ଦୁବାଇ, ୧୩।୧୦(ପି.ଟି.):ଭେଟେରାନ ପେସ୍ ବୋଲର ଈଶାନ୍ତ ଶର୍ମା ଚଳିତ ଇଣ୍ଡିଆନ ପ୍ରିମିୟର ଲିଗ୍ରୁ ଓହରି ଯାଇଛନ୍ତି। ପଞ୍ଜରାରେ ଆଘାତ ପାଇଥିବାରୁ ସେ ଏହି ନିଷ୍ପତ୍ତି ନେଇଥିବା ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ପ୍ରକାଶ କରାଯାଇଛି। ୩୨ ବର୍ଷୀୟ ଟେଷ୍ଟ ସ୍ପେଶାଲିଷ୍ଟ ଦିଲ୍ଲୀ ପକ୍ଷରୁ ଚଳିତ ଆଇପିଏଲରେ ଗୋଟିଏ ମ୍ୟାଚ ଖେଳିଥିଲେ। ଆବୁଧାବିରେ ସନ୍ରାଇଜର୍ସ ହାଇଦ୍ରାବାଦ ବିପକ୍ଷରେ ସେ ୪ ଓଭରରେ୨୬ ରନ ଦେଇ ଉଇକେଟ ଶୂନ୍ୟ ରହିଥିଲେ। ଏହାପରେ ଦୁବାଇରେ ଦଳର ନେଟ୍ସ ସେସନରେ ବୋଲିଂ ଅବସରରେ ସେ ବାମ ପଞ୍ଜରାରେ ଯନ୍ତ୍ରଣା ଅନୁଭବ କରିଥିଲେ। ପରୀକ୍ଷା ନିରୀକ୍ଷା ପରେ ଆଭ୍ୟନ୍ତରିଣ ଭାଗରେ ମାଂଶପେସୀ ଟାଣି ଧରିଥିବା ଜଣା ପଡ଼ିଥିଲା। ଫଳରେ ଦୁର୍ଭାଗ୍ୟଜନକଭାବେ ସେ ଆଇପିଏଲର ଅବଶିଷ୍ଟ ଭାଗରୁ ବାଦ୍ ପଡ଼ିଛନ୍ତି ବୋଲି ଦିଲ୍ଲୀ ଫ୍ରାଞ୍ଚାଇଜ୍ ପକ୍ଷରୁ ପ୍ରକାଶ କରାଯାଇଛି। ପୂର୍ବରୁ ସିନିୟର ଲେଗ୍ ସ୍ପିନର ଅମିତ ମିଶ୍ର ଆହତ ଯୋଗୁ ଓହରି ଯାଇଥିଲେ। ତେଣୁ ଦିଲ୍ଲୀ କ୍ୟାପିଟାଲ୍ସ ସେମାନଙ୍କ ସ୍ଥାନରେ ବଦଳ ଖେଳାଳି ନେବା ସମ୍ଭାବନା ରହିଛି। ସଙ୍ଗଓ୍ବନ ଏବେ ଦଳସହ ୟୁଏଇରେ ଅଛନ୍ତି। ଏପରି ହେଲେ ନେଟ୍ ବୋଲର ପ୍ରଦୀପ ସଙ୍ଗଓ୍ବନଙ୍କୁ ସାମିଲ କରାଯାଇପାରେ। ଈଶାନ୍ତ କ୍ୟାରିୟରରେ ୯୭ ଟେଷ୍ଟ, ୮୦ ଦିନିକିଆ ଓ ୧୪ ଟି୨୦ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି। ଆଇପିଏଲ ପରେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତରେ ଯିବାର କାର୍ଯ୍ୟକ୍ରମ ଥିବାରୁ ଈଶାନ୍ତଙ୍କ ସାମିଲକୁ ନେଇ ଆଶଙ୍କା ପ୍ରକାଶ ପାଇଛି।