ହାଇଦ୍ରାବାଦ, ୧୨।୯ : ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ(କେସିଆର) ତାଙ୍କର ରାଜନୈତିକ ଗତି ବୃଦ୍ଧି କରୁଥିବା ଦେଖାଯାଉଛି। ସେ ରବିବାର କର୍ନାଟକର ପୂର୍ବତନ ସିଏମ ଏଚଡି କୁମାରସ୍ବାମୀଙ୍କୁ ଭେଟିଥିଲେ। ପ୍ରକାଶ ଯେ, ଏହି ସମୟ ମଧ୍ୟରେ ଉଭୟ ନେତା କଂଗ୍ରେସ ବିନା ବିରୋଧୀଙ୍କୁ ଏକଜୁଟ କରିବା ପାଇଁ ଯୋଜନା କରୁଛନ୍ତି। ବିଶେଷ କଥା ହେଉଛି ଏହି ବୈଠକ ଏପରି ଏକ ସମୟରେ ଘଟିଛି ଯେତେବେଳେ ଭାରତୀୟ ଜନତା ପାର୍ଟି ଦକ୍ଷିଣ ଭାରତୀୟ ରାଜ୍ୟରେ ନିଜର ଉପସ୍ଥିତି ବଢ଼ାଇବାକୁ ଚେଷ୍ଟା କରୁଛି।
ହାଇଦ୍ରାବାଦରେ ହୋଇଥିବା ଏହି ବୈଠକରେ ଦେଶର ରାଜନୈତିକ ପରିସ୍ଥିତି ଉପରେ ଆଲୋଚନା କରାଯାଇଥିଲା। ଗଣମାଧ୍ୟମର ରିପୋର୍ଟ ଅନୁଯାୟୀ, ବିରୋଧୀ ଏକତା ଗଠନରେ ରାଓଙ୍କ ଭୂମିକା ବିଷୟରେ ଦୁଇ ନେତା ଆଲୋଚନା କରିଥିଲେ। ତେଲେଙ୍ଗାନା ରାଷ୍ଟ୍ର ସମିତିର ଜଣେ କାର୍ଯ୍ୟକର୍ତ୍ତା କହିଛନ୍ତି ଯେ ଅଣ କଂଗ୍ରେସ ବିକଳ୍ପ ପାଇଁ ଦେଶର ଲୋକମାନେ ପ୍ରସ୍ତୁତ ଅଛନ୍ତି ଏବଂ ଭାଜପାର ମୁକାବିଲା ପାଇଁ ଆଞ୍ଚଳିକ ଦଳମାନଙ୍କୁ ଏକାଠି ହେବାକୁ ପଡ଼ିବ।
ରବିବାର ରାଓ ଜାତୀୟ ଦଳ ଆରମ୍ଭ କରିବାକୁ ଘୋଷଣା କରିଛନ୍ତି। ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି ବିବୃତ୍ତି ଅନୁଯାୟୀ ବୁଦ୍ଧିଜୀବୀ, ଅର୍ଥନୀତିଜ୍ଞ ଏବଂ ବିଶେଷଜ୍ଞଙ୍କ ସହ ଦୀର୍ଘ ଦିନ ଧରି ଆଲୋଚନା ପରେ ଜାତୀୟ ଦଳ ଗଠନ ଘୋଷଣା କରାଯାଇଛି। ଖୁବ ଶୀଘ୍ର ଏକ ଜାତୀୟ ଦଳ ଗଠନ ହେବ ଏବଂ ନୀତି ପ୍ରସ୍ତୁତ ହେବ ବୋଲି କେସିଆର କହିଛନ୍ତି। ୨୦୨୩ ମସିହାରେ ତେଲେଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହା ପୂର୍ବରୁ କେସିଆର ପ୍ରସ୍ତୁତି ଆରମ୍ଭ କରିଛନ୍ତି।
ଗତ କିଛି ମାସ ମଧ୍ୟରେ କେସିଆର ବିରୋଧୀ ଦଳର ଅନେକ ନେତାଙ୍କୁ ଭେଟିଛି। ଏହି ସମୟରେ ସେ ଦିଲ୍ଲୀ, ଚଣ୍ଡିଗଡ଼, ବେଙ୍ଗାଲୁରୁର ଏବଂ ବିହାରରେ ମଧ୍ୟ ପହଞ୍ଚିଥିଲେ। ସେ କୁମାରସୱାମୀଙ୍କଠାରୁ ମଧ୍ୟ ସମର୍ଥନ ପାଇଛନ୍ତି। ସେ କହିଛନ୍ତି ଯେ କଂଗ୍ରେସ ଭାଜପାର ବିକଳ୍ପ ହେବା ପାଇଁ ଯଥେଷ୍ଟ ଶକ୍ତିଶାଳୀ ନୁହେଁ ଏବଂ ଲୋକମାନେ ଏହାର ନେତୃତ୍ୱ ଉପରେ ବିଶ୍ୱାସ ହରାଇଛନ୍ତି।
ନିକଟରେ ବିହାରରେ ପହଞ୍ଚିଥିବା କେସିଆର ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କ ସହ ଆଲୋଚନା କରିଥିଲେ। ସେ ବାମପନ୍ଥୀ ଦଳର ସମର୍ଥନ ପାଇବାକୁ ମଧ୍ୟ ଚେଷ୍ଟା କରୁଛନ୍ତି।