ନୂଆଦିଲ୍ଲୀ,୨୪।୬: କୋଭିଡ୍-୧୯ ମହାମାରୀ କାରଣରୁ ଦୀର୍ଘ ୩ ମାସ ପରେ ଅଭିଜ୍ଞ ଦ୍ରୁତ ବୋଲର ଈଶାନ୍ତ ଶର୍ମା ଟ୍ରେନିଂକୁ ପ୍ରତ୍ୟାବର୍ତ୍ତନ କରିଛନ୍ତି। ମଙ୍ଗଳବାର ଏ ନେଇ ସେ ନିଜ ଇନ୍ଷ୍ଟଗ୍ରାମ୍ ଆକାଉଣ୍ଟରେ ଚିତ୍ର ଓ ଭିଡିଓ ପୋଷ୍ଟ କରିଛନ୍ତି। କେତୋଟି ବେସିକ୍ ଟ୍ରେନିଂ କରିବା ସହ ସେ ଓ୍ବାର୍ମ ଅପ୍ ଡ୍ରିଲ୍ କରିଥିଲେ। ପୂର୍ବରୁ ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ମଧ୍ୟ ଟ୍ରେନିଂକୁ ଫେରିବା ନେଇ ସୂଚନା ଦେଇଥିଲେ। ଈଶାନ୍ତ ଭାରତ ପାଇଁ ୯୭ ଟେଷ୍ଟ ଖେଳି ୨୯୭ ଉଇକେଟ ହାସଲ କରିଥିଲେ। ଏଥିରେ ୧୧ଟି ୫ ଉଇକେଟ ସଫଳତା ସାମିଲ ରହିଛି। ଗତ ମାସ ସମ୍ମାନଜନକ ଅର୍ଜୁନ ପୁରସ୍କାର ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତାଙ୍କ ନାମ ସୁପାରିସ୍ କରିଛି।
ଟେଷ୍ଟରେ ଯଶପ୍ରୀତ ବୁମ୍ରା, ମହମ୍ମଦ ସାମିଙ୍କ ସହ ଈଶାନ୍ତ ଭାରତୀୟ ଦ୍ରୁତ ବୋଲିଂ ବିଭାଗର ଦାୟିତ୍ୱ ବହନ କରୁଛନ୍ତି। ଏ ୩ ବୋଲରଙ୍କୁ ନେଇ ଗଠିତ ଭାରତୀୟ ଦ୍ରୁତ ବୋଲିଂ ଏବେ ବିଶ୍ୱର ଶ୍ରେଷ୍ଠ ବିବେଚିତ ହେଉଛି। ଈଶାନ୍ତ ଭାରତ ପାଇଁ ଦିନିକିଆ କିମ୍ବା ଟି୨୦ ମ୍ୟାଚ୍ ଖେଳୁନାହାନ୍ତି। ଆଗକୁ ଆୟୋଜନ ହେବାକୁ ଥିବା ଅଷ୍ଟ୍ରେଲିଆ ଗସ୍ତ ପାଇଁ ସେ ଟେଷ୍ଟ ଦଳରେ ସାମିଲ ହେବେ। ଏହି ଗସ୍ତରେ ଭାରତ ୪ଟି ଟେଷ୍ଟ ମ୍ୟାଚ୍ ଖେଳିବ। ଆଗାମୀ ଡିସେମ୍ବରରେ ଏହି ୪ ମ୍ୟାଚ୍ ବିଶିଷ୍ଟ ବହୁଚର୍ଚ୍ଚିତ ଟେଷ୍ଟ ସିରିଜ ଖେଳାଯିବ। ଆଡିଲେଡ୍ରେ ଡିସେମ୍ବର ୧୧ ତାରିଖରୁ ଖେଳାଯିବାକୁ ଥିବା ଦ୍ୱିତୀୟ ଟେଷ୍ଟ ମ୍ୟାଚ୍ ଦିବାରାତ୍ର ଭିତ୍ତିକ ହେବ। ପ୍ରଥମ ଟେଷ୍ଟ ଡିସେମ୍ବର ୩ ତାରିଖରୁ ଆରମ୍ଭ ହେବ। ସେହିପରି ତୃତୀୟ ଓ ଚତୁର୍ଥ ଟେଷ୍ଟମ୍ୟାଚ୍ ଡିସେମ୍ବର ୨୬ ଓ ଜାନୁୟାରୀ ୩ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି।
