ଯାଜପୁର ଅଫିସ,୧୦ା୧: ଯାଜପୁର ଜିଲାରେ ଧାନ ସଂଗ୍ରହ ପ୍ରକ୍ରିୟାରେ ଚାଷୀଙ୍କ ନାମ ପଞ୍ଜୀକରଣରେ ପୁଣି ବିଭାଗୀୟ ଅଧିକାରୀଙ୍କ ଅନିୟମିତତା ଓ ଅବହେଳା ପଦାରେ ପଡିଛି। ପ୍ରାଥମିକ ସେବା ସମବାୟ ସମିତି (ପାକ୍ସ) ସମ୍ପାଦକଙ୍କ ଲାଭଖୋର୍ ମନୋଭାବ ଯୋଗୁ ଜିଲାର ଚାଷୀଙ୍କ ଜମି ଉପଯୁକ୍ତ ଭାବେ ପଞ୍ଜୀକୃତ ହୋଇ ନ ଥିବା ଅଭିଯୋଗ ହୋଇଛି। ଏହି ଅଭିଯୋଗ ଉପରେ ରାଜ୍ୟ ସମବାୟ ସମିତି ନିବନ୍ଧକ କାର୍ଯ୍ୟାଳୟରୁ ଉପନିବନ୍ଧକ ୭ ଦିନ ମଧ୍ୟରେ ଆବଶ୍ୟକ ତଦନ୍ତ କରି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ତେବେ ପୂର୍ବରୁ ବଡ଼ଚଣା ପାକ୍ସରେ ଚାଷୀଙ୍କ ନାମରେ ଟୋକନ ଜାଲିଆତି, ମାର୍କଣ୍ଡପୁର ପାକ୍ସରେ ଋଣ ପ୍ରଦାନରେ ଅନିୟମିତତା, ଧନେଶ୍ୱର ପାକ୍ସରେ ଚାଷୀଙ୍କ ପାଉଣା ପ୍ରଦାନରେ ବିଳମ୍ବ ଆଦି ଅବହେଳା ଉପରେ କାର୍ଯ୍ୟାନୁଷ୍ଠାନ କେବଳ ନିର୍ଦ୍ଦେଶରେ ସୀମିତ ରହିଥିବାରୁ ଏହି ଅଭିଯୋଗ ମଧ୍ୟ ଫାଇଲ ତଳେ ଚାପି ହୋଇ ରହିବ ବୋଲି ଚାଷୀ ମହଲରେ ମତପ୍ରକାଶ ପାଇଛି।
ଚଳିତ ବର୍ଷ ୧୧୩୯୭୦୫.୮୮ କୁଇଣ୍ଟାଲ ଧାନ ସଂଗ୍ରହ ପାଇଁ ଧାର୍ଯ୍ୟ କରାଯାଇଛି। ୧୨୨ ଟି ପାକ୍ସ ଓ ୩୩ ମହିଳା ସ୍ବୟଂ ସହାୟକ ଗୋଷ୍ଠୀ ଏଥିରେ ଭାଗ ନେଇଥିବାବେଳେ ୫୦୨୨୯ ଜଣ ଚାଷୀ ନାମ ପଞ୍ଜୀକରଣ କରିଛନ୍ତି ବୋଲି ଜିଲା ଯୋଗାଣ ବିଭାଗ ପକ୍ଷରୁ ସୂଚନା ମିଳିଛି। ତେବେ ଜିଲାର ପ୍ରଧାନପଡ଼ା ପାକ୍ସରେ ଚାଷୀ ପଞ୍ଜୀକରଣରେ ଅନିୟମିତତା ହୋଇଥିବା ଚାଷୀ ହୃଷୀକେଶ ସାହୁ ଓ ଅନ୍ୟମାନେ ଅଭିଯୋଗ କରିଛନ୍ତି। ସେହିପରି ଶୋଖର ଗ୍ରାମ ପଞ୍ଚାୟତ ଚାଷୀମାନଙ୍କ ନାମ ପଞ୍ଜୀକରଣ ଉପରେ ସନ୍ତୋଷ କୁମାର ସାହୁ ଓ ଅନ୍ୟମାନେ, ବିଗିରିଆ ପାକ୍ସରେ ଅମୃତିଆ ଗ୍ରାମର ଉଜ୍ଜଳିନୀ ମହାପାତ୍ର ଓ ଶୁକଦେବ ବେହେରା ପ୍ରମୁଖ ଚାଷୀ ପଞ୍ଜୀକରଣରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ ଜମିର ପଟ୍ଟା, ଆଧାର କାର୍ଡ, ବ୍ୟାଙ୍କର ପାସ୍ବୁକ୍ ଦେଇ ଚାଷୀଙ୍କ ନାମ ପଞ୍ଜୀକରଣ କରିବାକୁ ଉଜ୍ଜଳିନୀ, ପାର୍ବତୀ ବେହେରା, ରଘୁନାଥ ବେହେରା ପ୍ରମୁଖ ଆବେଦନ କରିଥିଲେ। ସରକାରୀ ବୋରୱେଲରେ ପାଣି ମଡାଇ ଏହି ଚାଷୀମାନେ ଚାଷ କରିଥାନ୍ତି। କିନ୍ତୁ ଏହି ପାକ୍ସରେ ଚାଷ ହେଉ ନ ଥିବା ଜମିକୁ ଦେଖାଇ କେତେଜଣ ଲୋକଙ୍କଠାରୁ ହାତଗୁଞ୍ଜା ନେଇ ଚାଷୀଙ୍କ ନାମ ପଞ୍ଜୀକରଣ କରାଯାଇଛି। କିନ୍ତୁ ସେମାନଙ୍କ ସମସ୍ତ ଜମିରେ ଚାଷ ହେଉଥିଲେ ହେଁ ୨୧ ଏକରରୁ ମାତ୍ର ୧୦ ଏକର ଜମିର ପଞ୍ଜୀକରଣ କରାଯାଇଛି ବୋଲି ଅଭିଯୋଗ ହୋଇଛି।
ଚାଷୀଙ୍କ ନାମ ପଞ୍ଜୀକରଣରେ ଦୁର୍ନୀତି ଯାଜପୁର ଜିଲାରେ ନୂଆ କଥା ନୁହେଁ। ପୂର୍ବରୁ ମାର୍କଣ୍ଡପୁର ପ୍ୟାକ୍ସରେ ୪ ଜଣ ଚାଷୀଙ୍କ ନାମରେ ଅଧିକ ଜମି ଦେଖାଇ ପ୍ରାୟ ୨୦ ଲକ୍ଷ ଟଙ୍କା ହରିଲୁଟ୍ ହୋଇଥିଲା। ପୂର୍ବରୁ ୧୪ଟି ପ୍ୟାକ୍ସର ପ୍ରାୟ ୧୫୦୦ ଚାଷୀ ପଞ୍ଜୀକରଣରୁ ବାଦ୍ ପଡିଥିବା ନଜିର ରହିଛି। ପଞ୍ଜୀକରଣ ଦାୟିତ୍ୱରେ ଥିବା ସମ୍ପୃକ୍ତ ପ୍ୟାକ୍ସର ସମ୍ପାଦକମାନଙ୍କ ଅବହେଳା ଯୋଗୁ ଏଭଳି ସମ୍ବେଦନଶୀଳ ପରିସ୍ଥିତି ସୃଷ୍ଟି ହୋଇ ଆସୁଛି ା ଜିଲାରେ ଯେତେସବୁ ଅଭିଯୋଗ ହେଉଥିଲେ ହେଁ ଠିକ୍ କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଚାଷୀଙ୍କ ପ୍ରତି ମନମାନି ବଢିବାରେ ଲାଗିଛି ବୋଲି ମତପ୍ରକାଶ ପାଇଛି। ଏ ସଂକ୍ରାନ୍ତରେ ଯାଜପୁର ଏଆର୍ସିଏସ୍ ପ୍ରଶାନ୍ତ କୁମାର ମଲ୍ଲିକଙ୍କୁ ପଚାରିବାରେ ସେ କହିଛନ୍ତି, ଅଭିଯୋଗ ଅନୁସାରେ ତଦନ୍ତ ଚାଲିଛି। ତଦନ୍ତ ପରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ।