ଯୋଡ଼ା, ୬ା୨ (ଡି.ଏନ.ଏ.) କେନ୍ଦୁଝର ଜିଲା ଯୋଡ଼ା ପୌରପାଳିକା ଅଧୀନରେ ଥିବା ଏକ ସଚଳ ବୋଲେରୋକୁ ପୌରପାଳିକା ପକ୍ଷରୁ ଅତିକମ୍ ମୂଲ୍ୟରେ ନିଲାମ ଦିଆଯାଇଛି। ଏଥିରେ ଅନିୟମିତତା କରାଯାଇଥିବା ଯୋଡା ନଗର ଭାଜପା ପକ୍ଷରୁ ଅଭିଯୋଗ ହୋଇଛି। ଯୋଡା ନଗର ଭାଜପା ସଭାପତି ସୁଶାନ୍ତ କୁମାର ବେବର୍ତ୍ତା କହିଛନ୍ତି, ସମ୍ପୂର୍ଣ୍ଣ ସଚଳ ଗାଡିଟି ଦୀର୍ଘ ୧୨ବର୍ଷରୁ ଊର୍ଦ୍ଧ୍ୱ ଧରି ପୌରପାଳିକାରେ ସେବା ଯୋଗାଇ ଆସୁଥିଲା। ଗତ କିଛିଦିନ ତଳେ ଉକ୍ତ ବୋଲେରୋରେ ୪ଟି ନୂତନ ଚକା ଲଗାଯାଇଥିଲା। ଏପରି କେଉଁ ପରିସ୍ଥିତି ଉପୁଜିଲା ଯେ ସଚଳ ବୋଲେରୋକୁ ଅତିକମ୍ ମୂଲ୍ୟରେ ନିଲାମ କରିବାକୁ ପଡିଥିଲା। ବେବର୍ତ୍ତା ଅଭିଯୋଗ କରିଛନ୍ତି, କବାଡି ବାଲାକୁ କିଲୋଗ୍ରାମ ହିସାବରେ ବିକ୍ରି କରାଯାଇଥିଲେ ନିଲାମ ମୂଲ୍ୟ ଠାରୁ ଅଧିକ ମୂଲ୍ୟ ମିଳିଥାନ୍ତା। ଯେତେବେଳେ କି ପୌରପାଳିକା ପକ୍ଷରୁ ଏହାକୁ ୩୦ହଜାର ଟଙ୍କାରେ ନିଲାମ କରାଯାଇଛି। ଏନେଇ ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ବିଚିତ୍ରାନନ୍ଦ ନାୟକ କହିଛନ୍ତି, ବୋଲେରୋ ୧୫ ବର୍ଷ ପୁରୁଣା ହୋଇଯାଇଥିଲା। ଏମଭିଆଇଙ୍କ ମୂଲ୍ୟାଙ୍କନ ଅନୁଯାୟୀ ୨୭ ହଜାର ହୋଇଥିବା ବେଳେ ଏହା ୩୦ ହଜାର ନିଲାମ ଡାକ ଦେଇ ବିକ୍ରି ହୋଇଯାଇଥିଲା। ଏହି ନିଲାମ ଗତ ଜାନୁୟାରୀ ୧୨ ତାରିଖରେ ହୋଇଥିଲା। ପ୍ରତି ୧୫ ବର୍ଷରେ ସରକାରୀ ଗାଡିଗୁଡିକ ନିଲାମ କରାଯାଏ ବୋଲି ନାୟକ ସୂଚନା ଦେଇଛନ୍ତି। ଅପରପକ୍ଷେ ବଡବିଲସ୍ଥିତ ଏଆରଟିଓ ଏସ.ମାଝି ପ୍ରତିକ୍ରିୟାରେ କହିଛନ୍ତି ଯେ, ଏହି ଗାଡ଼ିର ମୂଲ୍ୟାଙ୍କନ ବଡବିଲ ଆଞ୍ଚଳିକ ପରିବହନ ବିଭାଗ ପକ୍ଷରୁ କରାଯାଇଥିଲା। ତେଣେ ଏନେଇ ଯୋଡ଼ାରେ ଗାଡ଼ି ନିଲାମରେ ଚଞ୍ଚକତା ହୋଇଥିବା ଚର୍ଚ୍ଚା ଜୋର ଧରିଥିବା ବେଳେ ଭାଜପା ପକ୍ଷରୁ ଏହାର ତଦନ୍ତ ପାଇଁ ଦାବି କରାଯାଇଛି।