ନୂଆଦିଲ୍ଲୀ,୨୧।୨: ଇଂଲଣ୍ଡ ବିପକ୍ଷ ଟି୨୦ ସିରିଜ୍ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ୧୯ ଜଣିଆ ଦଳର ଘୋଷଣା କରିଛି। ଏଥିରେ ଆଇପିଏଲ୍ ୨୦୨୦ରେ ଦମ୍ଦାର ପ୍ରଦର୍ଶନ କରିଥିବା କିଛି ଯୁବ ଖେଳାଳିଙ୍କୁ ଦେଖିବାକୁ ମିଳିଛି। ସେଥିରୁ ଜଣେ ହେଲେ ଉଇକେଟ କିପର ଇଶାନ କିଷନ। ପ୍ରଥମ ଥର ପାଇଁ କିଷନଙ୍କୁ ଭାରତୀୟ ଦଳରେ ଜାଗା ମିଳିଛି।
ଆଇପିଏଲ୍ରେ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳୁଥିବା ଇଶାନ ଏବେ ଭଲ ଫର୍ମରେ ଅଛନ୍ତି। ଶନିବାର ଖେଳାଯାଇଥିବା ବିଜୟ ହଜାରେ ଟ୍ରଫିରେ ବିସ୍ଫୋରକ ବ୍ୟାଟିଂ କରି ଚର୍ଚ୍ଚାକୁ ଆସିଥିଲେ। ଝାରଖଣ୍ଡ ଟିମ୍ର ଏହି ଅଧିନାୟକ ମଧ୍ୟପ୍ରଦେଶ ବିପକ୍ଷରେ ୯୩ ବଲ୍ରେ ୧୭୩ ରନ୍ କରିଥିଲେ। ଏଥିରେ ୧୯ ଚୌକା ଏବଂ ୧୧ ଛକା ଥିଲା। ଇଶାନଙ୍କ ପାଳି ଯୋଗୁ ଝାରଖଣ୍ଡ ୪୨୨ରନ୍ ସ୍କୋର କରି ବିଜେତା ହୋଇଥିଲା। କେବଳ ଯେ ବ୍ୟାଟିଂ ତାହା ନୁହେଁ ଉଇକେଟ ପଛରେ ସେ ରହି ୭ କ୍ୟାଚ୍ ନେଇଥିଲେ। ମ୍ୟାଚ୍ ଜିତିବା ପରେ ସେ ଖୁସି ଥିବା ବେଳେ ଅପରାହ୍ନରେ ତାଙ୍କ ପାଇଁ ଅନ୍ୟ ଏକ ଖୁସିଖବର ଆସିଥିଲା। କାରଣ କିଛି ଘଣ୍ଟା ପରେ ଭାରତୀୟ ଚୟନକର୍ତ୍ତା ତାଙ୍କୁ ଦଳରେ ସାମିଲ କରିଥିଲେ।
