ନୂଆପଡ଼ା,୯ା୧୨(ମକାରୁ ବେମାଲ): ନୂଆପଡ଼ା ଜିଲାରେ ଧାନକିଣାରେ ଅବ୍ୟବସ୍ଥାକୁ ନେଇ ସୋମବାର ପୃଥକ୍ ୩ ସ୍ଥାନରେ ଚାଷୀ ରାସ୍ତାକୁ ଓହ୍ଲାଇଥିଲେ। ନୂଆପଡ଼ା ସଦର ବ୍ଲକ୍ର ସୁନସୁନିଆ, ଦର୍ଲିମୁଣ୍ଡା ଓ ଗୋଡ଼ଫୁଲା ଛକଠାରେ ବିଜୁ ଏକ୍ସପ୍ରେସ୍ ୱେକୁ ଚାଷୀମାନେ ଅବରୋଧ କରିଥିଲେ। ସେହିପରି ଖରିଆର ରୋଡ୍ ଅଞ୍ଚଳର ଚାଷୀ ଜିଲାପାଳଙ୍କ କାର୍ଯ୍ୟାଳୟ ଘେରାଉକରି ଧାରଣାରେ ବସିଥିଲେ ା ଗୋଡ଼ଫୁଲାଠାରେ ଚାଲିଥିବା ଆନ୍ଦୋଳନ ସମାଧାନ କରିବାକୁ ଯାଇଥିବା ଅତିରିକ୍ତ ଜିଲା ଯୋଗାଣ ଅଧିକାରୀ ତ୍ରିନାଥ ଭୋଇଙ୍କୁ ଧାରଣାକାରୀ ୪ ଘଣ୍ଟା ଖରାରେ ବସାଇବା ସହ ୩ କି.ମି. ଚଲାଇ ନୂଆପଡ଼ା ପର୍ଯ୍ୟନ୍ତ ଆଣିଥିଲେ।
ଏଠାରେ ରାସ୍ତା ଅବରୋଧ ସମୟରେ ଖରିଆର ରୋଡ୍ ମିଲ୍ର ୨ ଜଣେ ମିଲର ସମାଧାନ କରିବା ପାଇଁ ଆସିଥିବାବେଳେ ଚାଷୀମାନେ ତାଙ୍କୁ ଧକ୍କାମାରି ତଡ଼ିଦେଇଥିଲେ। ୪ଘଣ୍ଟା ଧାରଣାରେ ବସିବା ପରେ ଉପଜିଲାପାଳ ଯୋଗେନ୍ଦ୍ର ମାଝି, ଜିଲା ଯୋଗାଣ ଅଧିକାରୀ ପ୍ରଦ୍ୟୁମ୍ନ କୁମାର ରାଉତରାୟ ଓ ଡିଆର୍ସିଏସ୍ ଶିବପ୍ରସାଦ ସ୍ବାଇଁ ଘଟଣାସ୍ଥଳରେ ପହଞ୍ଚତ୍ ଧାରଣାକାରୀଙ୍କ ସହ ଆଲୋଚନାକରୀ ୨୪ ଘଣ୍ଟା ଭିତରେ ସମସ୍ତ ଚାଷୀଙ୍କ ଧାନ କ୍ରୟ କରାଯିବ। କୌଣସି ଚାଷୀଙ୍କ ଟୋକନ୍ ଲାପ୍ସ ହେବା ପାଇଁ ଦିଆଯିବ ନାହିଁ ବୋଲି ଲିଖିତ ପ୍ରତିଶ୍ରୁତି ଦେଲା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
ସୂଚନାକ୍ରମେ ପୂର୍ବରୁ ଅନୁଷ୍ଠିତ ବୈଠକରେ ଚଳିତ ବର୍ଷ ଖରିଫରେ ଜିଲାରେ ୭୭ ମଣ୍ଡି ଖୋଲାଯିବ। ପ୍ୟାକ୍ସ, ଆର୍ଏମ୍ସି,ଏଆର୍ସିଏସ୍ ଓ ଜିଲା ଯୋଗାଣ ବିଭାଗ ଧାନ କ୍ରୟ କରିବ। ଏଥିରେ କୌଣସି ଅବ୍ୟବସ୍ଥା ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଖୋଦ ଜିଲାପାଳ କହିଥିଲେ। ହେଲେ ଗତ ୨୨ତାରିଖରେ ମଣ୍ଡି ଖୋଲି ଆଜକୁ ୧୮ଦିନ ବିତି ଯାଇଥିଲେ ମଧ୍ୟ ଜିଲାରେ ୫୬ ମଣ୍ଡି ଖୋଲିନାହିଁ। ୪୬ ହଜାର ୩୪୬ ଚାଷୀଙ୍କଠାରୁ ୧୭ ଲକ୍ଷ ୮୭ ହଜାର ୬୯୧ କୁଇଣ୍ଟାଲ ଧାନ କିଣିବା ଲକ୍ଷ୍ୟ ଥିବାବେଳେ ମାତ୍ର ୬୩୧ ଚାଷୀଙ୍କ ୨୩ ହଜାର ୬୮୫ କୁଇଣ୍ଟାଲ ଧାନ ସଂଗ୍ରହ କରାଯାଇଛି। ନୂଆପଡ଼ା ବ୍ଲକ୍ରେ ବସ୍ତାଟିଏ ଧାନ କିଣାଯାଇ ନାହିଁ। ଫଳସ୍ବରୂପଏହାର ପ୍ରତିଫଳନ ଦେଖିବାକୁ ମିଳିଥିଲା। ପ୍ରଶାସନଠାରୁ ପ୍ରତିଶ୍ରୁତି ପାଇ ଚାଷୀ ଧାରଣାରୁ ଓହରିଯାଇଥିଲେ ମଧ୍ୟ ୨୪ ଘଣ୍ଟା ମଧ୍ୟରେ ଧାନ କିଣା ନ ଗଲେ ଆନ୍ଦୋଳନ ଭୟାବହ ହେବ ବୋଲି ଚେତାବନୀ ଦେଇଛନ୍ତି। ଆନ୍ଦୋଳନରେ ସରୋଜ କୁମାର ସାହୁ, ଭାନୁପ୍ରତାପ ସିଂ ମାଝି, ଭରତଲାଲ ରାଉତ, ପ୍ରସନ୍ନ କୁମାର ପାଢ଼ୀ, ଦିଲୀପ ସାହୁ, ଦିଲୀପ ନିର୍ମଲକର, ପବନ ସାହୁ, ହୋମ ସିଂ ମାଝି, କମଲେଶ ଠାକୁର, ଦେବୀ ପ୍ରସାଦ ମିଶ୍ର, ଚକଲୁ ପଣ୍ଡା, ହେମ କୁମାର ସାହୁ, ବିମଳ ସାହୁଙ୍କ ସମେତ ଶତାଧିକ ଚାଷୀ ସାମିଲ ଥିଲେ।
