ଚଣ୍ଡିଖୋଲ,୨୪ା୬ (ଡିଏନଏ): ବଡଚଣା ବ୍ଲକରେ ୫-ଟି ଯୋଜନାରେ ହୋଇଥିବା ବିଦ୍ୟାଳୟ ରୂପାନ୍ତରଣ କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ନେଇ ଯୁବ କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି। ଏ ନେଇ ରାଜ୍ୟ ଯୁବ କଂଗ୍ରେସ ସମ୍ପାଦକ ସୁଦୀପ ସାମଲ ଗୁରୁବାର ଏକ ଖବରଦାତା ସମ୍ମିଳନୀରେ ଦର୍ଶାଇଛନ୍ତି ଯେ, ଅଦ୍ୟାବଧି ବ୍ଲକର ୨୬ ଉଚ୍ଚ ବିଦ୍ୟାଳୟ ୫-ଟି ଯୋଜାନରେ ରୂପାନ୍ତରିତ କାର୍ଯ୍ୟ କରାଯାଇଛି। ଯାହା ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟିତ ହୋଇଛି। ତେବେ ଉଦ୍ଘାଟିତ ହୋଇଥିବା ବିଦ୍ୟାଳୟଗୁଡିକର କାର୍ଯ୍ୟ ଅତ୍ୟନ୍ତ ନିମ୍ନମାନର କରାଯାଇଥିବା ରାଜ୍ୟ ଯୁବ କଂଗ୍ରେସ ସମ୍ପାଦକ ସାମଲ ଅଭିଯୋଗରେ ଦର୍ଶାଇଛନ୍ତ। ଏହି ଯୋଜନାରେ ନିର୍ମାଣ କରାଯାଇଥିବା ଚାରିନଙ୍ଗଳ, ଭରତପୁର, ପତରାଜପୁର, ବାଲିଚନ୍ଦ୍ରପୁର, ମଲିହାଶୁଣି ଉଚ୍ଚ ବିଦ୍ୟାଳୟରେ ଅଦ୍ୟାବଧି ପାଇଖାନାଟିଏ ନାହିଁ। ସରକାରଙ୍କ ଏହି ଯୋଜନାରେ ବିଜ୍ଞାନ ପରୀକ୍ଷାଗାର, ପାଠାଗାର, ବିଦ୍ୟାଳୟ ଗୃହ, ସ୍ବଚ୍ଛ ପାନୀୟ ଜଳ, ଖେଳପଡିଆ ଆଦି ନିର୍ମାଣ କରାଯିବା ନିୟମ ରହିଛି। ହେଲେ ଠିକା ସଂସ୍ଥାକୁ ଅନୁକମ୍ପାକୁ ଦେଖାଇବାକୁ ଯାଇ ବିଦ୍ୟାଳୟ ଗୃହଗୁଡିକୁ ରଙ୍ଗ କରାଯିବା ସହ ଟାଇଲ ବିଛାଇ ଅର୍ଥ ହରିଲୁଟ କରାଯାଇଛି। ଅର୍ଥ ହରିଲୁଟରେ ଠିକାଦାରଙ୍କ ସହ ବଡଚଣା ବିଡିଓ, ଯନ୍ତ୍ରୀମାନେ ସାମିଲ ଥିବା ସାମଲ ଅଭିଯୋଗ କରିଛନ୍ତି। ଅନେକ ବିଦ୍ୟାଳୟ ଆଦୌ ନିର୍ମାଣ କାର୍ଯ୍ୟ ସରି ନ ଥିବା ବେଳେ ଓ କେତେଗୋଟି ବିଦ୍ୟାଳୟରେ ପୁରଣା ଜିନିଷକୁ ରଙ୍ଗମାରି ନୂଆ ଦର୍ଶାଯାଇଥିବା ସେ ଅଭିଯୋଗ କରିଛନ୍ତି। ଏହାର ଉଚ୍ଚସ୍ତରୀୟ ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି। ଯଦି ଏ ନେଇ କୌଣସି କାର୍ଯ୍ୟାନୁଷ୍ଠାନ ନିଆ ନ ଯାଏ ତାହା ହେଲେ ସେ ୫-ଟି ସଚିବ ଜିଲାପାଳଙ୍କ ଦ୍ୱାରସ୍ଥ ହେବା ସହ ଯୁବ କଂଗ୍ରେସ ଆନ୍ଦୋଳନକୁ ଓହ୍ଲାଇବ ବୋଲି ଚେତାବନୀ ଦେଇଛି। ତେବେ ଏ ନେଇ ବଡଚଣା ବିଡିଓ ଅଜିତ ନାରାୟଣ ଗିରିଙ୍କୁ ପଚାରିବାରୁ କେତେଗୋଟି ବିଦ୍ୟାଳୟ କାମ ଶେଷ ହୋଇଯାଇଛି। ଆଉ କେତେଜଣ ବିଦ୍ୟାଳୟର ଯଦିଓ କିଛି ବାକି ରହିଛି ତାହା ଖୁବ୍ ଶୀଘ୍ର ଶେଷ କରାଯିବ। ଏଥିରେ କୌଣସି ଅନିୟମିତତା ହୋଇନାହଁି ବୋଲି ବିଡିଓ ଗିରି ସୂଚନା ଦେଇଛନ୍ତି।