କେନ୍ଦ୍ରାପଡା ଅଫିସ୍/ଡେରାବିଶ (ସ୍ବ.ପ୍ର,), ୧୪।୯: କେନ୍ଦ୍ରାପଡା ଜଳସମ୍ପଦ ବିଭାଗ ଅଧୀନ ଡେରାବିଶ ବ୍ଲକ ବେଣୀପୁରଠାରେ ବିରୂପା ନଦୀ ଘେରିବନ୍ଧ ଗତ ବନ୍ୟାରେ ଭାଙ୍ଗିଯାଇଛି। ପ୍ରାୟ ୧୦୦ଫୁଟର ଏହି ଘାଇ ବିଭାଗ ପକ୍ଷରୁ ମରାମତି ଆରମ୍ଭ ହୋଇଥିବା ବେଳେ ନିର୍ମାଣ କାର୍ଯ୍ୟରେ ଅନିୟମିତତା ହେଉଥିବା ଆଲୋଚନା ହେବା ସହ ତଦନ୍ତ ପାଇଁ ଅଞ୍ଚଳବାସୀ ଦାବି କରିଛନ୍ତି। ଏ ନେଇ ଜଳସମ୍ପଦ ବିଭାଗ ସଚିବ, ମନ୍ତ୍ରୀଙ୍କ ଦୃଷ୍ଟି ଆକର୍ଷଣ ପାଇଁ ସ୍ଥାନୀୟ ଅଞ୍ଚଳବାସୀ ଏକ ଅଭିଯୋଗ ପତ୍ର ଶନିବାର ଇମେଲ ଯୋଗେ ପଠାଇଛନ୍ତି।
ଏ ସମ୍ପର୍କରେ ସ୍ଥାନୀୟ ଅଞ୍ଚଳର ବାନାମ୍ବର ସାହୁ ସୂଚନା ଦେଇଛନ୍ତି, ଘାଇ ମରାମତିରେ ବାଲିବସ୍ତା ପକାଯାଉଛି। ମରାମତି ପାଇଁ ହେଉଥିବା ଖର୍ଚ୍ଚ ସମ୍ପର୍କରେ କୌଣସି ସୂଚନାଫଳକ ଲଗାଯାଇନାହିଁ। ଘାଇ ମରାମତିରେ ଅନିୟମିତତା ହେଉଥିବାରୁ ଆସନ୍ତାବର୍ଷ ପୁଣି ବନ୍ୟା ହେବା ଆଶଙ୍କା ଦେଖାଦେଇଛି। ଫଳରେ ପ୍ରାୟ ୭୦୦ ପରିବାରଙ୍କ ଜୀବନ ବିପଦାପୂର୍ଣ୍ଣ ଅଛି। ତୁରନ୍ତ ଏହି କାର୍ଯ୍ୟର ତଦନ୍ତ କରାଯାଇ ନଦୀବନ୍ଧକୁ ସୁଦୃଢ଼ କରାଯାଉ ବୋଲି ସେ ପ୍ରକାଶ କରିଛନ୍ତି।
ବୁଦ୍ଧିଜୀବୀ ପ୍ରମୋଦ କୁମାର ସ୍ବାଇଁ କହିଛନ୍ତି ଯେ, ୪୫ ବର୍ଷ ଧରି ଏହି ଘେରିବନ୍ଧରେ କୌଣସି ମରାମତି କାର୍ଯ୍ୟ ହୋଇ ନ ଥିବା ବେଳେ ଘାଇ ହୋଇ ନ ଥିଲା। ୨୦୧୮-୧୯ ଆର୍ଥିକ ବର୍ଷରେ ଏହି ସ୍ଥାନରେ ୧.୪ କୋଟି ଟଙ୍କା ମାଟି କାର୍ଯ୍ୟ ଓ ୪.୫ କୋଟି ଟଙ୍କାର ପଥର କାମ ହୋଇଥିଲା। ପ୍ରାୟ ୬ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ମାତ୍ର ୬ ମାସ ମଧ୍ୟରେ ବନ୍ୟାପାଣି ଆସିବାରୁ ଘାଇ ସୃଷ୍ଟି ହୋଇଛି। ନଦୀବନ୍ଧ ସୁଦୃଢ଼ୀକରଣ ବଦଳରେ ଠିକାଦାର ଦୁର୍ବଳ କରି ଦେଇଥିବା ଏଥିରୁ ସ୍ପଷ୍ଟ ଜଣାପଡୁଛି। ଏବେ ମରାମତି କାର୍ଯ୍ୟ ସମ୍ପୃକ୍ତ ଠିକାଦାରଙ୍କୁ ଦିଆଯାଇଥିବା ବେଳେ ମରାମତି ଆରମ୍ଭରୁ ଅନିୟମିତତା କରାଯାଉଥିବାରୁ ତୁରନ୍ତ ତଦନ୍ତ କରାଯିବାର ଆବଶ୍ୟକତା ରହିଛି। ଏ ନେଇ ଜିଲା ଜଳସମ୍ପଦ ବିଭାଗକୁ ସୂଚନା ଦିଆ ଯାଇଥିଲେ ମଧ୍ୟ ସୁଫଳ ନ ମିଳିବାରୁ ବିଭାଗୀୟ ମନ୍ତ୍ରୀ ଓ ସଚିବଙ୍କ ଦୃଷ୍ଟି ଆକର୍ଷଣ କରାଯାଇଥିବା ସ୍ବାଇଁ ଦର୍ଶାଇଛନ୍ତି। ଏ ସମ୍ପର୍କରେ ବିଭାଗୀୟ ନିର୍ବାହୀ ଯନ୍ତ୍ରୀ ପ୍ରବୋଧ କୁମାର ରାଉତ କହିଛନ୍ତି ଯେ, ପୂର୍ବରୁ ଏହି ସ୍ଥାନରେ ମରାମତି କାର୍ଯ୍ୟ ଓସିସି କରିଥିଲା। ଘାଇ ମରାମତି ଦାୟିତ୍ୱ ସେହି କମ୍ପାନୀଙ୍କୁ ଦିଆଯାଇଛି। ଅନିୟମିତତା ଅଭିଯୋଗକୁ ନେଇ ବିଭାଗୀୟ ତଦନ୍ତ ହେବ ବୋଲି ନିର୍ବାହୀ ଯନ୍ତ୍ରୀ ରାଉତ ପ୍ରକାଶ କରିଛନ୍ତି।