ମହାମାରୀ କରୋନା ସହ ସାରା ବିଶ୍ୱ ଲଢ଼ୁଛି। ଏଭଳି ସ୍ଥିତିରେ ବାହାରୁ କିଣୁଥିବା ସାମଗ୍ରୀ ସଂକ୍ରମଣମୁକ୍ତ ନୁହେଁ। ଯାହାକୁ ନେଇ ବଜାରରୁ ଆସୁଥିବା ଜିନିଷକୁ ନେଇ ମନରେ ଅଜଣା ଭୟ ରହୁଛି। ଫଳରେ ଏହାକୁ ଅନେକ ସଫା କରିବା ନଚେତ ସାନିଟାଇଜ୍ କରିବାକୁ ଚେଷ୍ଟା କରୁଛନ୍ତି। ସେଭଳି ଏକ ନିତ୍ୟ ବ୍ୟବହାର୍ଯ୍ୟ ଜିନିଷ ହେଲା କ୍ଷୀର। ଏଣୁ ବଜାରରୁ କିଣୁଥିବା କ୍ଷୀର ପ୍ୟାକେଟ୍ କେତେଦୂର ସଂକ୍ରମଣମୁକ୍ତ ତାହା ଜାଣନ୍ତି କି?
ତେବେ ଭାରତୀୟ ଖାଦ୍ୟ ନିରାପତ୍ତା ଏବଂ ମାନକ ପ୍ରାଧିକରଣ(ଏଫ୍ଏସ୍ଏସ୍ଏଆଇ) ଏହି ଦ୍ୱିଧାକୁ ନେଇ ସ୍ପଷ୍ଟୀକରଣ ରଖିଛି। ପ୍ୟାକେଟ୍ରେ ଥିବା କ୍ଷୀର ସମ୍ପୂର୍ଣ୍ଣ ସୁରକ୍ଷିତ। ଏହା କରୋନା ସଂକ୍ରମଣ ମୁକ୍ତ। କ୍ଷୀର ପ୍ୟାକେଟ୍କୁ ସାବୁନ୍ରେ ଧୋଇବା ଭଳି ଖବର ସାମ୍ନାକୁ ଆସିବା ପରେ ଏଫ୍ଏସ୍ଏସ୍ଏଆଇ ପକ୍ଷରୁ ଏହା କୁହାଯାଇଛି। ଏଣୁ ପ୍ୟାକେଟ୍ କ୍ଷୀର ବ୍ୟବହାର କରିହେବ ବୋଲି ଲୋକମାନଙ୍କୁ କୁହାଯାଇଛି।
କ୍ଷୀର ପ୍ୟାକେଟ୍ ନେବା ସମୟରେ ସାମାଜିକ ଦୂରତା ବଜାୟ ରଖନ୍ତୁ। ଏପରିକି ଦୁଗ୍ଧ ବିକ୍ରେତା ମାସ୍କ ଲଗାଇଥିବା ସୁନିଶ୍ଚିତ କରନ୍ତୁ। ଏହି ପ୍ୟାକେଟ୍ ନେବା ପରେ ନିଜ ହାତକୁ ଭଲ ଭାବେ ଧୋଇ ନିଅନ୍ତୁ। ପ୍ୟାକେଟ୍କୁ କେବଳ ପାଣିରେ ଧୁଅନ୍ତୁ। ଏହାକୁ ସାନିଟାଇଜ୍ କରିବା ଅଥବା ସାବୁନରେ ଧୋଇବାର ଆବଶ୍ୟକତା ନାହିଁ। ଖାଲି ପାଣି ହିଁ ଯଥେଷ୍ଟ ବୋଲି ଏଫ୍ଏସ୍ଏସ୍ଏଆଇ କହିଛି। ଏହାଛଡ଼ା ପ୍ୟାକେଟରୁ କ୍ଷୀର କାଢ଼ିବା ପରେ ହାତକୁ ଭଲ ଭାବେ ଧୁଅନ୍ତୁ। ପୁରା ଫୁଟିବା ପରେ ଏହାକୁ ବନ୍ଦ କରନ୍ତୁ ବୋଲି ମଧ୍ୟ କୁହାଯାଇଛି।