଇନି କଂକ୍ରିଟ ଗୋଟିଏଗୋଟିଏ ସ୍ଥାନରେ ଭାଙ୍ଗି ଖଣ୍ଡଖଣ୍ଡ ହୋଇ ଉଠିବାରେ ଲାଗିଛି। ଏପରି କି ରାସ୍ତା ଠାଏଠାଏ ଭାଙ୍ଗି ବଡ଼ବଡ଼ ଗର୍ତ୍ତ ସୃଷ୍ଟି ହୋଇଛି। ତୁରନ୍ତ ଉପରିସ୍ଥ ଅଧିକାରୀ ଏ ଦିଗରେ ପଦକ୍ଷେପ ନେବାକୁ ଅଞ୍ଚଳର ଯୁବନେତା ଦିଲୀପ ପାତ୍ର, ନରୋତ୍ତମ ମହାନ୍ତ ଓ ଅବସରପ୍ରାପ୍ତ ଶିକ୍ଷକ ବେଣୁଧର ମହାନ୍ତ ପ୍ରମୁଖ ଦାବି କରିଛନ୍ତି। ରାସ୍ତା କାର୍ଯ୍ୟ ଅନିୟମିତତା ଉପରେ ଜିଲାପାଳ ଓ ଜନପ୍ରତିନିଧି ପଦକ୍ଷେପ ଗ୍ରହଣ ନ କଲେ ଅଞ୍ଚଳରେ ଏକ ବଡ଼ଧରଣର ଆନ୍ଦୋଳନ ହେବ ବୋଲି ଯୁବ ନେତାମାନେ ଚେତାବନୀ ଦେଇଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ କନିଷ୍ଠ ଯନ୍ତ୍ରୀ ମନୋଜ ମାଝିଙ୍କୁ ଫୋନ୍ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ୍ ଉଠାଇ ନ ଥିଲେ।