ପାଟଣା,୧୭।୨(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ଟାଙ୍ଗରପଡ଼ା ପଞ୍ଚାୟତ ବାଲିବନ୍ଧ ଗ୍ରାମ ଅଙ୍ଗନଓ୍ବାଡି (କ) କେନ୍ଦ୍ର ପାଇଁ ଅଙ୍ଗନଓ୍ବାଡି କର୍ମୀ ନିଯୁକ୍ତିରେ ଅନିୟମିତତା ଅଭିଯୋଗ ହୋଇଥିଲା। ଏ ନେଇ ଗ୍ରାମର ଶତାଧିକ ମହିଳା ଫେବୃଆରୀ ୬ ତାରିଖରେ ନବ ନିଯୁକ୍ତ ଗାଲଫୁଲା ଗ୍ରାମ ରଅଙ୍ଗନୱାଡ଼ି କର୍ମୀ ସୁକାନ୍ତି ନାଏକଙ୍କୁ ଅଟକ ରଖିବା ସହ ଅଙ୍ଗନଓ୍ବାଡି କେନ୍ଦ୍ର ସମ୍ମୁଖ ଫାଟକରେ ତାଲା ପକାଇ ପ୍ରତିବାଦ କରିଥିଲେ। ପରେ ପୋଲିସ ତାଙ୍କୁ ଉଦ୍ଧାର କରିଥିଲା। ତେବେ ଏହି ଘଟଣାକୁ କିଛି ଦିନ ନପୁରୁଣୁ ଶନିବାର ପୁନର୍ବାର ସୁକାନ୍ତି ଲୁଚିଛପି ଅଙ୍ଗନଓ୍ବାଡ଼ି କେନ୍ଦ୍ରକୁ ପଶିଥିଲେ। ପରେ ଏ ନେଇ ଉତ୍ତେଜନା ପ୍ରକାଶ ପାଇଛି। ଉତ୍ୟକ୍ତ ମହିଳା ଓ ପୁରଷମାନେ ସୁକାନ୍ତିଙ୍କୁ ଘୋଷାଡ଼ି ଆଣିବା ସହ ଅଟକ ରଖିଥିଲେ। ପରେ ସୁକାନ୍ତି ପାଟଣା ଥାନାକୁ ଉଦ୍ଧାର ପାଇଁ ଫୋନ କରିଥିଲେ। ଘଟଣାସ୍ଥଳରେ ପାଟଣା ପୋଲିସ ପହଞ୍ଚିଥିଲା। ସ୍ଥାନୀୟ ଲୋକ ଓ ପୋଲିସ ମଧ୍ୟରେ ବଚସା ସହ ଠେଲାପେଲା ହୋଇଥିଲା। ପରେ ଲୋକେ ଘଟଣାସ୍ଥଳକୁ ଉପଜିଲାପାଳ ଓ ସିଡିପିଓ ଆସିବା ପରେ ସୁକାନ୍ତିଙ୍କୁ ଛାଡ଼ିବେ ବୋଲି ଜିଦ୍ରେ ଅଟଳ ରହିଥିଲେ । ଖବରପାଇ ପାଟଣା ଥାନା ଅଧୀକାରି ବିବତ୍ସ ପ୍ରଧାନ ପହଞ୍ଚି ଉତ୍ୟକ୍ତ ଲୋକଙ୍କୁ ସମସ୍ୟାର ସମାଧାନ ନହେବା ପର୍ଯ୍ୟନ୍ତ ଅଙ୍ଗନୱାଡି କେନ୍ଦ୍ରକୁ ସୁକାନ୍ତି ଆସିବେ ନାହିଁ ବୋଲି ପ୍ରତିଶ୍ରୁତି ଦେବା ପରେ ଉତ୍ତ୍ୟକ୍ତ ଲୋକେ ସୁକାନ୍ତିଙ୍କୁ ଛାଡିଥିଲେ।
ସୂଚନାଅନୁଯାୟୀ, ଉକ୍ତ ଅଙ୍ଗନଓ୍ବାଡି କେନ୍ଦ୍ରର କର୍ମୀ ଅବସର ଗ୍ରହଣ ପରେ ନୂତନ ନିଯୁକ୍ତି ପାଇଁ ଗ୍ରାମର ୩ ଜଣ ଏସ୍ସି ବର୍ଗରୁ ପ୍ରାର୍ଥୀ ହୋଇଥିବା ବେଳେ ଗାଲଫୁଲାରୁ ଏସ୍ଟି ବର୍ଗରୁ ଶୁକାନ୍ତି ନାଏକ ଆବେଦନ କରିଥିଲେ। ଗ୍ରାମର ୩ ଜଣଙ୍କ ପ୍ରାର୍ଥୀ ମଧ୍ୟରୁ ଜଣକୁ ନିଯୁକ୍ତି ଦାବିରେ ଗ୍ରାମବାସୀ ଅଟଳ ରହି ଜାନୁୟାରୀ ୨ ତାରିଖରୁ ଆଙ୍ଗନୱାଡି କେନ୍ଦ୍ରରେ ତାଲା ପକାଇଛନ୍ତି। ଫଳରେ ଏଯାବତ୍ ଅଚଳାବସ୍ଥା ଜାରି ରହିଛି।
୧ମାସରୁ ଊଦ୍ଧର୍ବ ସମୟ ହେବ ଅଙ୍ଗନୱାଡି କେନ୍ଦ୍ରରେ ତାଲା ଝୁଲୁଥିବାରୁ ୩୦ରୁ ଊଦ୍ଧର୍ବ ଛାତ୍ରୀଛାତ୍ରଙ୍କ ଭୋଜନ ବନ୍ଦ ହେବା ସହ ପାଠପଢ଼ା ଠପ୍ ହୋଇପଡ଼ିଛି। ଅନ୍ୟ ପକ୍ଷରେ ଗର୍ଭବତୀ ମହିଳାମାନେ ନିଜର ଓ ଶିଶୁର ସ୍ବାସ୍ଥ୍ୟ ସେବା ଯାଞ୍ଚ କରିବାରୁ ବଞ୍ଚିତ ହେଉଥିବା ବେଳେ ଗ୍ରାମବାସୀ ଅଚଳାବସ୍ଥା ପାଇଁ ପ୍ରଶାସନକୁ ଦାୟୀ କରିଛନ୍ତି।