ଝାରସୁଗୁଡ଼ା ଅଫିସ,୨୬।୧୧: ଲଖନପୁର ବ୍ଲକ୍ ବନ୍ଧବାହାଲ ପଞ୍ଚାୟତ ପକ୍ଷରୁ ଏକ ମାର୍କେଟ କମ୍ପ୍ଲେକ୍ସ ନିର୍ମାଣ କରାଯାଇ ଦୋକାନ ଘର ବଣ୍ଟନ ପାଇଁ ସର୍ବସାଧାରଣଙ୍କ ଉଦ୍ଦେଶ୍ୟରେ ନୋଟିସ୍ ଜାରି ହୋଇଛି। ହେଲେ ଏଥିରେ ଥିବା ସର୍ତ୍ତାବଳୀ ବାହାରେ ଆବେଦନକାରୀଙ୍କ ନିକଟରୁ ୨୫ହଜାର ଟଙ୍କା ଅଗ୍ରିମ ନିଆଯାଉଛି। ଯେଉଁମାନେ ଏହି ଅର୍ଥ ଜମାକରି ନ ପାରିବେ ସେମାନେ ଆବଣ୍ଟନ ପ୍ରକ୍ରିୟାରେ ଅଂଶଗ୍ରହଣ କରିପାରିବେ ନାହିଁ ବୋଲି ପଞ୍ଚାୟତ ପକ୍ଷରୁ କୁହାଯାଉଛି। ଏହି ଅର୍ଥ ଯୋଗାଡ କରି ନ ପାରି ପଞ୍ଚାୟତର ବହୁ ଆଶାୟୀ ବ୍ୟକ୍ତି ଆବେଦନରୁ ବଞ୍ଚିତ ହୋଇଛନ୍ତି।
ସର୍ତ୍ତାବଳୀ ବାହାରେ କାହିଁକି ଏଭଳି ନିୟମ କରାଯାଇଛି ବୋଲି ବଞ୍ଚିତ ଆବେଦନକାରୀ ଲକ୍ଷ୍ମୀକାନ୍ତ ସାହୁ ପ୍ରଶ୍ନ କରିଛନ୍ତି। ଏହି ସମ୍ପର୍କରେ ପଞ୍ଚାୟତ ନିର୍ବାହୀ ଅଧିକାରୀ ପ୍ରଦୀପ ନାଏକ କହିଛନ୍ତି, ପଞ୍ଚାୟତ ବୈଠକ ନିଷ୍ପତ୍ତି ଅନୁଯାୟୀ ଏହି ଅର୍ଥ ଆବେଦନକାରୀଙ୍କ ନିକଟରୁ ନିଆଯାଉଛି, ପରେ ସେମାନଙ୍କୁ ଫେରାଇ ଦିଆଯିବ। ଏ ନେଇ ବିଡିଓ ଜୟନ୍ତ ସାହୁ ଆବେଦନକାରୀଙ୍କ ନିକଟରୁ ପ୍ରଥମେ ଅଗ୍ରିମ ହିସାବରେ ନେବା କଥା ନୁହେଁ ବୋଲି କହିଛନ୍ତି। ଏ ନେଇ ଲୋକେ ଜିଲା ପଞ୍ଚାୟତ ଅଧିକାରୀଙ୍କ ଦୃଷ୍ଟିକୁ ଆଣିଛନ୍ତି।
ସୂଚନା ଅନୁସାରେ ପଞ୍ଚାୟତ ତରଫରୁ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଏକ ମାର୍କେଟ କମ୍ପ୍ଲେକ୍ସ ନିର୍ମାଣ ହୋଇଛି। ଏଥିରେ ସମୁଦାୟ ୧୧ ଦୋକାନ ଘର ରହିଛି। ଏହାକୁ ଆବଣ୍ଟନ ପାଇଁ ପଞ୍ଚାୟତ ତରଫରୁ ନୋଟିସ୍ ଜାରି କରାଯାଇଛି। ବିଧବା, ରାଶନ କାର୍ଡଧାରୀ, ଦିବ୍ୟାଙ୍ଗ ବ୍ୟକ୍ତି ଆବେଦନ କରିପାରିବେ ବୋଲି ଦର୍ଶାଯାଇଛି। ଆବେଦନ ସମୟସୀମା ୧୫ରୁ ୨୫ତାରିଖ ପର୍ଯ୍ୟନ୍ତ ରହିଥିଲା। ଯେଉଁମାନେ ଦୋକାନ ପାଇବେ ସେମାନେ ପଞ୍ଚାୟତ ନିକଟରେ ୨୫ହଜାର ଟଙ୍କା ଜମା କରିବା ସହିତ କେତେକ ସର୍ତ୍ତକୁ ନେଇ ପଞ୍ଚାୟତ କର୍ତ୍ତୃପକ୍ଷଙ୍କ ସହିତ ଚୁକ୍ତି କରିବେ। ପରେ ଲଟେରି ମାଧ୍ୟମରେ ଆବେଦନକାରୀ ଦୋକାନ ଘର ପାଇପାରିବେ। ମାର୍କେଟ କମ୍ପ୍ଲେକ୍ସ ତଳ ଦୋକାନ ପାଇଁ ମାସିକ ୧୫ଶହ ଓ ଉପର ଦୋକାନ ଲାଗି ୧୨ଶହ ଟଙ୍କା ଭଡ଼ା ରହିଛି। ପ୍ରତ୍ୟେକ ଦୋକାନ ଘର ପାଇଁ ପୃଥକ୍ ଭାବେ ଲୋକେ ଆବେଦନ କରିଛନ୍ତି। ହେଲେ ଜାରି ହୋଇଥିବା ନୋଟିସ୍ରେ ଏହା ଉଲ୍ଲେଖ ନାହିଁ। ଏ ନେଇ ନିର୍ବାହୀ ଅଧିକାରୀ ନାଏକ ଆବେଦନକାରୀଙ୍କୁ ମୌଖିକ ଭାବେ କହୁଛନ୍ତି। ଏଥିରେ ଜିଲାପାଳ ହସ୍ତକ୍ଷେପ କରି ପୁନଃ ଆବଣ୍ଟନ ପାଇଁ ନିର୍ଦ୍ଦେଶ ଦେବାକୁ ଆଶାୟୀମାନଙ୍କ ତରଫରୁ ଅନୁରୋଧ କରାଯାଇଛି ା