ଝରିଗାଁ, ୧୩।୪(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକର ବିବାଦୀୟ ଇଚ୍ଛାପୁର ପଞ୍ଚାୟତ କାର୍ଯ୍ୟାଳୟକୁ ପୁଣି ଥରେ କେହି ଦୁର୍ବୃତ୍ତ ଭାଙ୍ଗିଦେଇଛନ୍ତି। ଏ ନେଇ ପିଇଓ ଛବିଲାଲ ସାହୁ ଝରିଗାଁ ଥାନାରେ ଏତଲା ଦେଇଛନ୍ତି। ଝରିଗାଁ ପୋଲିସ କେସ୍ ନଂ. ୮୪/୨୩ରେ ମାମଲା ରୁଜୁକରି ଘଟଣାର ତଦନ୍ତ କରୁଛି।
ସୂଚନାନୁଯାୟୀ, ୧୩ବର୍ଷ ତଳେ ଇଚ୍ଛାପୁରକୁ ନୂତନ ପଞ୍ଚାୟତଭାବେ ଘୋଷଣା କରାଯାଇଥିଲା। ପଞ୍ଚାୟତ କାର୍ଯ୍ୟାଳୟ ସ୍ଥାପନ ନେଇ ପଞ୍ଚାୟତବାସୀ ୨ଭାଗ ହୋଇ ଭିନ୍ନ ଭିନ୍ନ ସ୍ଥାନରେ ଅଫିସ କରିବାକୁ ଅଡ଼ି ବସିଥିଲେ। ପ୍ରଶାସନ ସମାଧାନ ଚେଷ୍ଟା କରି ବିଫଳ ହୋଇଥିଲା। ଇଚ୍ଛାପୁର ସାପ୍ତାହିକ ବଜାରରେ ଏକ ଅସ୍ଥାୟୀ ଘରେ ପଞ୍ଚାୟତ କାର୍ଯ୍ୟାଳୟ ଚାଲିଥିଲା। ଗାଁର କେତେଜଣ ବ୍ୟକ୍ତି କରଲାମାଲରେ ପଞ୍ଚାୟତ ଗୃହ ନିର୍ମାଣ କାର୍ଯ୍ୟ ଆରମ୍ଭ କରିଦେଇଥିଲେ। କୋଠା କାର୍ଯ୍ୟ ଶେଷ ହେବା ପୂର୍ବରୁ କେତେଜଣ ଦୁର୍ବୃତ୍ତ ପାଞ୍ଚାୟତ କୋଠାକୁ ସମ୍ପୂର୍ଣ୍ଣ ଭାଙ୍ଗିଦେଇଥିଲେ। କିଛିଦିନ ପରେ ଠିକାଦାର ପୁଣିଥରେ କାର୍ଯ୍ୟାଳୟ କୋଠା ନିର୍ମାଣ କରିଥିଲେ। ଏହି ସମୟରେ ୨ଗୋଷ୍ଠୀ ମଧ୍ୟରେ ଅନେକ ଥର ରକ୍ତାକ୍ତ ସଂଘର୍ଷ ଘଟିଥିଲା। ଦୀର୍ଘ ୧୩ ବର୍ଷ ହେବ ଏହି ବିବାଦର ସ୍ଥାୟୀ ସମାଧାନ ହୋଇ ନ ଥିବାବେଳେ ତତ୍କାଳୀନ ସରପଞ୍ଚ କାବେରୀ ସାନ୍ତା କରଲାମାଲରେ ପଞ୍ଚାୟତ କାର୍ଯ୍ୟାଳୟ ଆରମ୍ଭ କରିବା ପାଇଁ ହାଇକୋର୍ଟଙ୍କ ଆଶ୍ରୟ ନେଇଥିଲେ। ହାଇକୋର୍ଟଙ୍କ ନିର୍ଦ୍ଦେଶ ପ୍ରକାରେ ବ୍ଲକ, ପଞ୍ଚାୟତ ଅଧିକାରୀ ସେଠାରେ ପହଞ୍ଚତ୍ ପଞ୍ଚାୟତ କାର୍ଯ୍ୟାଳୟ ଖୋଲିଥିଲେ। ଅନ୍ୟ ଏକ ଗୋଷ୍ଠୀ ଖବରପାଇ ଘଟଣାର ବିରୋଧକରି ବ୍ଲକ କର୍ମଚାରୀ ଏବଂ ଅନ୍ୟ ସମର୍ଥକଙ୍କୁ ଆକ୍ରମଣ କରିଥିଲେ। ଏକ ଶାନ୍ତି କମିଟି ଗଠନକରି ପଞ୍ଚାୟତ କାର୍ଯ୍ୟାଳୟ ସୁରୁଖୁରୁରେ ଚାଲିଥିଲା। ବୁଧବାର ସକାଳ ପ୍ରାୟ ୭ଟାରେ ପିଇଓ ଛବିଲାଲ ସେଠାରେ ପହଞ୍ଚତ୍ବାବେଳକୁ କେହି ଦୁର୍ବୃତ୍ତ କାର୍ଯ୍ୟାଳୟର ସମ୍ମୁଖ ପିଲାର ସହ ଝରକା ଭାଙ୍ଗିଦେଇଥିବା ଦେଖି ଥାନାରେ ଅଭିଯୋଗ କରିଛନ୍ତି। ଏଏସ୍ଆଇ ଅଶୋକ ପାଳ ଘଟଣାର ତଦନ୍ତ କରୁଛନ୍ତି।