ନୂଆଦିଲ୍ଲୀ,୨୬।୧୧: ଦେଶରେ ଏବେ ବିବାହ ଋତୁ ଆରମ୍ଭ ହେଉଥିବା ବେଳେ ଦେଶରେ କିଛି ବଡ଼ ଧନୀ ପରିବାର ବିଦେଶରେ ଧୁମଧାମରେ ସେମାନଙ୍କର ଡେଷ୍ଟିନେସନ୍ ୱେଡିଂ କରୁଛନ୍ତି। ତେବେ ରବିବାର ପ୍ରଧାନମନ୍ତ୍ରୀ ତାଙ୍କର ମାସିକିଆ ‘ମନ୍ କି ବାତ’ କାର୍ଯ୍ୟକ୍ରମରେ ଡେଷ୍ଟିନେସନ୍ ୱେଡିଂ ଉପରେ ପ୍ରଶ୍ନ ଉଠାଇଛନ୍ତି। ପ୍ରଧାନମନ୍ତ୍ରୀ ଅନୁରୋଧ କରିଛନ୍ତି ଯେ, ଏହିଭଳି ବଡ଼ବଡ଼ କାର୍ଯ୍ୟକ୍ରମ ଭାରତରେ କରନ୍ତୁ ଯାହା ଫଳରେ ଦେଶର ଟଙ୍କା ଦେଶରେ ରହି ଅର୍ଥନୀତିକୁ ସୁଦୃଢ଼ କରିବ।
ଏହା ସହିତ ଲୋକମାନେ ବିବାହକାର୍ଯ୍ୟ ପାଇଁ କିଣାକିଣି ସମୟରେ ଭାରତରେ ପ୍ରସ୍ତୁତ(ମେଡ ଇନ ଇଣ୍ଡିଆ) ଜିନିଷ କିଣିବାକୁ ମଧ୍ୟ ସେ ଜୋର ଦେଇଛନ୍ତି। “ବର୍ତ୍ତମାନ ବିବାହ ଋତୁ ମଧ୍ୟ ଆରମ୍ଭ ହୋଇଛି। କିଛି ବାଣିଜ୍ୟ ସଂଗଠନ ଆକଳନ କରିଛନ୍ତି ଯେ ଏହି ବିବାହ ଋତୁରେ ପ୍ରାୟ ୫ ଲକ୍ଷ କୋଟି ବ୍ୟବସାୟ ହୋଇପାରେ। ବିବାହ ପାଇଁ ସପିଂ କରୁଥିବାବେଳେ ଆପଣ ସମସ୍ତେ କେବଳ ଭାରତରେ ନିର୍ମିତ ଉତ୍ପାଦକୁ ଗୁରୁତ୍ୱ ଦେବା ଉଚିତ୍ ବୋଲି ପ୍ରଧାନମନ୍ତ୍ରୀ କହିଛନ୍ତି।